عبدالله صقر
الحوار المتمدن-العدد: 3892 - 2012 / 10 / 26 - 16:46
المحور:
الادب والفن
لما يكون حلمك
ملهوش معالم
وأملك فى الدنيا
شبه ضايع
وكل أحبالك فى الدنيا
اللى ماسك بيها من سنين
ماتت ومات معاها الحنين
ولما تلاقى الكلمة اللى
طالعة من فاهك
أصبحت مسروقة
والضحكة اللى بتضحكها
بقت مخنوقة
وأصبح الآمل متساوى
مع اليأس
وملامح الوجوه
أصبحت واحدة
ساعتها هايكون
للموت معنى
لآنك فقدت معانى الحياة
,,,,,,,,,,,,,,,,,,,,,,,,,,,
ولما يكون الليل
زى النهار
وتصبح من نومك محتار
تركض وراء لقمة عيشك
طول النهار
ساعتها ها تحس إنك
شايل هموم على أكتافك
أكبر من الجبال وأمواج النهار
ساعتها موش ها تقدر
تقاوم أحزانك وهمومك
وموش ها تقدر
تكمل يومك
لآنك فقدت كل المعانى الجميلة
,,,,,,,,,,,,,,,,,,,,,,,,,,,,,
من أمتى يا صاحبى
وهى معانا مساندة !!!
طول عمرها لينا معاندة
أوعى تنغش فى الآيام
وتقول عليها حلوة
دا الآيام يا صاحبى
مليانة ألام
وإحنا فى أيديها
ما بنخدش غلوة
إحنا يا صاحبى
زى اللى ماشى على جسر
ملهوش نهاية
كل واحد منا بينطحن فيها
زى الغلال جوة رحاية
وفى النهاية
بنموت وبتندفن فى مكان
على قد مقاسك
لا بتأخذ وياك فلوسك
ولا حبايبك وناسك
وبتتحلل فى التراب
وبتبقى ذكرى
#عبدالله_صقر (هاشتاغ)
كيف تدعم-ين الحوار المتمدن واليسار والعلمانية
على الانترنت؟