طيف

مزمل الباقر

الحوار المتمدن-العدد: 4126 - 2013 / 6 / 17 - 12:04
المحور: الادب والفن
    

طيف



صحيتي ..
كل .. كلاب الحلة
لما جيتي ..
في آخر ...الليل
تتدبي..

كهربتي .. الشارع
كركبت ..الباب الواقف
بيني ..وشوفتك

تاوقت
من الشباك ...الفاتح
خشيتي ..
الأوضة
خشيتي .. قليبي
شقهت ..
كل حواسي
فرحة..
لما وقفت ..
قصادي

تاوقت ..
من رقراق
حسك
الجتة .... الدابت فيك
والقلب ..اللي
موكّر .. فيك

وصلتي ..
ما بين شرياني
وشريانك
ما بين قلبي ..وقلبك
شفت ..بي ريدك
ريدي..
لقيت ..قلبي ..
مشلهت
في ريدك

في ضفيرة
بتاوقك
من فرعك
وتغمز .. لعينيّ
تخلي عيوني
مقيدا بيها
بترعى في قيدا

ما بين..
قلبي واشواقك
عيني وفاطرك
وخصلاتك شعرك
وزندك
والشامة
المتكية ..علي حاجبك
بتعاين . شامتين
متقاودات
فوق شفتيك
وكتين .. تتكلمي
أو يتطاير .. ضحكك
فوق نضمي

وكيف .. ياحلوة
كلامك ... ساعة تزعلي؟
مرات ..
بتمنى .. ازعل
خاطرك
شان ... يتلون زعلك
بي .... بحة صوتك
بي ... َصرّة حليوة من
حاجبيك..

مرات .. بتشفقي
قلبي ...
لما ... تدبرسي
ويتكوم .. حزنك
جوه ..قلبيك
ويطل .. الوجع الكامن
فيك
بشوفو .. عديل

مرات ... بتزيدي
شجوني . شجون
لما اشوفك
اسمح من .... وقفة
صاحب .. ساعة عوزة
واعذب من ...دعوة أم
وأكبر من ..حس الوجع
القاطع
قلب البلد .. الحفيت
قدميهو
وهو بساسق
بين الدول .. الما بتريدو

ومره .. بتخرمي
واقع الحال .. المايل
بي فرحاً ماهل
شايل
كل سعادة الدنيا
ولاميها في ُصرّة
وقعت في إيديّ
ساعة دعوة
قالت ليها ابواب السماء: آمين

ويا .. اجمل طيف
اتموسق .. مع ايقاع
الحب اللي اتمايل
في قلبي
لما غشيتي
قليبي ..
في آخر الليل
وصحيتي ..
كل .. كلاب الحلة
بي جيتك

ليه ما هزيتي
الشوق النايم فوق الشارع؟
الواصل بين خطواتك
وخشم بابي
وطاقة العشم ... الفاتح
إمكن كان صحى
الشوف!!


مزمل الباقر
امدرمان في 29يناير 2004م

#مزمل_الباقر (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات