اتق الله يا خزاعي

ماجد العذاري

الحوار المتمدن-العدد: 3989 - 2013 / 1 / 31 - 02:34
المحور: كتابات ساخرة
    

اتق الله يا خزاعي
في سنوات 1945 ـ 1950وفي الفرات الاوسط وفي ناحية غماس كانت وسائط النقل قليلة جدا وتعد على عدد اصابع اليد وكان هناك سائق اصله من اهل العمارة
لديه باص خشب يعمل على خط غماس ابو صخير والشوارع لم تكن في حينها لم تكن معبدة
يعني ترابها واصل لعنان السماء فهذا السائق يوميا ايروح من غماس الى ابو صخير ويرجع فقط والى يوم ثاني يبداء نفس المشوار
في احد الايام كان مدير الناحية واقف على الشارع العام وشاهد الباص من بعيد فارسل شرطة الخيالة ليطلبوا منه ان يخفف السرعة من كثرة التراب ولما وصل شاف ناس فوك ظهر الباص كلهم اتراب وسئلة للسائق
كله انته ليش هشكل امسوي بالناس
كله ابروح ابوك اسئلهم اني لزمتلهم عصا وصعدتهم بالقوة لو همه صعدوا يا استاذ اذا ما كو غير هل باص والعالم اتريد ترجع لهلها شيسون
وهذه القصة يعرفها خزاعينا الورد
لنعد الى الخزاعي
عفوا
نائب رئيس الجمهورية العراقية السيد خضير الخزاعي المحترم
القى كلمة العراق في القمة الاقتصادية في الرياض
وقال بالنص ما يلي
ان العراق سيكون من الدول المانحة بعد عدة سنوات بسبب المستوى الاقتصادي والمالي وانتاجة النفطي وسوف لن يقصر مع اشقائه العرب
انتهى السيد الخزاعي من كلمتة
بارك الله بيك وعفية وهذا عشمنا بيك انت كاعد تنقل صورة طيبة عن العراق بس اعتقد اشويه لحيت مو
من اتفضلت ووعدت انه العراق ما راح يقصر وي اشقائة العرب
بروح ابوك شنو يعني راد ادين السعودية لو الكويت لو الامارات لو ما اعرف اشتقصد ما راح اتقصر وي اشقائك العرب
يابة زين على كولت شيابنا حجاية الي تنكال
زين اغاتي
اريد اسئلك
شلون طاوعتك نفسك وتطلب طيارة خاصة من المملكة العربية السعودية لاداء مناسك العمرة الك ولزوجتك ولشقيقك
زين انته رايح الى قمة اقتصادية زوجتك اشعدها وياك زين اخوك اشعده وياك
زين شنو الي ايريد ايروح للعمرة لازم بطائرة خاصة
يعني العمرة ما تنقبل لو حجزت على خطوط عادية ورحت حالك حال الناس الي اتروح للعمرة
لو انته عمرتك
في اي بي
لو اتريد عمرتك تحسب عمرة خاصة لانها بطائرة خاصة
مثل ما رحت لزيارة الاربعين بطائرة هليكوبتر
زين انت مو اتمثل رئيس الجمهورية وكالة يعني انته هسه رئيس جمهورية ما عندك طائرة
زين الخطوط الجوية العراقية ما عدها طائرة ادزها الك
بس اشلون وصلت للملكة العربية السعودية
نفرات لو كعيبر لو تهريب بس فهمنا اشلون وصلت للسعودية
زين انتم ما اتشبعون من الحج والعمرة
بسم الله الرحمن الرحيم
ولله على الناس حج البيت من استطاع إليه سبيلا
الله العلي العظيم
زين بالتفسير للقران الكريم ما لكينا يا خزاعي لازم ايروح الواحد بطائرة خاصة
يا خزاعي
وانت لديك
شهادتي الدكتوراه أحداهما في علوم القرآن-التفسير
من الهند
وأخرى في فلسفة الفكر الإسلامي،
الله يقول في محكم كتابة
من استطاع اليه سبيلا
يمعودين
زين ثم انته من كمت اتشخبط واتكول العراق ما راح ينسى اشقائة العرب
انته بنيتلك فد فندق فد مشروع تتفاخرون بيه غير اتحسن وضع بلدك او البنى التحتية
وبعدين الله عليك لاتنسى بلكي ادين الامارات فد كم مليون دولار ايريدون ايصلحون البرج مال دبي بيه اشجم جامة مكسورة
بس انته مشكلتك ما تختلف عن الجوكة مال المنطقة الخضراء
بس اطلب منك طلب اسئل عن قصة هذا ابو الباص الي جان يشتغل على خط غماس ابو صخير
رحم الله مدير الناحية وسائق الباص

واتق الله يا خزاعي
وانت القائل
اليد التي تتوظأ لاتسرق
لا هواي راح نقبض من دبش

#ماجد_العذاري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات