الما عدهم عشيرة .. والسبعين ديك

كامل الجباري

الحوار المتمدن-العدد: 3597 - 2012 / 1 / 4 - 15:27
المحور: كتابات ساخرة
    

قبل .. ابزمن الدكتاتوريه جان عدنه رمز واحد اوحد , ماله مثيل , العراق كله يروح اله فدوه .. اذا خطب بالتلفزيون كون تكعد مثل الصنم .. ما تلفت لا يمنه ولا يسره ولا ترمش . واذا تورطت وسويته يصير يومك ويوم الخلفوك اسود .. ماعلينه راح الدكتاتورواجتنه الديمقراطية والفدرالية .. كلنه ايه خلصنه من الرمز وطلايبه.اشو جماعة الفيدرالية والديمقراطية ما اطونه مفك بس يتناكرون من اجو واليومك وبعد ما طلعو الامريكان وهي علكت.. كلساع واحد متناوشله واحد ومطلعه منعول صفحة من الاصل .. موبس هاي المشكلةلكن كل ما ينجاب طاري واحد يطلعنه رمز .. رموزنه صارت هواية وانواع .. طائفي .. وطني وهلم جرا .. رموزنا هاي كلها عدها ظهر وعشيرة واقل شي تكب علينه عشيرته وتعيط وتهدد بالويل والثبور كول وفعل .. يابه انتو موكلت المسؤول صار موظف وكت ما يعجبنه نشيله ..هم ردينه علرموز .. هاي الخبيصة ذكرتني بسالفة ابو ضاوي الف رحمه عله روحه كال ..اكو فد واحد جان عنده ديج اكشر صوته تكول هورن مال باخرة .. هذه الديج ما يصدك صار نص الليل وشغل الاسطوانه .. عيعيعيعو وللفجر .. الجيران طكت رواحهم وراحو لابو الديج .. مولانه ديجك نعل سلفه سلفانه .. بيعه واحنه نشتري بيش ماجان .. جاوبهم اخذو نصيحتي وعوفو الديج .. ماقبلو الجماعة .. كالهم اليوم الديج عشاكم . الجماعة بعد ماضربو العشه وتعللو .. نامو . نص الليل وهي علكت وسبعين ديج واحد يستلم من الثاني وللفجر .. الجماعة راحو لبو الديج وكالو : عمي ديج واحد وما تحملينه ادور سبعين ديج .. جاوبهم مو نصحتكم ماخذتو النصيحه خو ماذبح سبعين ديج .. واحد من الجماعة طك له حسرة وكال : لا والحظ المصخم ديج واحد وما كدرناله .. شراح يدبرها وي سبعين ديج .. اودعناكم

#كامل_الجباري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات