قصيدة : 28 صرخة تحدى

طاهر كمال عبده

الحوار المتمدن-العدد: 2986 - 2010 / 4 / 25 - 20:04
المحور: الادب والفن
    

بكرة نور الفجــر يســطع
==================
دوس على كبد الحقايق , و إطلق الزيف فى الربوع 1
دوس على النبتة اللى باقية للأمل , و إطفى الشموع 2
و إحرت الزرع اللى بازغ يحضن الشوق للحياة 3
خلـّى لون القهر كاسى بقسوته كل الجباه 4

********
دوس على خدود البراعم , و إرشق الخوف فى الجدور 5
قصقص الريش والضوافر , و إبنى سجن بألف سور 6
و أحصد النبت الشيطانى , و قلـّعه قبل الأوان 7
إوعى تعتق شبل واعد , أو وليد ملهوش أمان 8

********
دوس حروف الرفض و إمحى من رسوم الأبجدية 9
أى كلمة حق شبهة , أو معانى متدارية 10
و إشطب الجملة المشاغبة من جميع الأغنيات 11
و إحذف النغمة المخالفة , و إملا كل الكون موات 12

********
سيب كابوس الظلم كاسح , و إكفى ع الأحلام ماجور 13
و إردم النبع اللى فاضل يروى بستان الزهور 14
و إطوى كل شراع حيطلع تنفخه الريح بالحياة 15
و إحجز الموجة اللى شايلة مركب الفجر اللى تاه 16

********
دوس على كفوف الطفولة ب"البيادة" العسكرية 17
و إكتم الصرخة المهولة بألف "دبشك" بندقية 18
لجـّم الخيل اللى جامحة , و إبرى سنابكها العفية 19
و إكسر النِفس المكافحة بالزنازين الغبية 20

********
إنتف الرمش اللى بربش , و إرغم الريح ع السكات 21
و إنسف الذكرى اللى شقت مجرى للفكر اللى فات 22
دوس على صدور الخلايق , و إزرع الخوف والمرار 23
و إرشق العين اللى طلـّه ع الوطن من كل دار 24

********
بكرة نور الفجـر يسطع يمحى طغيان القصور 25
دى الغيطان صابرة وهتفضل طاوية فى قلوبــها البذور 26
طول ما غول الفقر يمرح , المراجل فى الصدور 27
والسكون بركان هيغضب , والهدير طبع البحـــور 28

********

#طاهر_كمال_عبده (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات