.. فى المقاومة.. كتبتها واحدة طهقانة من العرب شعوب وحكام

غادة عبد المنعم
مفكرة

الحوار المتمدن-العدد: 3406 - 2011 / 6 / 24 - 15:54
المحور: كتابات ساخرة
    

نكت.. كتبتها واحدة طهقانة من العرب شعوب وحكام


o بيقولو الجمعة الجاية جمعة الثورة الثانية
الجمعة الجاية جمعة الغضب
الجمعة الجاية جمعة الرحيل
هو فيه إيه حد يبعت تلغراف للمشير يبلغه أن الرحيل وخلاص؟؟؟؟


o واحد بيسأل هو فى إيه مقار الأمم المتحدة زحمة اليومين دول؟
الثانى رد أصلها بقالها ييجى 100 ولا 200 سنة مشتغلتش واليومين مضطرين يطلعوا قرارات؟


o الأسد موتله ييجى نص سوريا قتل.. قتل
الأمم المتحدة أدانت وتوعدت
تركيا فتحت حدودها للنص التانى
وابن الـ كان قاعد فى القصر الجمهورى، يفكر: يا ترى لو عرفت اطلع الفلوس بره سوريا أطلعها ازاى ؟


o مصر قامت فى مظاهرات وأمريكا أيدت مصر لان عندها حق
ليبيا عملت ثورة وأمريكا وقفت جنبها لان لازم تقف جنبها
سوريا شغالة نضال وأمريكا شغالة اعتراض على سفالة الأسد
ياترى لو السعوديين تمردوا أمريكا حتعمل إيه؟


o تفتكر هو الحلفاء ليه مضربوش القذافى من أول يوم
رد عليه قاله بالعقل كده، أكيد راحوا ليبيا وهو بره.


o اليمنيين يعتوا يطلبوا استشارة الأمم المتحدة يعملوا إيه؟
يفضلوا فى الميدان
يطلعوا على نائب الرئيس يموتوه ولا يعملوا إيه؟
الأمم المتحدة من زهقها ردت عليهم بالعربى قالت: وحياة أمك منك له؟
هم المصريين مشوا مبارك فى كام يوم؟


o قال لك الجيش صمام الآمان لمصر
رد عليه قاله: المصيبة أن الجيش كله طالع دين أمه تحت الشمس فى الصحرا والمجلس هنا بدون صمام فاتح ماسورة الشفط ع البلد

o قال لك إلا هم ليه معرفوش لحد دلوقت يلقطوا ولا واحد من امن الدولة ويحبسوه؟
رد عليه اللى بيكلمه: ما أنت عارف امن الدولة كلاب ومينفعش تلقط كلب بملقاط؟


o يسارى واخوانى ع طول خناق، لا يمكن يتفقوا على حاجة أبدا، الاثنين اتفقوا إن غادة عبد المنعم والأشكال اللى زيها دى لا يمكن.. لا يمكن حد فيهم يبقى وزير؟
ليه؟
أصل اللى ماسكين البلد لا يمكن.. لا يمكن حد فيهم يفكر يعمل تنمية؟


o واحد ع نياته فرحان بالثورة بيسأل إلا امتى القوى الوطنية حتعمل خطة وتظبط مصر؟
رد عليه واحد ثورجى لا هم ناويين كل واحد يقدم فكرة
مستنيين إيه؟
كل واحد فيهم تجيله فكرة بس؟


o واحد معجب بشرف قال أهم حاجة فى د عصام شرف
انه بيسمع جميع الآراء
انه بيناقش جميع الآراء
رد عليه اللى جنبه: أيوه وكمان انه لا يمكن ينفذ أى حاجة قال عليها.


o واحد بيقول أكيد عنان حييجى رئيس جمهورية؟
اشمعنى؟
ما هى مفهومة تفتكر حيمشوا م الحكم قبل ما طنطاوى يكون مات ييجى بثلاثين سنة؟


o فى واحد مختروهوش ضمن مستشارين رئيس الوزرا؟
اشمعنى؟
أصلهم مخدوش ولا واحد من القايمة الجديدة؟
ليه؟
يا راجل هو كان فى قايمه جديدة أصلا؟


o قال لك عصام شرف لا يمكن ييجى رئيس جمهورية؟
ليه؟
تفتكر الجيش ممكن يسيب البلد؟


o واحد صحفى عقر قال لواحد زيه: أنا متأكد إنهم حيبعتوا العشر إشاعات الأخيرة من الثلاثين اللى ببروجهم الأمن الوطنى لعادل حمودة ينشرهم فى الفجر؟
رد عليه التانى وليه العشرة دول بس؟
قال له: أصل العشرين الاولانيين نشرهم امبارح


o واحد بيسأل: تفتكر عنان ليه مرضاش يمسك مصر؟
ليه؟
الله؟ ما هو ماسكها دلوقت


o بيقول لك دول حوض النيل اتفقوا يمنعوا الميه عن مصر، النيل نشف بقى ربعه
الجيش قرر ينزل كل العساكر من الوحدات يدقوا مواسير فى العمق تحت الميه عشان الميه تطلع للبيوت
عصام شرف قرر يقسم مراحل الاتفاق المرتقب مع دول حوض النيل على خطة عاجلة تستغرق خمسين عام
الشعب لم بعضه وطلع على دول الحوض هد السدود وسلم ع الناس هناك وباس على دماغهم ورجع.


o واحد بيسأل إلا لو عنان مسك البلد حيهتم بالإصلاح؟
رد عليه التانى: أمال حيقوله ييجى 100 بيان عن الإصلاح؟


o واحد مثقف سياسى بيقول لزميله أهم حاجة الدستور يطلع قبل الانتخابات؟
رد عليه التانى: وبعدين؟
قاله: مفهومة دى حنخالفه على طول!!


o واحد قرفان لان مرتبه خلص والشهر ف أوله بيقول لزميله: هو أحنا فى مصر عملنا ليه ثورة؟
رد التانى: أمال كنا حنعمل إيه؟
أى حاجة مفيدة، يا راجل!!


o قال لك : المصريين لا يمكن يتنازلوا عن محاكمة مبارك؟
المصريين لا يمكن يتنازلوا عن محاكمة رجال أعمال فسدة مستغلين؟
المصريين لا يمكن يتنازلوا عن محاكمة أفراد استغلوا مناصبهم؟
المشكلة أن طنطاوى قاعد بيفكر يحاكمهم واحد ..واحد،
ع الله الدور يوصل ع المجلس ييجى بعد عشرين سنة
ولا مرة واحدة بس يسيب قرار إحالتهم للمحاكمة ف الوصية


o قاللك الجيش تعهد لازم ينفذ رغبات الشعب
والشعب مصمم يبنى يغير ويطور مصر بايده
جيش وشعب مصر ايد واحدة
رد عليه قاله: والله.. طب قابلنى لو الجيش فلت ايد الشعب.


o قاله العالم كله بيأيد شعب سوريا
الأمم المتحدة نددت بقوة أما بشار طلق الجيش ع الشعب وتركيا فتحت حدودها
رد التانى: وباقى الدول؟
قاله: وأنا إيه اشعرفنى؟ أنا سمعتها كده!!


o قاللك كل يوم الأمم المتحدة تطلع قرار تطالب بشار بالكف عن إبادة شعبه
كل يوم دولة تطلع قرار تدين إبادة بشار لشعبه؟
سأله اللى جنبه: إلا قول لى هى البلاد العربية تعتبر دول؟

#غادة_عبد_المنعم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات