نزيف الكرامة

حامد كعيد الجبوري

الحوار المتمدن-العدد: 3565 - 2011 / 12 / 3 - 16:39
المحور: الادب والفن
    

التاريخ أعله بابك منذهل حيران
أبيا صفحة إباء أيسطر أحروفه
وكف خاشع جلاله وإنحنالك راس
مدرستك فتحها وغلّك أصفوفه
أبدمائك خضب التاريخ للتاريخ
وبنالك كعبتك كل ثائر ايطوفه
( فداء لمثواك ) رتل مفخرة أجيال
ودموع المجد صفحاته مذروفه
دمعات النصر مو دمعة المهزوم
ولا معذور يختل حجِّته ظروفه
مدرستك رجوله وأنجبت أبطال
ثائر عكب ثائر يقره بطفوفه
رسم دربك (محمد) للزمن قنديل
كل كطرة شرف للدين ملهوفه
نبراسك (علي) جيد الزمن يلويه
وتسجدله الركاب أتهاب مرهوفه
رفّت رايتك من كبّرت لله
وخلدت (كربلاء) وخلّد أضيوفه
نزف دم الكرامة وقدمت قربان
طعمت الدين أهلك وأرتوى الجوفه
أنت (حسين) غيرك ما يصير (حسين)
ولا كبلك وبعدك معتني أحتوفه
نعم نهضت رجال أتلذذت بالموت
وركبوها الصعاب أبنيه مكشوفه
لو موقف أمكرر ما خلد ذكراك
ولا يندب الكون وشمسه مكسوفه
أسست الشهادة التضحية الإيثار
وعلّمت اليثور أيقدس سيوفه
مو قصة عطش ونعاتب النهران
ونلوم الفرات الما أجه زحوفه
شحيح (العلكمي) الما ضاك شفة (حسين)
لو واصل إشفافه خلدت أجروفه
****
من بحر الوفاء أشياخذ التاريخ
ويروّي للزمان أصدقها سالوفه
أبن (زينب) وأخوها ونخوة (الكرار)
وعصّابة (الحره) أبغيره ملفوفه
نزل ساحة مجد و(أم البنين) عيون
تشوف المرجله ويشرِّف الحوفه
مشه بيهم منيه وللمنايا أسرار
تمشي أبلا وجل بعيون مكفوفه
عاليها كلبها واليسار يمين
وجتاف النهر بجدامه منسوفه
أبجود (الجود) من نهر (الكمر) مليان
من صدر الأخوه وتحضنه أجفوفه
عطشان وكلب ( عباس ) يمطر طيب
مملي أبغيرته ومن زود معروفه
وصل لو ما وصل يحجيلك التاريخ
رغما جابه زندَه وطشَّر أصفوفه
ولا يحجي أبحرم و أعيال عطشانيين
ولا أطفال شردت بالفزع خوفه
ولا جثة صحابه أترض صدرها الخيل
بوحشية (الوحشي) وتقرع دفوفه
ولا النيران تحرك بالخيم وكلوب
ولا الحرات آسارى أمقيده مجتوفه
معسكر للرذيله وباللؤم مزروع
وأحقاد وضغينه وسيره موصوفه
سنوا للذبح والأسر والتمثيل
وتسليب وغدر وأخلاق محروفه
خناجر جاهلية والغدر مألوف
بس تذبح طفل ما عدها مألوفه
*****
خشوع الهيبتج تسموا القصايد شوك
بصدرج أنبياء الله محفوفه
أقارن وكفتج ويّه الرسُل وأحتار
رسالية الموقف نقرَه ونشوفه
نهضتي بالحمل مثل أنبياء الله
وموقف كربلاء أقدسها معزوفه
محد شاف دمعج يجذب البجاج
وكلبج ما تصدع عزمج يروفه
من خطبت أسيوفج نكست الرايات
أبديوان (الخلافه) ومسجد (الكوفه)
*******

#حامد_كعيد_الجبوري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات