سرمد علي الجراح
الحوار المتمدن-العدد: 3721 - 2012 / 5 / 8 - 17:49
المحور:
كتابات ساخرة
يهددون بسحب الثقه من الحكومه, أول مره خلي واحد يكلي ياثقه وياديمقراطيه هاي؟؟
راح للأنتخابات ساركوزي ورجع صاير قوزي, هكذا هو حال الديمقراطيه الحقيقيه.
وليس ديمقراطية, بين العصر والمغرب مروا لمة نشّاله
ففي بلد القمامه واللمامه, الذي يقلق ويزعج ويبعث على الغثيان ولعبان النفس والاسهال, ليس شوفة أعضاء البرلمان التناسليه!!
ولا رؤية الحكومه ووزرائها وهي تعمل بالقدره الألهيه.
ولا القضاء الذي يسرح ويمرح ويطلق سراح الارهابيين وآخرهم اللبناني, علي دقدوق من حزب الله, بدون مايخبّرنا شعنده الأخ بالعراق وشلون دخل وليش؟
ولا إصرار دولة رئيس الوزراء على تخريب الحياة السياسيه في البلد, وسن كل السنن والأمثله المنحرفه والملتويه في بناء ديمقراطيه بلا لباس, للأجيال القادمه, اللي حظها الأغبر راح يخليها تنولد بالعراق, والذي هو جزء لايتجزء من الأمه الأيرانيه.
ولا الكتل السياسيه اللي ماتعرف شنو برامجها وعلى شنو متكتلين, عدا ماهو واضح إن تمكتلهم وتكعورهم من غير ميعاد, كان لهدف سامي واحد هو, أفتح زنبيلك, عبّيلي واعبيلك.
ولا إنتشار أوبئة الفساد والرشوه وسرقه المال العام بشكل لم يسبق له مثيل حتى في فلم الرعب, طلكني أمك ضوجتني, للمخرج هتشكوك.
ولا زعيم تيار حبيب امك تمشطك تعتني بيك, أمنيتي بالحياة أشوفه راكب بايسكل وبيده نفاخه, يوميه يسحب الثقه بالحكومه ويرجعها, يعني داخله خارجه
كل هذا لايبعث على لعبان النفس كما أسلفت, ولكن الذي يبعث على الاختناق والأحباط والكآبه هو, إنك عندما ترى بأن من يدعو نفسه معارضه, ليس أحسن بل أسوء من الذي على الكرسي
عيوني دكتور علاوي من رخصتك, نازل علاوي, لأن ماجاي أفتهم شكو كاتل نفسك وتريد منصب شلون ماكان؟
ليش ماتحترمون نفسكم إنته وجماعتك وتبعدون نفسكم عن هيج حكومه, حتى على الاقل الشعب يحترمكم, ويكول خوش أوادم ومايقبلون بالعوجه
راضين جنابكم كأي لوكي, بالعظام اليشمرها إلكم, وتساهمون بعلم وبدون علم بتوطيد أركان الفساد والجريمه
الدوني يبقى دني ودوني, ومايفكر أكو باجر لأن نظره قصير
شنحجي وشنكول, إذا الشعب العراقي العظيم راضي وينتخبكم مثنى وثلاث ورباع, فحيل وألف حيل بيهم,
وعلى قولة كتاب نهج اللواكه, أتدهدر الجدر ولكه قبغه.
#سرمد_علي_الجراح (هاشتاغ)
كيف تدعم-ين الحوار المتمدن واليسار والعلمانية
على الانترنت؟