رسالة إلي الحزب الحاكم

لينا المصرية

الحوار المتمدن-العدد: 2958 - 2010 / 3 / 28 - 21:50
المحور: الادب والفن
    

تحياتي و سلاماتي للحزب الوطني الديمقراطي
كانت محروسة بقت محبوسة و مخروسة و شعبها مطاطي

بعد التحية:
إحنا شباب عايزين نرفع راس الأمة دية
دي بلادنا و بلاد جدودنا و غنينالها ميت أغنية

آن الأوان نقول كفايا أغاني و نبطل كلام
و عشان كدة جايين و عشمانين تقروا الرسالة للتمام

الأولة: مطلوب دستور مايقولش ديانة للأوطان
علي أساس إن الوطن لينا و الدين للديان

و التانية: عايزين نلغي من البطاقة خانة
يعني مش لازم الهوية تكشف عن الديانة

و التالتة: قانون موحد لبناء دور العبادة
يعني الكنيسة و الجامع و المعبد واحد يا سادة

و الرابعة: نطوّر و نعدّل مناهج التعليم
نعرض تاريخ مصر بشكل محايد و سليم

و الخامسة: بلاش حصص الدين في المدارس
يتعلموه في البيوت و الجوامع و الكنايس

و السادسة: بنقول كل واحد حر في أفكاره
طول ما هو عايش مسالم و بيحب جاره

و السابعة: لازم نواجه اللي بيغلط في الكلام
ويقلب عقول الناس حتي لو كان قس أو إمام

و التامنة: القوانين تطبق علي الكل واحد
مش بس الغلبانين و اللي مالوهش ساند

و التاسعة: عايزين مشروع قومي يجمّعنا
يوحد أهل البلد دي و يخللي للحياة معني

و بخطوة واحدة هنبدأ طريق الألف ميل
و هنصبر و هنضحي لجل عيونك يا نيل

و أخيراً:
بنقول لكل ولاد مصر لازم تكملوا المسيرة
و القوي فيه الأقوي منه ... اللي له الكلمة الأخيرة

#لينا_المصرية (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات