قصيدة و قالولى عليك خاين

جمال الشرقاوى

الحوار المتمدن-العدد: 3702 - 2012 / 4 / 19 - 13:53
المحور: الادب والفن
    

و قالولي عليك خاين
و الليل م بينسىَ صباحه
قلتلهم ما تذكروه
علّ قلبي ينسىَ جراحه
و سألت كل الناس
و هو كلامهم م اتغيَّرش
و اتمنيتك يوم أمل
و انت قدر م بيعذرش
و انا اللى قابلتك يوم
يا حبيبي من غير معاد
و قلت خلاص لقيت النوم
و الأحلام بعد السُهاد
و لقيتك بتلعب بيَّه
و بتبعد شويَّة شويَّة
و بترميني ف بحر الحزن
و تغرَّق معاك مراسيَّه
و افتكرت نفسي يوم
عايش بقول مين قدِّي
أتاريني على شط غريب
ماشي ببكي عمري لوحدي
و قالولى خلاص م تبكيش
على خاين راح و فات
قلت ببكي على ماضي
عمر معاه كأنه ساعات
و لمَّا كان بيدُق الباب
كنت اقوم بالليل و افتح
و لمَّا يا ناس كنت بشوفه
قلب ضنىَ بيه بفرح
كنت اغسله بدموع عيني
و كنت اكسيه ببسمتي
لا كنت عايز غير حبه
و لو تخاصمني دنيتي
و لو بكىَ مرة على كتفي
أرقيه بدمِّي من الأحزان
أحكيله حواديت كتبي
و أشعاري و ابات حيران
رعيته يوم قلب صغيَّر
حتىَ صار زي النخيل
و لمَّا آجي احتاج حبه
ألقاه عليَّه يا ربِّ بخيل
سنين و سنين و انا ويَّاه
صابر على تقله بحالي
و كل م ابقىَ أتوب و انساه
ألاقيه ف كل ترحالي
عشقه معذبني لا بيسبني
و لا بتقول عنيه لأة
بيعدِّي و انا اشوفه و لا بيسأل
قلبي ف يوم على الدقة
خلاص أنا طاوعت الناس
و قلت أسيبه و أهجره
و انا يا حبيبي مش وسواس
دة قلبي لقاك بتنكره
و قالولي عليك خاين
و الليل م بينسىَ صباحه
قلتلهم ما تذكروه
علّ قلبي ينسىَ جراحه
علّ قلبي ينسىَ جراحه

#جمال_الشرقاوى (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات