بقية تاريخ مصر ... بين الله يرحم أيام جمال عبد الناصر ... و بين طظ في مصر

أسعد أسعد

الحوار المتمدن-العدد: 3620 - 2012 / 1 / 27 - 01:23
المحور: اليسار , الديمقراطية والعلمانية في مصر والسودان
    

قال عم الشيخ في وصفه لإنجازات ثورة يوليو العظيمه :
"ثورة 23 يوليو أفرزت (الف مصنع) في اقل من خمس سنوات و بنت السد العالي و اممت قناة السويس ووزعت الأراضي علي الفلاحين و علمت الملايين (ببلاش) من الأول الإبتدائي و حتي الجامعة ... ثورة كانت شوارع مصر انظف من الطبق الصيني و ليس فيها تلال و اهرامات من الزباله كما هو الحال الآن ... و كانت كل العائلات المصرية علي مختلف مستوياتها الإقتصادية تأكل اللحمه يوميا و تتفسح في الإسكندريه و رأس البر بأرش ساغ ... ثورة جعلت من المواطن المصري سيد الغرب و كانت الأمة العربية من محيطها إلي خليجها تنتظر خطابات عبد الناصر علي احر من الجمر و لا تدير مؤشر المذياع او التلفزيون علي اذاعة نانسي عجرم كلما اعلن ان سيادة الرئيس سيلقي خطابا كما حدث و يحدث هذه الأيام ..."
و تعال يا عم الشيخ نشوف كل حاجه من الإنجازات العظيمه دي و نشوف هل هي صحيح إنجازات و الا كارثه ...
قبل كل شئ يا عم الشيخ ... يا راجل يا عجوز ... هل توافق معي إن مصر الآن في شكلها الحالي هي حصاد ما زرعته حركة الإنقلاب العسكري بتاعة جمال عبد الناصر ... أهم إنجازاته هزائم 56 إللي خلصنا منها أيزنهاور رئيس أمريكا و وزير خارجيته جون فوستر دالاس ... و عبد الناصر فهمنا إن خروشوف هو إللي هدد أمريكا بالقنبله الذريه ... و شرب شعبنا المصري الطيب نفسين الحشيش دول و إنسطل ... و 67 الجيش كله في سينا علي بعد خطوتين من تل أبيب و الريس نايم و الطيران نايم و الردار نايم و قادة الجيش سهرانين مع الرقاصات .. و الباقي إنت عارفه و أنا شرحته قبل كده ... و من نفس المنطلق هزيمة 73 التي خلصتنا منها أمريكا ... نيكسون و معاه وزير خارجيته اليهودي هنري كيسنجر ... حتي لا تسحق إسرائيل جيشنا الثالث المحاصر داخل السويس بينما موشي ديان الأعور و جولدا مائير و شارون بطل العبور الإسرائيلي إللي عبر قناة السويس من الغرب إلي الشرق ...التلاته يبرطعوا و يصولوا و يجولوا و يتصوروا يالفيديو علي جبل عتاقه داخل الأراضي المصريه ... إحنا عبرنا القناة ... و إسرائيل كمان عبرت القناه ... إحنا رحنا الشرق و إسرائيل جت الغرب ... و دخلت أراضينا علي بعد 100 كيلو من قاهرة المعز ... العالم كله بيضحك علينا و إحنا بنفتخر بإنتصارنا العظيم في 73 ... أولادي في مدارس أمريكا بيدرسوا إزاي إسرائيل إنتصرت علي مصر في 73 و ضحكوا عليا و أنا باحاول أقنعهم إزاي إحنا عملنا عمل عظيم و عدينا القناة ...و رفعنا العلم .... و إيه يعني يا بابا إسرائيل رفعت علمها علي جبل عتاقه جوه الأراضي المصريه ... و تعال نبتدي إنجازات ثورة يوليو العظيمه زي ما إنت بتترحم عليها في كلامك ...
ألف مصنع في أقل من خمس سنوات .... فين دراسة الجدوي و تسويق المنتجات و منين ها نجيب الماده الخام ... و من أين أتينا بالأجهزة الإدارية لهذه المصانع من محاسبين و محامين و مديرين و من أين العماله الفنيه ... و هل إستوردنا الماكينات و منين و الا صنعناها بنفسنا ... إذا قلنا إن التكلفه المتوسطه للمصنع الواحد عشره مليون جنيه بس ...رقم متواضع جدا ... يعني الألف مصنع كلفت الدوله ... عشره مليار جنيه ... طبعا دي كلها مصانع حكومه مش قطاع خاص ... جاب منين عبد الناصر الفلوس دي ... دي الصين في نهضتها ما عملتش ألف مصنع في خمس سنين الصين قامت علي الورش الصغيره في البيوت مش المصانع الكبيره بتاعة جعجعة الثورة و الناصريه... ثم إلي ماذا إنتهت هذه المصانع الآن ... و علي أي أرض أنشئت ... طبعا علي الأرض الزراعيه ... و العماله مجرد بطاله مقنعه ... و هيئة إدارة كل مصنع مجموعه من خريجي الكليه الحربيه .. ضباط يعني يا عم الشيخ ... و الميه اللي لازمه للمصانع دي جت منين ... و الصرف بتاعها بمخلفاته و بلاويه راح فين ... و الكهربا جت منين ... ثم إن مصر كانت العماله كلها في ذلك الوقت فلاحين ... جبنا منين علي الأقل نص مليون عامل ... ميت ألف عامل فني كل سنه ....خرجناهم منين ... فين المدارس و معاهد التدريب الفنيه ...
السد العالي ... كارثة كوارث مصر علي المدي الطويل ... حل قصير المدي جدا تتلاشي فوائده و تظهر عيوبه أمام أعيننا و نعاني منها بمضي الزمن ... فلسفة عبد الناصر في بناء السد العالي ... حمايه مصر من الفيضان ... توليد الطاقه الكهربائيه ... تحويل نظام الري إلي الري الدائم .... عارف عبد الناصر عمل إيه يا عم الشيخ ... النيل بيغرق مصر كل سنه ... راح سيادة البكباشي دبح النيل ... المشكله كانت إزاي تعرف تسيطر علي مجري النهر و مواسم فيضانه ... الموضوع كان يحتاج لدراسه مستفيضه من البيئه و الهيدرولوجي و غيرها من علوم إستعمال المياة و إستغلال الثروة المائية ... من أول منابع النهر لغاية مصبه في البحر المتوسط ...و لعلمك يا عم الشيخ السد العالي كان أحد الحلول المطروحه قبل 52 و رفضته الحكومه و بيوت الخبرة المصرية و العالمية مرات عديده بسبب الخوف من غرق الدلتا تحت مياه البحر الأبيض ... و ده إللي بيحصل الآن ... عارف ليه الأمريكان ما رضيوش يمولوا المشروع يا عم الشيخ ... علشان مش عايزينا ننهض و مش بيحبوا الخير لمصر .... سيبك من كلام الجعجعه ده ... الأمريكان رفضوا لأن المشروع مش مدروس كفايه و التخطيط غير متكامل ... ده السبب الحقيقي اللي البنك الدولي رفض التمويل بسببه... عبد الناصر قالك لسه ها ندرس و ها نخطط ... و راح علي الروس اللي لا بيدرسوا و لا بيخططوا .... أمريكا فرحت و قالت خليه يديهم شويه فلوس علشان ياكلوا بدل يرموا بلاويهم علينا .... و قلنا هانبني و أدي إحنا بنينا السد العالي ... و غرقت النوبه ... و إتحجز طمي النيل ورا السد بعد آلاف السنين من الفيضانات ... و باظت الأرض الزراعيه و إستعملنا السماد الكيماوي لأن مافيش طمي ... و باظت و إنخفضت جودة القطن المصري... و باظت المصارف ... و إرتفع منسوب المياه الجوفيه في كل مصر ... و شوية الكهربا اللي طالعه منه يادوبك بتكفي أسوان ... السد العالي مجرد مشروع هندسي إنشائي ضخم ... لكن الفائدة منه بالنسبه للبلاوي اللي سببها ... مش جايبه تمنها
تأميم قناة السويس ... عقد شركة قناة السويس كان 99 سنه كان فاضل عليه تسع سنين و تؤول القناة لمصر ... الإنجليز خرجوا ... البلد كلها تحت سيطرتنا بما فيها القناة ... و فاضل لنا تسع سنين علي ملكية القناة ... ضربه كانت من معلم خلي الإستعمار يبلم ... و إندفعت إسرائيل و بريطانيا و فرنسا ضد إرادة أمريكا ... أمريكا خططت إنها تاخد فلوس القناة و تديها لروسيا الجعانه ... إيزنهاور شخط فيهم ... إرجع ياواد إنت و هوه ... و لما إتأكد خروشوف من إن اللعبه إستوت و إن كل شئ تحت سيطرة أمريكا .. راح مزعق من موسكو و قال إذا ما رجعتوش ها أضربكم بالقنابل الذريه .... تصور التهريج يا عم الشيخ ... و عبد الناصر باعنا لروسيا و مرمغنا في الفقر ...
توزيع الأراضي علي الفلاحين ... نهب الأرض من أصحابها ... و وزع خمس فدادين علي الفلاحين يعني حرامي شريف ... زي آرسين لوبين ... تصفيق حاد و هتاف متواصل و هو ده إللي كان عايزه عبد الناصر ...كل اللي يهمه من الفلاحين الغلابه إيديهم و تصفيقهم ... و غنت فرقة رضا و رقصت فريده فهمي .. فدادين خمسه .. خمس فدادين ... و تفككت الأرض و الزمامات الزراعية و فرضت الحكومة علي الفلاحين التعامل مع بنك التسليف الزراعي ... فصار الفلاح مالك الأرض عبدا عند حكومة الثورة بعد أن كان أجيرا عند الإقطاعي ... و النتيجه كل فلاح عنده بالمتوسط خمس أولاد فورث كل واحد منهم فدان علي عهد أنور السادات ... و كل واحد من هؤلاء الأولاد الخمسه عنده خمس أولاد فورث كل واحد منهم خُمس فدان علي عهد مبارك ... و كل واحد بني لنفسه بيت علي الأرض بتاعته و بذلك تم بناء سته و عشرين بيت علي كل خمس فدادين ... الأدهي من ذلك إن بنك التسليف الزراعي فرض علي الفلاح أسعار التقاوي (البذور) و أسعار السماد ثم أسعار شراء المحصول حيث تم حظر بيعه في السوق ... في أحد المواقف بعد دورة زراعيه ذهب أحد الفلاحين بعد أن ورد المحصول لشونة البنك فذهب ليتسلم حسابه (فرق ثمن المحصول مخصوما منه ثمن البذور و السماد) فقال له الموظف معاك خمسه تعريفه فكه ففرح الفلاح لأنه سيقبض جنيهات مجمده و لما أعطي الفكه للموظف قال له الموظف ... كده يبقي حسابك خالص ... مع السلامه ... خرج الفلاح مذهولا و خلع حذائه و سار في طريقه وهو يضرب رأسه بحذائه و هو يقول ربنايخليك يا عبد لناصر ..ر.بنا يخليك ياعبد الناصر (القصة موثقة من مصدر موثوق ... ضابط سابق في القوات المسلحة المصرية)
تعليم الملايين ببلاش ...صحيح مصاريف الجامعه علي أيامي كانت 375 قرش في السنه لكن غلاء المعيشه بلغ عنان السماء و كان كل كتاب في الجامعه ثمنه جنيه أو إتنين (عشرين أو تلاتين جنيه بسعر اليوم) ... زائد إن الجامعات في العواصم و 70 في المايه من الطلبه يعيشون بعيد عن أهاليهم يلزمهم أكل و شرب و لبس و مواصلات و سكن و نثريات ... موظف دخله تلاتين جنيه لازم يبعت منهم عشره جنيه لإبنه في الجامعه علشان يسكن و ياكل طقه واحده فول و طعميه ... و يشتري كتب و خلافه إذا كان في كليه عمليه زي الهندسه مثلا ... التعليم ببلاش لكن الحياة و مصاريفها فوق الطاقه للي عايز يتعلم ببلاش يا عم الشيخ ... إحنا هنا في أمريكا الطلبه اللي جايين من البلاد العربيه زمايلهم الأمريكان بيساعدوهم ... في مصر كان الطلبه العرب بيضحكوا علينا و علي هدومنا إللي ما بنغيرهاش في عهد عبد الناصر يا عم الشيخ ... و لما وصلنا بالتعليم لعهد مبارك 30 سنه و الشباب المتعلمين ببلاش صايعين مش لاقيين شغل ... أطباء و محامين و مهندسين إللي إتعلموا ببلاش شغالين جرسونات أو سواقين تاكسي ... و ألوف عاطلين صايعين في الشوارع ... و أبو بلاش كتر منه .. و هبط مستوي التعليم حتي إن أكبر 500 جامعه في العالم ليس بينهم جامعه مصريه واحده ...من أبو بلاش يا عم الشيخ ...
شوارع مصر أنظف من الطبق الصيني و ليس فيها تلال و أهرامات من الزباله كما هو الحال الآن ... طبعا تقصد شوارع وسط البلد ... شارع شريف و شارع سليمان و شارع قصر النيل و شارع فؤاد ... لكن الحسين و السيده و الغوريه و حواري شبرا و حواري الضاهر و حواري الفجاله و السكاكيني و السبتيه ... و ماخفي كان أعظم ... يا عم الشيخ إنت بتنزل مصر ضيف ... أحسن فنادق أحسن شوارع ... أحسن مطاعم .... و الكلام ده يا دوبك كام سنه ... قول تلاته أربعه بعد ثورة عبد الناصر المجيده ... و بعدين معاك يا عم الشيخ ... مازرتش عزبه القرود ... علي خط المترو ... الناحية التانيه من محطة غمرا ... قبل الثورة زي بعد الثوره ... زي دلوقت ... لا صيني و لا غسيله ... هي دي العاصمه ... هي دي مصر ... مش شوارع وسط البلد
المواطن المصري سيد العرب .... صدقني من المحيط للخليج لو العرب طالوك بسبب العباره الكبيره قوي دي ... ها ياكلوك حي يا عم الشيخ ... المواطن المصري رايح يسترزق في بلاد أسياده العرب شغال خدام في المملكه و في الإماره ... الطبيب و المدرس بيتجلدوا في شوارع المملكه ... أقل مرتب من اقل هندي أو بنجلاديشي ... طوابير المهندسين و الأطباء و العلماء واقفين قدام السفارات العربيه في مصر علشان مش لاقيين شغل في مصر ... ده في الغربه ...أما العرب إللي في مصر كلابهم بتنهش المصريين في الفنادق... و بيدهسوا المصريين بعربياتهم في الشوارع و بيضربوا ضباط بوليس مصر في الشوارع بالجزمه ... ما بتقراش جرايد مصر و الا إيه يا عم الشيخ .... إرحمني ... إرحم ...
النهارده الشباب في التحرير بقي لهم سنه ... بينضربو و بيموتو ... بقي لنا سنه بنمسح كذب ستين سنه و لسه مش قادرين ... المهم إننا نعرف نمسحه و نعرف قبل ما نمسح ... إحنا عاوزين نبني إيه و ها نبنيه إزاي ... لأن لو مسحنا و ماعرفناش نبني ... ها تبقي أكبر كارثه في تاريخ الإنسانيه كلها ... مصر ها تبقي أرض بور و اللي عاوز حته ها يخش ياخدها ... و مش ها يلاقي حد يقول له لأ أو إنت بتعمل إيه ... لأن نصنا في الجامع بيصلي عشان ربنا يكتب له حسنات و يدخله الجنه ... و نصنا في الكنيسه بيصلي إنه يكون ليه نصيب مع الشهدا و القديسين ... و نص اللي في الجامع ساب الصلاه و راح يقتل إللي في الكنيسه علشان اللي في الجامع يعرف يصلي كويس ... و أمريكا بتقول صلوا يا مصريين علشان ربنا ياخدكو إنتو الإتنين و الراباي شمعون بيقول لك شالوم عليخم يا عم الشيخ ...

#أسعد_أسعد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات