حبايب

زاهد الشرقى

الحوار المتمدن-العدد: 3657 - 2012 / 3 / 4 - 22:29
المحور: كتابات ساخرة
    

وصلتني دعوة من أحد الزعماء السياسيين مضمونها الحضور للمشاركة مع باقي الزعماء . للمشاركة في مظاهرة كبيرة ستنطلق باتجاه السفارة ألأمريكية !!! ..طبعاً راح تستغربون ليش أني بالذات طلبوني لأنه صرت ( زعيم ) مثلهم بعد أخر اجتماع بيننا جرى وكان أسرع اجتماع في العالم لم يدم سوى( 3,5) دقيقة !! ويعرفوني كلش زين .وبهذا الاجتماع أوجدنا الحلول تقريباً لكل المشاكل وما على الشعب سوى الصبر فد عشرين أو أربعين سنة وراح أيشوف النتائج .
والاستغراب الثاني أكيد مراح يصدق أحد أنه قادة الكتل يطلعون مظاهرات ضد أمريكا !! .. طبعاً حقكم تستغربون لأنه مشايفين القادة اشلون مشغولين هاي الأيام بانتخابات مجالس ألاقضية والفر....هود .. عفواً مشغولين بالشعب أهواية خطيه ..
المهم كالعادة ركبت ( البايسكل ) وانطلقت على بركة الله لمكان التظاهر وبعد يومين وصلت لمكان التظاهرات وكان محدد سابقاً وتم توفير حماية من قبل قطعات من الجيش والأمن والمخابرات والاستخبارات والمليشيات والقاعدة , وحتى ألأمريكان موجودين يحمون المكان !! .. حتى لكيت السفير الإيراني ومجموعة يمكن الحرس الثوري موجودين ديحمون المتظاهرين ,, شفتوا الكل يحميهم لعد أشعبالكم ..وكالات أنباء ومحطات فضائية وخير من ألله .. ادكول رايح السفرة مو مظاهرات ..
أنطلقنه من مكان التجمع باتجاه السفارة ورفعنه مطلب واحد موحد وهو( الضغط على أمريكا من خلال مقاطعتها اقتصاديا !! نعم المقاطعة الاقتصادية بكل أشكالها وألوانها الغذائية والصناعية والعلمية وحتى المشروبات الروحية !!)
المتظاهرين بقوا بالمكان وهتافات كبيرة ,, وأني فرحان ممصدك ,, قادة وزعماء العراق يتظاهرون ضد أمريكا ,, الله أكبر ,, تعالوا شوفوا يا شعب ,, أي صدك مظلومين يا ساسة العراق هسه بينت الحقيقية والإعلام المزيف الي ينتقدكم دائماً .. واني أفتر ( بالبايسكل ) بينهم وأهوس .. حتى واحد من الزعماء رفع لافتة ( أمريكا أرفعي يديك عن طهران).. حلو والله !! والأخر رفع لافتة ( الله وسوريا وبشار وبس ) بعد شيبي !! والأخر لافتة مكتوب عليه (كلا لنهب أموال الدول العربية من قبل أمريكا) .. لله من فرحتهم ما نسوا دول الجوار ,, اشلون ينسون الحبايب مو عيب !! .. واني كلت فرصة خلي احرق العلم ألأمريكي والإسرائيلي ,, موافق الزعماء كالوا عيب ميصير نحرق أعلامهم .. كلت أي أذا حركت العلم راح ايصمطون أبهاتنه غير !!!.. بس أشجاب إيران وسوريا والدول العربية بالوسطة !! .. جاوبني واحد من الزعماء .. كال هاي مظاهرات جملة مو مفرد !!..
الجماعة الزعماء تعبوا لأنه ممتعودين على الجو لأن كل حياتهم تبريد وتدفئة وكهرباء متنكطع !! فأخذوا قسطا من الراحة وزعت من خلاله المشروبات الغازية عليهم . والعجب ان تلك المشروبات هي (ببسي كولا) تحمل على غلافها أنها صنعت بامتياز أمريكي !!! .. قامت موظفات وموظفي أمريكان بتوزيعها علينا !! وبعد انتهاء المظاهرات تفرقنا ورحنا الدار سينما قريب حتى أنشوف فلم أمريكي !! , وباقي الزعماء واحد أتصل بأهله بأمريكا وكال راح ادزلكم كم مليون دولار وعيشوا ( الحياة حلوة) ..!! والأخر راح للسفارة .. كتله وين رايح !! كال أريد احجز بمستشفى أمريكي والله تعبان وهناك العلاج .. لوز والله !! .. وزعيم لكيته على صفحة يضحك .. كتلة خير أن شاء الله .. كال لا ماكو شيء أولادي بأمريكا يدرسون وماشية أمورهم هناك التعليم أحسن من غير مكان !! ..
والآخرين كانوا مشغولين مع المستشارين الأمريكان الي وياهم والظاهر عدهم شغل أهواية مراح يخلص !! ..
المهم رحنه الباقين للسينما .. ولكيت السفير الأمريكي كاعد هناك ..
كتله : أشجابك احنه مو راح أنقاطعكم
كال : اكعد انتم مخبل عاقل ..ترى حتى ملابس النوم مالتهم امريكة !!
كلت: وهسه اشلون ؟؟
كال : اكعد شوفا أحلى فلم بعنوان ( مهازل العراق الجديد)
كلت : منو البطل ويا شركة منتجة للفلم
كال: إنتاج أمريكي والممثلين الي جانوا وياك بالتظاهرات !! ترى احنه حبايب من زمان مو هسه !!
نعم كلها مسرحيات تجري فيك يا عراق تحت مسميات وعناوين كثيرة , واليوم نشاهدهم يتفقون في السر فيما بينهم ويتقاسمون مناصب مجالس الاقضية والنواحي وكل ماهو جديد من أجل مصالحهم الشخصية والحزبية وبدعم من قبل كل من يريد السوء للعراق وشعبه وبالأخص دول الجوار والعمة ( أمريكا) ..وطلعوا كلهم حبايب .. كلهم الداخل والخارج
أخ منك يا لساني .. سلامات يا وطن

#زاهد_الشرقى (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات