هموم وحلم جذاب

حامد كعيد الجبوري

الحوار المتمدن-العدد: 3128 - 2010 / 9 / 18 - 02:19
المحور: الادب والفن
    

مهداة للفقراء
وتذكير لمن أوعد وأخلف

أشمالك يا بخت ما ألجت فد يوم *** ولا مره أخجلت ما جنـَصت سيد
كلها أمحزمه وتركض ركض معتام *** ويرجع ليوره بس حامد كعيد
على باب الفُكر علكت سبع أعيون *** أنخاف أمن الغنايه أعيونهم تحسد !
جزع مني (الفلق) من كثر ما أقراه *** و (شر غاسق وقب) و (النافثه) تعكد
شهر رمضان يفرض بالسنه ع الناس *** ورمضاني سنه وما نلحك أنسدد
اليتيم أبن اللطم يا عيد يفرح بيه *** شايفلك يتامى أبضيمها أتعيد
جدر فوك الهظيمه وجدر للشوغات *** وجدر يطفح دمع وبملحته نثرد
عفتها ع التدرج هاي تدفع ذيج *** سمايّ أمغيمه وبلا مطر ترعد
خابرت المنيه ورمشت للموت *** وتابوت النفاهه أبدارنه أيمدد
كضت بين الحرز ونذور وبدعيات *** ما يسوه العمر من يخلص أتركد

*********
غفيت أعله النواعي وأصحه ع البستات *** وكاروكي جمُر والوَحََّده أيعدد
ناصب للفرح هلبت شبجنـَه أيصيد *** فرحه ومن تصل حلك الشبج تشرد
الفقير أعله البعير وجلب ينهش بيه *** ويهز ذيله أبمذله وللدثو يسجد
ولد متعه أنحسبنه وأمنه بت السوء *** وهو أبن الحراير طاهر المولد
أزرعت دونم فرح حد ما وصل ينحاش *** النايم للظهاري أبمنجلي يحصد
غلط مره الفرح مجبور دك الباب *** تأسف وأعتذر عن غايته ينشد
نويت أعله البخت خيره أفتحت قرآن *** طلع (تبه ولهب) لحبالها أتقيد
زاعلت الفرح والكيف طلكناه *** وميثاق الشرف ويّه الحزن أعقد
لا ماشي الفرح ما ريده يحجي أوياي *** ولذة دنيتي أبمسجد صبر أعبد
إبن شداد صاحوا حزموني أحزام *** وصعدت غيرتي وثوب الحزن أسرد
ومن صارت مغانم قسمة الأسياد *** نسبوني (الزبيبه) وحصتك منعد
*********
كالولي القناعه أكنوز لا تفنى *** وجربت القناعه وبوبها أتسدد
طرزت الفرح بكلوب المحبين *** أشعاري أبقفص محبوسه وتغرد
على كثر الغسل غير هدمنه اللون *** ملحه ومن بياض أوجوهنه أتورد
شفت البير عمدا يرمي بيه أحجار *** الزنيم وخنجره أبجبد البشر يغمد
آنه إبعازة أبو أبيمناه يكص يسراه *** عرف نيتها سوده وخافها أتفرهد
آنه أبعازة علي أبكلبه اليتامه أتبات *** ويحضنها أبرحمته وراسها أيمسد
آنه أبعازة علي خلكه أبوساعة كون *** ولا أبمال الحرام أبهدمته أيجدد
آنه أبعازة علي مو للصلا والصوم *** قرآنه ضميره وقبلته الموعد
********

#حامد_كعيد_الجبوري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات