الجماعة لسه ما قالوش!!

خالد الكيلاني

الحوار المتمدن-العدد: 3660 - 2012 / 3 / 7 - 09:05
المحور: كتابات ساخرة
    

دعيت للحديث عن الرئيس القادم ... ولكن الجماعة لسه ما قالوش، وأنا خايف ليكون الرئيس القادم ... من أعماق البحر على رأي نزار قباني، واليوم عرف الأمريكيون مرشح الحزب الجمهوري الذي سوف ينافس أوباما علىٰ رئاسة الولايات المتحدة في الانتخابات التي سوف تجري هناك بعد 10 شهور، ولم نعرف نحنُ منْ الذي سوف ينافسُ مَنْ على الاستمتاع بحكمنا في الانتخابات التي سوف تجري بعد شهرين!! ... لأن الجماعة لسه ما قالوش، وأنا ما عندي تجربة في الحب ولا عندي زورق.
وإذا كان الأمريكان عندهم 2 مرشحين هيختاروا منهم واحد، فإحنا عندنا 102 مرشح محتمل مش هنختار منهم ولا واحد، لأن الأمريكان معندهمش ولا لجنة، لكن إحنا عندنا لجنة عليا ومجلسين نص نص ومجلس أعلى، والمواطنين الشرفاء اللي ما بيروحوش التحرير لأن مترو الأنفاق وصل للعباسية هيقعدوا في البيت ويبعتوا للمجلس رسالة من تحت الماء.
والفرق بيننا وبينهم إن المرشح في أمريكا بيزور "الإيباك" ويغازل تل أبيب، والمرشح عندنا بيزور المقطم ويغازل كوبري القبة، صحيح المسافة من مقر الإيباك في واشنطن لتل أبيب بعيدة، لكن إحنا الحمد لله المسافة من المقطم لكوبري القبة لازم وضروري تمر عن طريق العباسية، وعلي رأي جارتنا أم حمدي اللي قاعدة منتظرة جوزها اللي مفقود في حفر القنال: "البيوت قِرف زي النسوان"، والجماعة كانت محظورة في كورنيش منيل الروضة ... طلعت كورنيش المقطم بقت محظوظة، ولو أني اعرف خاتمتي... ما كنت بدأت.
وزمان لما كنت في المغرب جه علينا العيد فلقيت صديقي بيخبط على الباب ومعاه ربع خروف، سألته إيه ده ... قال لي: "عيدكم مبارك"، سرحت قليلاً ورديت عليه: "وعيدكم الحسن الثاني"... وضحكنا حتى استلقينا على الأرض من الضحك، ومرت الأيام ومات الملك وشيعوه في جنازة مهيبة على عربة مدفع حضرها كل رؤساء الدول، وقبض على الرئيس وأحضروه للمحكمة على سرير نقال وهو يردد في حضور كل رؤساء العصابات... "أيوه موجود يافندم"، ومع ذلك الجماعة لسه ما قالوش، وأنا لا اعرفُ فنَ العوم.
ورغم إن جارتنا أم حمدي كانت حياتها أكتر من الضنك بشوية، وجوزها لما خدوه في السخرة ما سابلهاش غير ربع جنيه عثماني مخروم وبراني، إلا إنها مفيش على لسانها غير عبارة"يا اخويا لما يضيق بيك الحال يا تغير العتبة يا تغير المرة"، والجماعة غيروا العتبة، والمجلس غير التحرير، والشعب هيقعد لهم في باب الحديد ... وهيرضى بأي رئيس من باب تغيير العتبة، ولو الرئيس القادم واحدة ست يبقى غَيْر الاتنين. وإن كنت أعُزُ عليك ... فخُذ بيدي.
صحيح النهاردة 7 مارس، وبكرة يوم النسوان العالمي، وباب الترشيح هيتفتح 10 مارس ولكن الجماعة لسه ما قالوش، ولا الجماعة ولا حزبهم عملوا استفتاء بين الأعضاء وسألوهم نؤيد مين في انتخابات الرئاسة!!، بيقولوا إن مكتب الإرشاد قاعد على حتة عالية في الهضبة بيستطلع الهلال علشان يشوف هو بزغ من التحرير ولا لسه بيطلع من كوبري القبة، وسمعت إنهم طلبوا من مصلحة سك العملة يعملولهم جنيه ذهب وش شفيق ووش موسى علشان يعملوا "طوس".
إني أتنفس تحت الماء..
إني أغرق..
أغرق..
أغرق..

#خالد_الكيلاني (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات