باللهجة العراقية ..سيف يحب نور ونور متحب سيف!

محمد الياسين

الحوار المتمدن-العدد: 4056 - 2013 / 4 / 8 - 14:59
المحور: كتابات ساخرة
    

مساكم الله بالخير ، اليوم نحجيلكم على إئتلاف جديد ظهر على الساحة ومتوقع أن يغير طبيعة المعادلة السياسية في البلاد ، فينتقل بها من " الخضراء إلى الحمراء! " ، شديدة الاحمرار! ،شديدة العاطفة! ، شديدة الحب ، العشق الممنوع! ..
نسولفلكم اليوم عن قصة نور وسيف ، إئتلاف دولة الحب بقيادة سيف وعقيلته نور ، طبعاً دعاية الائتلاف الرومانسي الجديد على الفيس بوك ، ذكرتني بفيلم بخيت وعديلة ، بطولة عادل أمام وشيرين ، لمن دخلو انتخابات مجلس الشعب علمود يحصلون شقة من امتيازات المجلس يعيشون بيها !! ، طبعاً هذا الحجي مرح يصير ويه سيف ونور أبطال فلمنه العراقي لأن مجلس نوابنه ومجالس محافظاتنه تختلف تماماً!، مابيه امتيازات للاعضاء! ، رواتبهم أقل من أي موظف آخر بالدولة !، ماكو فساد! ، ماكو كومشنات! ، ماكو محاباة !، أبن عمي وابن خالي وأخو زوجتي !، هذا الحجي كله مموجود بالعراق!! ، أصلاً أحنه برلمانه بُني على التقشف! ، نوابنه يتبرعون برواتبهم للعوائل الفقيرة ومحدودي الدخل! ، أحنه غير..!
أني وبكل صراحة ماضم عليكم شي ! ، بس أكيد مو كلشي ينحجي! ، بيني وبينكم ولتكَولون لأحد ! ، صديقي عنده أخو " كيكي " وأسم الشهره كرستاله ، شعره سبايكي ، بنطرونه جينز " ساحل " ويلبس سروال داخلي " بوكسر " بألوان زاهيه ، حسب وصف الاخ ، نغمة موبايله الواوا لهيفاء وهبي رغم عشقه الكبير لاغاني الفنان الراحل سعد الحلي ( أبو خالد )!، المفاجأة الي كَلي عليها صديقي أخو كرستاله أنه كرستاله رح يرشح بإئتلاف دولة الحب لخوض غمار الانتخابات، لايمانه بقدرته على التغيير حسب قول كرستاله لاخو ، اني صراحة استغربت فعلة كرستاله ، بس عجبتني روحه الوطنية العالية ، وبحسب قول شقيق كرستاله ان السبب الرئيسي لاقدام كرستاله على الترشح للانتخابات يكمن في عدم وجود مرشحين قادرين على إدارة الدولة وحمل المواطنين على كفوف الراحة كما يطمح ان يفعل كرستاله!.
شقيق كرستاله يقول: اذا فاز كرستاله بالانتخابات فيعتقد ان دوام المجلس رح يكون ليلي الى حد الصباح الباكر! ، ماعرف شنو قصد ! وليش هيجي يكَول ! ، بس يمكن هموم المواطن العراقي تقتضي عليهم ان يكون دوامهم مسائي ، الله أعلم ، الله يرحمك أبو خالد ، الله وياكم أغاتي!.

#محمد_الياسين (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات