|
نص حوار السيد راشد رئيس إتحاد نقابات عمال مصر ووكيل مجلس الشعب المصرى مع جريدة الاهالى
عبدالوهاب خضر
الحوار المتمدن-العدد: 1077 - 2005 / 1 / 13 - 11:08
المحور:
مقابلات و حوارات
أجرى الحوار : عبدالوهاب خضر خرج ما يقرب من نصف مليون عامل علي المعاش المبكر، منذ منتصف التسعينيات وحتي الآن، وذلك هربا من المستقبل المظلم والواقع المؤلم، وخلال تلك الفترة تراجعت العمالة داخل الشركات المبيعة للقطاع الخاص بنسبة 50% (!!).
ولم يحقق قانون العمل الجديد الاستقرار الاجتماعي والاقتصادي الذي كانت تتحدث عنه حكومة الانفتاح والتحرر، فتشهد معظم الشركات والمصانع العامة والخاصة هذه الأيام غضبًا عماليًا غير مسبوقًا، مترجماً، في مظاهرات وإضرابات واعتصامات داخل وخارج المواقع العمالية بالحديد والصلب والغزل والنسيج والطوب الرملي والشحن والتفريغ والنصر للمواسير والإسبستوس والنقل البري والبحري والأسمنت والنشا والجلوكوز والكاوتش وغيرها وهتف العمال ضد سياسات الخصخصة والحرمان من الحوافز والمكافآت والعلاوات وعدم توافر وسائل السلامة والصحة المهنية، وكذلك خفض الأجور في الوقت الذي ارتفعت فيه الأسعار بنسبة تتراوح بين 300% و400% خلال الفترة من عام 2003 إلي عام 2005!!. وعندما جاءت حكومة الدكتور أحمد نظيف الإلكترونية «بفكرها الجديد» لم تفكر في مصالح ملايين العمال المهدرة، بل أسرعت لتسليم اقتصادنا وصناعتنا ورقاب عمالنا للمستثمرين من كل الجنسيات لدرجة التفريط في شركاتنا الاستراتيجية وأمننا القومي!!.
إذن «البلد رايحة علي فين»؟ هذا السؤال حملته «الأهالي» وذهبت به إلي المسئول الأول عن العمال في مصر.. السيد راشد، رئيس اتحاد نقابات عمال مصر ووكيل مجلس الشعب ورئيس الاتحاد الدولي لنقابات العمال العرب، فأجاب بصراحة عن التساؤلات التي طرحناها عليه داخل مقر الاتحاد.
> لعلك تتفق معي أن هناك «فكرا جديدا» يقود البلد الآن ويبيع الغالي والرخيص والرابح والخاسر وفتح أبواب البزنس دون اعتبارات قومية واستراتيجية.. ما رأيك؟
>> نحن كتنظيم نقابي وافقنا علي التحرر الاقتصادي كي نساير العالم ولا ننعزل عن المجتمع الدولي، وكنا في البداية معارضين لهذا التحرر والخصخصة، وعندما عرفنا أن بلدنا متورطة في ديون، فكان لازم علشان نسدد تلك الديون نبيع جزءًا من ممتلكاتنا من الشركات الخاسرة والضعيفة.
> لكن البيع دلوقتي يتم للشركات الرابحة والاستراتيجية فقط، فيجري الآن الإعداد لبيع شركتي النصر للتعدين والفوسفات وربحيتها هذا العام أكثر من 100 مليون جنيه، وكذلك شركة سيناء للمنجنيز وهما شركتان استراتيجيتان لهما علاقة بالأمن القومي وكانت الحكومة السابقة ترفض بيعهما؟.
>> معك حق.. أنا أرسلت مذكرة للدكتور أحمد نظيف رئيس مجلس الوزراء ود. محمود محيي الدين، وزير الاستثمار، بخصوص الشركتين دول وقلت: مش عايزين نبيع بلدنا بالرخيص، لأن مصر مش للبيع، وأعلنت إن أنا ضد بيع الشركات الاستراتيجية لأن دي اقتصاد بلد وأمنها القومي، وأنا أعلن دلوقتي إنه إذا مكانش فيه مفر من بيع الشركات فلابد أن يكون للدولة أكثر من 50% في الملكية.. أتمني كده!.
مافيش اقتصاد
> طيب.. «الفكر الجديد» ده عمل لنا اتفاقية «الكويز» مع أمريكا وإسرائيل، وعندك كمان اتفاقيات الجات والتجارة الحرة مع عدد كبير من الدول العربية والغربية من خلال موقعك كرئيس للاتحاد ووكيل مجلس الشعب هل إحنا عندنا صناعة قوية قادرة علي المنافسة؟
>> بصراحة.. مفيش صناعة قوية.. ولا اقتصاد قوي والقطاع العام انهار بسبب سوء الإدارة، وعايز أقول إن مثلا صناعة الغزل والنسيج في مصر سواء في القطاع العام أو القطاع الخاص لا يمكن أن تنافس لأنها ضعيفة جدا بسبب عدم وجود تطوير وتحديث في كل المجالات، وكان يجب أن يحدث هذا التطوير والتحديث قبل كل شيء وده مطلبي دائما.
> أنا أعرف إن الشركة القابضة للغزل والنسيج كان عندها خطة للتحديث والتطوير ولكنها لم تنتظر حتي تنتهي الخطة وأعلنت عن بيع جميع الشركات، ومحسن الجيلاني رئيس الشركة القابضة قال لي: مفيش فلوس نطور وصندوق دعم الغزل «مخروم»، فلازم نبيع!!.
>> فعلا مفيش فلوس وكمان الإدارة سيئة.
> يعني نجيب أجانب يديروا البلد بقه؟
>> أنا مقولتش كده!.
العصر الذهبي
> فاكر لما قلت منذ خمس سنوات إننا بنعيش العصر الذهبي للعمال؟
>> أيوه فاكر، وفاهم سؤالك طبعا، بس شوف مرحلة التحول إللي حصلت علي مستوي العالم غيرت كل شيء وعندك الاتحاد السوفيتي والبلاد الاشتراكية انهارت واترمي عمالها في الشوارع، أنا بقول مازلت متمسكا بأننا نعيش العصر الذهبي لأن عمالي «مترمتشي» في الشوارع إنما وضعنا ضوابط معينة لتوفير وترشيد العمالة والمعاش المبكر وغيره، علشان كده أنا بقول العصر الذهبي للعمال لوجود حسني مبارك.
> سأتفق معك مؤقتا حتي تجيب عن هذا السؤال: بم تفسر هذه التحركات العمالية من مظاهرات واضرابات واعتصامات داخل جميع المواقع العمالية بسبب سياسات الخصخصة والبيع والحرمان من الأجور والحوافز والمكافآت حتي أن منظمة حقوقية قالت إن هناك أكثر من 150 احتجاجًا خلال الستة أشهر الأخيرة؟
>> طبعا أنا متابع وأعترف بذلك، لكن بعضهم معاه حق وبعضهم ممعهوش حق، واحنا تنظيم نقابي في معظم المواقع ويتواجد بعقلانية وإذا كان الناس لها حق لازم ندافع عنهم، وخير دليل ما حدث لشركة النيل لحليج الأقطان في المنيا، العمال اعتصموا بعد ما الشركة اتباعت لمستثمرين وأنا حركت النقابة العامة إللي قعدوا مع العمال وصاحب المال ووضعنا الضوابط والشروط والمشكلة اتحلت.
الإسبتسوس
> طيب كان فين دور الاتحاد دلوقتي مع عمال شركة أورا مصر لصناعة الإسبتسوس اللي معتصمين منذ ثلاثة أشهر ولما طالبوا بحقوقهم الصحية لأن هذه المادة «الإسبتسوس» محظورة دوليا لخطورتها علي الصحة، قام صاحب العمل بفصلهم؟
>> أولا شركة أورا مصر بالعاشر من رمضان عمالها مش مشتركين معنا في التنظيم النقابي.
> أليست دي مشكلة ثانية؟
>> لا مش مشكلة، أنا مسئول عن عمال مصر سواء منخرط في العضوية أولا بس نُبلغ، وأنا بنفسي دلوقت بتابع هذا الموضوع، علشان نحله ونحافظ علي حقوق هؤلاء العمال.
> عايزك تقول كلمتين للعمال المفصولين بتوع الإسبتسوس؟
>> أقول إن أنا مسئول عن كل عامل في مصر، وبعدين أنا مع أي تحرك عمالي طالما ميخربشي وميهدمشي الإنتاج.
> أيوه أنا معاك، بس انت عندك قانون العمل الجديد رقم 12 إللي بيضع عراقيل أمام التحركات العمالية، فهو يشترط موافقة ثلثي النقابة علي الإضراب، وهذا لن يحدث طبعا!
>> لا ليس هناك عراقيل فهذا القانون تم وضعه بعد مناقشة استمرت أكثر من عشر سنوات في البرلمان وهدفه تحقيق الاستقرار والضوابط بين صاحب العمل والعامل، وبعدين أنا عايز أقولك مفاجأة وهي أن رجال الأعمال دلوقتي بيضغطوا علشان يبقي فيه تعديلات في القانون حتي يحصلوا علي مزيد من الامتيازات، وبحثا عن تحرر أكثر في هذه العلاقة، لكنني رفضت ذلك حفاظا علي البلد وحقوق العمال، ومتنساش إن القانون الجديد أقر علاوة 7% كل عام للعمال بعدما كانت 5% فقط.
علاوة
> إنت شايف إن علاوة الـ 7% دي تتمشي مع الارتفاع الجنوني للأسعار؟
>> أعترف إنها لا تتمشي، لكن أعمل إيه؟، قلتلك مفيش فلوس!، وأنا مقدرش أطالب دلوقتي بزيادة العلاوة!.
المعاش المبكر
> الشركة القابضة للغزل والنسيج تستعد حاليا لاستقبال 20 مليون يورو كأول دفعة ضمن 80 مليونا من الاتحاد الأوروبي وفي المقابل هو الاتحاد الأوروبي يشترط الإسراع في خصخصة كل شركات الغزل والنسيج وعرفت أن أول دفعة هتبقي لعمال المعاش المبكر إللي هيخرجوا السنة دي 2005.. هل ده معناه إننا هنشهد تخريج آلاف العمال خلال هذا العام علي المعاش المبكر؟
>> كويس إنك سألت هذا السؤال لأني عايز أقول إنه يؤسفني إن عندي تضخم من طلبات عمال في كل القطاعات من غزل ونسيج وحديد وصلب وخلافه عايزين يطلعوا معاش مبكر، لأني اكتشفت أن العمال بياخدوا الفلوس دي وبيصرفوها علي زواج أولادهم أو علي «الفنجرة» ومبيستثمروهاش، ولذلك فأنا لا يمكن أمشي في طريق المعاش المبكر للعامل، ولازم نعرف إن المعاش المبكر بالاختيار، وأنا كل يوم أحذر، ومفيش فايدة!!.
> يمكن العمال خايفين، وعايزين يلحقوا قرشين قبل شركاتهم متتباع وتبقي تبع القطاع الخاص، خاصة وهما شايفين زملائهم بيعانوا الأمرين مع المستثمرين؟
>> يمكن.
> يعني العمال مش حاسين بالأمان مع القطاع الخاص؟
>> إسأل العمال!
> أيوه إنت صوت العمال في مصر وأنا بسألك؟!
>> هو احنا يا ابني نطول القطاع العام دلوقتي وقوته بتاعة زمان، يا ريته يرجع تاني، بس للأسف إنت معندكش حد زي طلعت حرب (!!).
> إذن الفأس وقعت في الرأس وأصبحنا أمام أمر واقع كل شيء للبيع، وانت عندك عمالة مؤقتة وحقوق مجمدة للعمال مصيرها إيه بعد البيع؟
> الحقوق المجمدة العمال هياخدوها وبالقانون وبعدين مفيش عندنا فرق بين العمالة الدائمة والمؤقتة.
تنسيق
> وزير الاستثمار قال في مجلس الشعب إن فيه اتفاقات بينك وبينه للحفاظ علي حقوق العمال بعد الخصخصة ولم يشرح لنا التفاصيل.. ممكن تقولها لنا دلوقتي؟
>> طبعا ممكن.. إحنا اتفقنا أنا ووزير الاستثمار ووزير القوي العاملة إن لازم يكون التنظيم النقابي موجودًا معاهم في كل المراحل، وقلت لرئيس الوزراء قبل ما نقعد معاك كتنظيم نقابي، عايزين اللقاءات النوعية أولا مع الوزراء المعنيين مثل الصناعة والاستثمار والقوي العاملة لبحث مشاكل العمال وحلها والتنسيق مع النقابات في كل المواقع لمعرفة المشاكل عن قرب.
> أنت عندك عمال ملهومش نقابات خاصة في المدن الجديدة وبيحرمهم صاحب العمل من تشكيل نقاباتهم.
>> أيوه أنا قلت لك إن عضوية التنظيم النقابي اختيارية ومقدرشي ألزم أصحاب الأعمال، وأنا عايز أقولك حاجة أنا ممكن أشد الناس من هذه المصانع للانضمام للعضوية بعيدا عن صاحب العمل والنتيجة هتكون إن العمال ممكن تتفصل لأننا لم نصل حتي الآن للنضج الإنساني ولذلك أنا محتاج إلي رجل أعمال يخاف الله وده موجود في بعض الناس.
القانون الجديد
> طيب ليه قانون العمل الجديد محلش المشكلة دي؟
>> طب لو القانون 137 إللي موجود كان هيعمل إيه،وهضربلك مثل باللجنة الثلاثية واللجنة الخماسية، فالأولي ممثلة من نقابي واحد، وممثل صاحب العمل وموظف بالقوي العاملة، كان رأيها استشاريًا أما اللجنة الخماسية الجديدة فرأيها ملزم فهي تضم التنظيم النقابي ورجال القضاء وممثلي أصحاب الأعمال والقوي العاملة وبيحلوا مشاكل كثيرة.
> أنا معك.. لكن أصحاب الأعمال كانوا بيتغيبوا دائما عن حضور هذه اللجنة مما عطل كثيرًا من القضايا العمالية!
>> الكمال لله وحده، وبعدين أصحاب الأعمال دول إحنا بنسحبهم واحدة واحدة علشان نعرف نتفاهم لصالح البلد، وقلتلك دلوقتي هما مش عاجبهم كمان القانون الجديد وبيقولوا إنت عايز إضراب مطلق إحنا عايزين فصل مطلق.. لكن أنا أرفض ذلك تماما.
> فيه فعلا فصل مطلق زي ما حصل في مصنع السامولي بالمحلة وحصلوا علي أحكام لصالحهم ولم يعودوا حتي الآن!.
>> شوف فيه ضوابط وشروط للفصل وكله بالقانون.
مفيش بطلان
> فيه معلومات حول إنه هيتم تحويل النقابات المهنية إلي جمعيات أهلية؟
>> لا مفيش حاجة زي كده وده مش هيحصل.
> التنظيم النقابي قوي؟
>> جدا
> فيه أحكام من القضاء الإداري ببطلانه وإن الدورة النقابية الحالية 2001/2006 باطلة لأن فيه تدخلات حدثت في الانتخابات العمالية وتم استبعاد المرشحين المعارضين.. إيه رأيك في كلام القضاء؟
>> إحنا مستحيل نعيد الانتخابات وحكاية الأحكام دي محصلتشي.
> أيوه بس انت طلعت بيان بخصوص الموضوع ده بترد فيه علي الكلام إللي قالته اللجنة التنسيقية للدفاع عن حقوق العمال التي تضم كل قوي المعارضة وهي نشرت هذه الأحكام.
>> أنا بقولك مفيش أحكام نهائية دي مجرد أحكام ابتدائية وبعدين الانتخابات الجديدة في 2006 يبقي نعيد إيه؟، وبعدين أنا عايز عامل واحد يقولي أنا اتزور انتخاباتي، دا أنا عندي أقل لجنة نقابية 11 عضوا وخلي بالك شركة المحلة الكبري أو الحديد والصلب اترشح فيها 300 واحد للجنة النقابية بينجح 21، وبعدين فيه مشكلة هي إنه لو عضو نجح وأخوه سقط إللي سقط بيشتكي أخوه، طيب أنا أهتم بمشاكل العمال ولا أدور أجري في المحاكم؟!! وعايز أقولك إن عندي كل الأحزاب السياسية في التنظيم لكن إحنا هنا نقابيون فقط.
> انت ليه ضد التعددية النقابية، خايف من المنافسة؟
>> أمريكا إللي بتحرك الناس علشان التعددية النقابية معندهاش وانجلترا أم الديمقراطية مفيهاش تعددية نقابية، إنت بقي عايزني أقول تعددية علشان شوية أشخاص كل واحد فاتحله مكان يا عم عبدالوهاب متخلنيش أمشي في حارة سد!!.
العمال والفلاحين
> انت وكيل مجلس الشعب وممثل العمال في البرلمان وكل المؤشرات بتقول إن الدورة القادمة هيبقي معظم رجال البزنس في المجلس انت مش شايف إن ده فيه خطر علي العمال؟
>> شوف سأقاتل حتي تظل نسبة الـ 50% عمال وفلاحين في المجلس وطالما الرئيس مبارك هيظل في السلطة تأكد إن ده هيتحقق.
> الـ 50% دول يبقي معظمهم رجال أعمال وأساتذة في الجامعة ونقول إنهم عمال وفلاحون.. طيب إزاي؟
>> فيه شروط طبعا لممثلي هذه الفئة وبعدين كل ممثلي العمال في البرلمان لهم علاقة مباشرة بقضايا العمال وعايز أقول حاجة: ليس كل من هلل في المجلس يبقي برلماني ناجح، أنا مثلا متكلمتش في قانون العمل الموحد سوي 3 مرات ولكن دوري كان في اللجان الفرعية البالغ عددها 19 الآن وأنا أشرف علي 9 منها وكان لي دور كبير في لجنة القوي العاملة حول هذا القانون.
> يعني احنا مش هنشاهد زحف رجال الفكر الجديد أو «الليبراليون الجدد» علي الدورة القادمة؟
>> يا ابني الفكر الجديد إللي انت بتتكلم عنه كل شوية ده اللي بيقوده حسني مبارك واللي يقول غير كده يبقي مش فاهم حاجة ومفيش زحف ولا حاجة إحنا عندنا انتخابات وقضاء وناس بتروح تنتخب.
> طيب المجلس في المرحلة المقبلة هيشهد أي تعديلات أو إصدار تشريعات جديدة تخص النقابات العمالية.
>> لا مفيش.
> يعني مش ممكن يكون فيه نية مثلا إن انتخابات النقابات العمالية القادمة يشرف عليها القضاء؟
>> أنا بحلم بكده.
محتاجون لإدارة
> طيب انت شايف مصر محتاجه إيه في المرحلة إللي جاية علشان ينصلح حالنا؟
>> إحنا مشكلتنا في الإدارة لأنها فشلت في القطاع العام ودلوقتي في القطاع الخاص أيضا إحنا بنشوف شركات بتفلس وتغلق، فأنا نفسي يبقي فيه خطة للبحث عن إدارة قوية وأن تكون مصرية.. مصرية.. مصرية وأقولها ثلاث مرات ثم عربية، عربية، ولو غُلب حمارنا تبقي غربية ولكن في النهاية لابد أن يكون للدولة دور قوي، ولو كان عندك حل قولهولي.
نقابات العرب
> مبروك يا ريس علي انتخابك رئيسًا للاتحاد الدولي لنقابات العمال العرب، إيه أخبار النقابات العربية الآن؟
>> أولا الله يبارك فيك، عايز أقول إن فيه تدخلات خارجية لتفكيك نقابات عمال العرب لكن إحنا لها بالمرصاد وبنحاول دلوقتي تطوير العلاقات بين تلك النقابات وتبادل الخبرات ولم الشمل النقابي ومساعدة الأخوة في العراق المحتل لأنهم منقسمون دلوقتي والاحتلال هو المستفيد، أما في فلسطين فالاتحاد قوي وفعال ومن خلال موقعي أدعو كل العمال لمقاطعة العدو حتي تتحرر أراضينا من الاستعمار.
رجل الحكومة
> أخيرا يا حاج سيد بيقولوا عليك إنك رجل الحكومة في مجلس الشعب والاتحاد.. ده صحيح؟
>> قالوا الكلام ده كتير والرئيس مبارك عارف كده، بس أنا أؤكد إن أنا مش زي ناس بتتحرك زي الأراجوز، أنا رجل حر، ومفيش حد بيحركني، لكن فيه علاقة حب بيني وبين كل الناس خاصة في الحكومة والرئيس مبارك وفيه حوار، وده كله علشان مصلحة الناس والعمال ودي سياسة الاتحاد العام لنقابات عمال مصر دلوقتي.
> إذا أقول لك شكرا علي هذه الصراحة.
>> عفوا.
#عبدالوهاب_خضر (هاشتاغ)
كيف تدعم-ين الحوار المتمدن واليسار والعلمانية
على الانترنت؟
رأيكم مهم للجميع
- شارك في الحوار
والتعليق على الموضوع
للاطلاع وإضافة
التعليقات من خلال
الموقع نرجو النقر
على - تعليقات الحوار
المتمدن -
|
|
|
نسخة قابلة للطباعة
|
ارسل هذا الموضوع الى صديق
|
حفظ - ورد
|
حفظ
|
بحث
|
إضافة إلى المفضلة
|
للاتصال بالكاتب-ة
عدد الموضوعات المقروءة في الموقع الى الان : 4,294,967,295
|
-
حكومة مصر تفرط فى الامن القومى
-
مصر تمنح إسرائيل مركزا إحتكاريا فى المنطقة العربية بــــ- ال
...
-
أيام الغضب العمالى فى مصر
-
كيف إنتصر عمال شركة طرة الاسمنت على الحكومة المصرية ؟؟
-
من يشعل الفتنة الطائفية فى مصر ؟
-
دردشة مع العامل طه سعد عثمان قبل الرحيل الكبير
-
مؤتمر شرم الشيخ الدولى يخدم المصالح الامريكية .
-
عمال مصر يواصلون الانتصار على الأمن والادارة والحكومة
-
المناخ العام لاحتجاجات عمال مصر : الجو الاجتماعى ملوث والقوا
...
-
حوار مع أفقر رجل فى مصر .
-
نص حوار محافظ القاهرة مع جريدة - الاهالى - المصرية .
-
المعارضة المصرية تقرر اللجوء إلي الشعب
-
الحزب العاكم
-
مرحبا حتى بجمال مبارك رئيسا لمصر .
-
نص حوار الشاعر العراقى سعدى يوسف مع جريدة - الاهالى - فى مصر
-
الحزب الحاكم
-
مظاهرة تطالب بإنقاذ الأسري الفلسطينيين في سجون الاحتلال
-
حكايات مثيرة عن المعونة الامريكة لمصر .
-
كيف تتخلص مصر من الفساد ؟
-
النص الكامل لوثيقة المعارضة المصرية الممنوعة من النشر
المزيد.....
-
??مباشر: مفاوضات جديدة لوقف إطلاق النار في غزة واستمرار المخ
...
-
استقالة رئيسة جامعة كولومبيا الأمريكية على خلفية تعاملها مع
...
-
شهيدان وعدة جرحى في قصف إسرائيلي على مخيم بلاطة شرقي نابلس
-
-تحول استراتيجي- في علاقة روسيا والصين.. ماذا وراء التدريبات
...
-
أكسيوس: ترامب تحدث مع نتانياهو عن الرهائن ووقف إطلاق النار
-
قراصنة إيرانيون يستهدفون حملتي هاريس وترامب
-
نعمت شفيق تعلن استقالتها من رئاسة جامعة كولومبيا بعد أشهر من
...
-
استقالة نعمت شفيق من رئاسة جامعة كولومبيا على خلفية احتجاجات
...
-
رئيسة جامعة كولومبيا تستقيل بعد أشهر من الاحتجاجات الطلابية
...
-
بايدن مازحا خلال لقاء في البيت الأبيض: -أنا أبحث عن وظيفة-
المزيد.....
-
قراءة في كتاب (ملاحظات حول المقاومة) لچومسكي
/ محمد الأزرقي
-
حوار مع (بينيلوبي روزمونت)ريبيكا زوراش.
/ عبدالرؤوف بطيخ
-
رزكار عقراوي في حوار مفتوح مع القارئات والقراء حول: أبرز الأ
...
/ رزكار عقراوي
-
ملف لهفة مداد تورق بين جنباته شعرًا مع الشاعر مكي النزال - ث
...
/ فاطمة الفلاحي
-
كيف نفهم الصّراع في العالم العربيّ؟.. الباحث مجدي عبد الهادي
...
/ مجدى عبد الهادى
-
حوار مع ميشال سير
/ الحسن علاج
-
حسقيل قوجمان في حوار مفتوح مع القارئات والقراء حول: يهود الع
...
/ حسقيل قوجمان
-
المقدس متولي : مقامة أدبية
/ ماجد هاشم كيلاني
-
«صفقة القرن» حل أميركي وإقليمي لتصفية القضية والحقوق الوطنية
...
/ نايف حواتمة
-
الجماهير العربية تبحث عن بطل ديمقراطي
/ جلبير الأشقر
المزيد.....
|