دردشة مع والدتي ... حول المرجعية وحكومة المالكي .... (3)

علي الأسدي

الحوار المتمدن-العدد: 2933 - 2010 / 3 / 3 - 22:51
المحور: ملف: الانتخابات والدولة المدنية والديمقراطية في العراق
    

" لا شيئ يستمر سوى التغيير "
( الفيلسوف هرقليطس)

كانت والدتي تتحدث بالتلفون مع صديقة لها ، وهي تلح عليها قائلة : داكلج آني شفتهه بعيني ,أي لو ما شايفهته جان ما احجيت ولا كلت. وبعد أن أنهت مكالمتها بدأت تتمتم مع نفسها قائلة:
ماادري شبيهه ناس هالوكت.
اسمعت يمة ، شدكلي ام عبد السادة ؟ دكلي ميخش بعقلهه ، وآني داكلهه شفتهه الصورة بعيني.
سألتها : مالخبر ماذا جرى؟ فردت قائلة:
واني راجعة يمة من السوك شفت براس شارعنا وحدين دايعلكون شعار مال انتخابات على حايط بيت أم عبد الرحمن ، باوعت من بعيد شفت صورة على الشعار، شلون ما أباوعها هي صورة السيد السيستاني ، كمت ورحت على الواحد الجان دايعلكه.

وكفت يمة وسألته ، شنو السيد السيستاني مرشح للانتخابات ؟
جاوبني بنتر ، ليش إلا يرشح السيد حتى نخلي صورته هنا ، احنة قائمة المجلس نتبارك بصورته.
شكله يمة ، انت تعرفني شلون ما أرضه بالغلط ، يمكن شافني وحدة غشيمة على كد ايده ، بس أني ما اسكتت وجنت اكله ، لعد مو السيستاني كال لا تخلون صورتي على شعارات الانتخابات ، وأني ويا كل القوائم ما فضل وحدة على وحدة. كلت لحجاية وسكتت ، ردته يحجي بس جلمة ، لكن صاموط لاموط ، عبالك صفه العباس ، ردت أحجي بعد ، لكن اسكتت وكلت ويا نفسي شعلية يريدوها صغار يريدوها اكبارما ينكدرلهم ،هو السيستاني ما يكدرعليهم ، هاالنوبة آني ؟
كتلها لام عبد السادة بالتلفون على صورة السيستاني ، تكلي ما تنعقل ، تالي كالت إلا أروح بنفسي واشوفهه. يمة يطلع هالعمل من إيد جماعة المجلس؟ والله شكلك كلشي يصير بهالوكت.
ردت اكلك يمة فد شي وانسيت ، هم هو عالدعاية ، ها هسه جابالي، يمة شفت طيارات البارحة تشمر دعاية بجهة المنصور ، وأم عبد السادة شافت طيارة ترمي فوك الاعظمية ، وسمعت الناس تحجي ومامصدكه. كالت شافت بعينهه واحد من الدعاية يذم ويهدد بواحد من غير قائمة ما تذكر اسمه حتى ما يطلع بالانتخابات.

شنو تخبلت العالم ، والله يمة دوخونة ، عبالك مختلفين على ورث ابهاتهم ، كلمن يدير النار لكرصته ، وين صايرة هاي ، هذي بجفة والتزوير بجفة. الناس داتحجي بكل مكان عالحكومة ، كلهه تكول هي دتزور الانتخابات ، تنعقل هاي يمة ، بس هذا حرام بحرام. لو أكدر اكتب بالجرايد جان احجيت على هالشي. يمة ،انت خوش تحجي ليش ما تكتب على التزوير وتفضحهم ، لازم واحد ما يسكت عن الحق ، لأن هذا ظلم ، ناس صدك تريد تخدم بلده ما يخلوهه تطلع بالانتخابات ، ماخذين الدنيا طول وعرض ، ليش هيه دامت لغيرهم حتى اتدوم الهم؟ بس بني آدم ما يتعظ ، وأني خايفة من هالنتخابات ، لو ميسووها هوايا أحسن ، وتريد الصدك يمة آني خايفة لايطلع المالكي أبو وجين ، أشو يحجي شكل والعمل شكل ؛؛
بس أني محقانية ما أرضى بالغلط لو شميصير ، شفت يمة هذا علاوي ، أشو وكته كله مكضيه برا البلد ، يوم بالعراق وعشرة بالاردن لو بالسعودية لو بمصر ، أي هوه لو صدك وطني يكعد هنا حاله حالنة ، خلي يشوف الدنيا شلون عايشة ، خلي يكعد بمجلس النواب ويحجي مثل مايريد ، لحد يكله ولحد يحاجيه ، هذا موشيخ صباح الساعدي ، أشو يحجي ذاك الحجي على الحكومة ، وهو شعندة بالسعودية ؟ ما عيب عليه وعلى طوله ، إحنه اششفنه من هالحكام العرب غير انتحاريين وفتاوي تكفيرية ، مافد يوم وكفت الحكومة بوجهم ومنعتهم ، وبعدين شنو همة آل سعود حتى يروح يمهم وياخذ مشورتهم ، علم فهم؟

صدك يمة ، انسيت اقلك ، سمعت البارحة بالاخبار، ممثل المرجع الشيعي الشيخ بشيرالنجفي ، يكول الحكومة بيهه ناس خانوا الوطن وما خدمت الشعب ، وجاب اسم مله خضير وزيرالتربية ، وكال عنه يثيرالطائفية ، وهذي حجاية صدك وأني سامعتهه من هواية من معارفي. أنت تعرف يمة هذا مكسور الركبة شمسوي بعد ، معين جوه إيده أربعة عشر مديرعام وكلهم من حزب الدعوة ، مابيهم واحد من غير حزبه ، مو بس هاي ، ما بيهم ولا واحد سني ، شفت يمة شكد عيب وخزي ، ليش هي الوزارة مال ابوه ، وفوكاها المالكي يكول آني ضد الطائفية ، مايكلهه النفسه شلون يعين الموظفين كلهم من حزب الدعوة ، يعني قابل الخبر ما يطلع. بس يمة تريد الصدك اللي كاله الشيخ جا بوكته ، حتى تعرف الناس شلون أكو بهالبلد ناس ما يخافون الله، لأن هذي عمايل ما حلوة ، عيب عليهم يفرقون بين هذا وذاك ، وحقة الشيخ يكول لازم يطلعوا الخزاعي من الوزارة ويخلون واحد من الكفاءات بمكانة مو طائفي شجان ما يكون مسلم مسيحي ايزيدي صابئي ، بس مخلص ونزيه.
أه شلون دغيرت الدنيا يمة ، هذا هم زمان ، واحد مثل مله خضير يصير وزير وأهل الشهادات كاعدين لا شغل لاعمل ، هذي لا ألله يرضى بيه ولا رسوله. الله يرحمك يا عبد الكريم قاسم ، بس هوه الوطني وغيره لا ، يمة انت ماتذكره ، ما فرق بين العراقيين أبد أبد ، كل الناس عاشت أخوان ، بس الله لا اطاهم ما خلوه ، لوجان باقي جان هسه البلد بألف خير. بس كلها من ورى شركات النفط والبعثية.

لكن يمة طلعة الشيخ بشيرالنجفي وحجايته على الحكومة بهالوكت دوختني ، مايجوز المرجعية ما راضية عن المالكي وتريد تغيره ، حتي تجي جماعة المجلس وتاخذ الحكم ؟
الله أعلم ، خلينة ننتظر وانشوف تاليته وين توصل.
علي ألأسدي

#علي_الأسدي (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات