أنا قابل .. عامية مصرية.

مختار سعد شحاته

الحوار المتمدن-العدد: 4063 - 2013 / 4 / 15 - 00:31
المحور: الادب والفن
    

" قابل يا عااااااااااااااااااااااااام أنا"
**********************
قولى لى أبقى مين فيهم؟
قولى لى أبقى مين؟
قابل أكون طرف تالت وبيتابت..
وبيعاند فى كل الكون.
قابل أكون "المان"، والولد ميخا،
ولو مختارك المجنون
قابل أكون كمان زى بتوع السيما والأفلام
وأبطال مسلسلات النوم
قابل أكون متعلق على الآخر
ومتَّاخر، جديد فى العوم
قابل أكون كل الوصف والعلامات،
والغلطات، والسقطات،
الفلتان،
وواد تلفان،
وواد مغرور.. أنا قابل
قابلهم كلهم لأجلك،
ومن أجلك يمكن أعيد ترتيبة الأقلام
ف علبة ألوانك،
وف شكل العلم غرقان ألوان
كلها بالدم.
ولا تشيلى فى لحظة الهمّ.
قابل أكون ولد طايش ومش خايف
من الكداب ولا الخرطوش
ومن زحمة الدمعة على عيونك
عشان تجرى على المكشوف
قابل أكون "على الزيبق" مع المماليك
وع العسكر الملعون وكام قراقوش
عشان سابك فى حزن كبير
عشان شافك وعارفك إن بتوهى
ومستخسر يمد الإيد
أنا قابل أبيع لك كل مكتوبى
واشترى لك عيد
وفرسه بيضا تنطلق بيك
ما أنا قابل أكون خيّالك المركون ساعة عوزه
والله العظيم قابل ..قابل بكل أوضاعى
كمان قابل اسمى على التليفون
"رقم خاطىء"، " رقم مجهول"
مادام يا ستى ف الآخر..
بتجينى وأنا ساهر ومتمرد
على نومى وع الكوابيس
وجنب النيل، وع الكورنيش
أنا قابل..أنا قابل.أنا قابل
أنا قابل بنص الحالة والتباريح
ولما تحزني وقلبك خلاص يغضب
أنا قابل أكون لك التوهة والأحلام
مادام ف آخر الليلة يزورني الطيف
وتتمسك طراطيفي بضحكة بنتنا النونو قبل النوم وتحكي لها
أنا قابل كمان أقول للنيل كل أسراري عشان خاطرك
وأعيد من تاني تكويني وأوشوش الأزهار ..
أنا قابل.

مختار سعد شحاته.
bo Mima
روائي.
مصر - الإسكندرية.

#مختار_سعد_شحاته (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات