نص تجليبه ( شعر بالعامّيه العراقيه)

فاهم إيدام

الحوار المتمدن-العدد: 3385 - 2011 / 6 / 3 - 09:00
المحور: الادب والفن
    

(تُقرأ هذه القصيدة بلهجة أرياف وسط وجنوب العراق)

نصْ تَجْليبه


أجلبنّك يليلي بطور تجليبه
وينام، وماحَلمْ، ويْكَول مَدريْ بَهْ.

*

أجلبنّك يليلي والكَلب بيْ شوجْ *
جنْ حايج ألمْ بعْضاي كلهَه يحوجْ،
والبطران بس بيّه صفالهْ يلوجْ
ما يدري البخَتْ بالوكتْ تجليبه.

*

أجلبنّك يليلي والعمر مبيوك **
بارَتْ سِلعِتيْ وما واصل آنه السوك،
واتراهَنْ على الياحيف بسْ مسْبوك
واعَدْني برِبِحْ بسْ صابته الريْبهْ

*

أجلبنّك يليلي والوطن منهوبْ
أدكْ علكَلب مرّه ومرّه ادكْ عَلْبوبْ،
الواوي أشوفه من الطَرِشْ محبوبْ
وكَرّب كَلبي ينكر كل تجاريبه.

*

أجلبنّك يليلي والنوايبْ سورْ
إلمْعاكسْ غِريمي وكافْلَه الزرزورْ،
كثْرانه التحوف وأطْرَشْ الناطورْ
واثوَلْ صار راس الهَرَم ترْتيبه.

*

أجلبنّك يليلي وما دَريتْ ادْوايْ
بالمشْرادْ لو بمْسايَري الدنْيايْ،
لو بالتيه ويّه متيّهات الرايْ
لو ليل الغرُبْ...بَرْدَهْ...وزَحِفْ شيبَه!

*

أجلبنّك يليلي مْناشِد آنه الروحْ
عنْ كسْر الخَواطرْ والوِفه المذبوحْ،
أداعيهَه بحِلمْ جان بسِماهَه يفوحْ...؟؟
مَدْريْ بَهْ...! تصيح بصوت : مَدريْ بَه..!!!!

*****

*ألجيم هنا هي الجيم ذات الثلاث نقاط. كما يلفظ العراقيون كلمة شاي
**الكاف هنا تُلفظ كما يلفظ العراقيون كلمة قاعد / كَاعد

#فاهم_إيدام (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات