جهاد علاونه
الحوار المتمدن-العدد: 2928 - 2010 / 2 / 26 - 08:30
المحور:
كتابات ساخرة
- والله يا أبو خليل هذي قضيه ما لازم نسكت عليها نهائياً.
-قصدك السرقه الأخيره؟
-آه هو في غيرها ؟.
-كيف ما فيش غيرها , كل يوم بتطلع لينا قضيه جديده وسرقه جديده وقصه جديده وحكايه جديده والحاره صار فيها هذا الشهر أكثر من 15 سرقه, كسر وخلع محلات تجاريه , سرقة البقره , اختفاء اربع روس من الغنم , سرقة جرار غاز(اسطوانات غاز) وكمان الغسيل تاع النسوان صاير ينسرق عن حبل الغسيل , وصار رايح لأم ورده أكثر من ثلاث شلحات وغيارات داخليه .
- البلد مليانه فساد.
- ماشي بس احنا ما لينا علاقه في إشي , احنا علاقتنا رايحه تكون واضحه ومحدده وهي البقرة الحلوب وسر اختفاءها .
-إذا هيك ماشي , أما إذا صار توسع في التحقيقات اعتبروني منسحب نهائياً, إنت انسيت في أيام زمان شو صار بس حققنا وفتشنا ودورنا على اللي سرق دارك في فترة غيابك عنها أنت وأولادك؟.
-شو صار ذكرني....؟.
-اللي صار إنّا اكتشفنا سرقات كثيره بالصدفه أثناء البحث والتفتيش وتسببت لينا هذي المشكله في عدة مشاكل , وبالنهايه سكّرنا على الموضوع نهائياً.
-وهو كذلك.
-خلينا انروح على بيت المختار وهناك ابنحكي في الموضوع .
- ماشي .
-يا الله ..يا الله .
-مين على الباب ؟
- هذا إنا أبو صالح ومعاي أبو أحمد وابو ابراهيم .
-فوتوا ..فوتوا .
-كيف حالك يا مختار ؟
- الحمد لله.
-اسمعت عن سرقة البقره .
- آه والله اسمعت اليوم الصبح .
-بدنا اندور عليها أو انحاول القبض على الفاعل .
-إنا خايف يصير فينا زي كل مره.
-شو بصير كل مره؟.
-يعني تطلعلنا معوقات جديده ,وبعدين ننسا الموضوع.
-لا احنا في هذه المره رايح يكون موضوعنا واضح ومحدد , وما بدناش نطلع عنه , بدنا نهتم في هذي القضيه لوحدها وما بدناش معاها أي قضيه أخرى , على شان اهتمامنا يكون مُنصب في محله, وهو سرقة البقره أو سر اختفاء البقره .
-لا شو نُسكت عليها !
- يعني احنا لازم نعمل اجراء بحق اللي سرق البقره, على الأقل أمام الناس ولو مجامله , بُكره بصيروا يحكوا علينا ويقولوا إنّه احنا الحراميه وبنتستر على المجرمين على شانا احنا المجرمين الحقيقيين.
- صح والله العظيم انك إنت صادق , الناس ما ليهم شغله إلا الحكي الفاضي , وبس يسمعوا في أي قصه بصيروا يحكوا علينا .
-والله كلامك صحيح يا أبو أحمد وكل مجرم لازم ياخذ جزاه.
-أنا مع رأيك يا أبو ابراهيم ومع أبو أحمد ومع اللي بحكيه ابو خليل , بس شو بدنا نعمل ؟
- الرأي رأي المختار خلينا انشوف رأي أبو علي , شو رأيك يا أبو علي بموضوع سرقة البقره من بيت أبو كامل ؟.
- يجب أن نقوم بتشكيل لجنة من كبار رجال الحاره والحاره المجاوره لكشف الحقائق وللوقوف على الملابسات وتحميل المخالفين المسئوليه وتقديمهم للعدالة وتوقيع أشد أنواع العقوبات بحق كل مخالف, على شان يعرفوا الحراميه إنها البلد مش سايبه وفيها قانون بيحمي الجميع وبنصف المظلوم وبياخذ للضعيف حقه من اللي أقوى منه , وشو رأي قايد المخفر.
- آه وين القواد تاع المخفر؟ ليش ما فتش عن الموضوع لحاله ؟.
- إنا من ساعة ما اسمعت بالخبر وأنا أبحث وأتقصى عن الموضوع.
- آه..وشو كانت النتيجه , احنا بدنا نتائج مش أي سوالف وخلص.
- في غضون أيام رايحه اتكون النتائج عندكوا.
- بس دار ابو كامل قدموا شكوى عندك عن مشتبه فيهم من أولاد (صالح) شو عملت فيها ؟
- لا بعد البحث ما ظهرت أي نتيجه , كل توقعاتهم كانت (على فشنك).
- ليش على فشنك, اولاد صالح أكثر ناس مشتبه فيهم ولهم سوابق متعدده .
- آه فعلاً إذا في حدى يا جماعه عملها ؟ مش رايح يكون إلا هُّمّه.
- إنا حققت عندي في المخفر بالموضوع وتبين إنّه أولاد صالح يومها كانوا كلهم في عزيمة المختار.
- إنا بشهد إنهم كانوا في العزيمه مع قايد المخفر , وبالأماره أنا شفت صالح روّح مع قايد المخفر .
- شو صاير لقايد المخفر علاقه بأولاد صالح؟
- لا والله هذا ابن ابو صالح بده مساعده من واحد بعرفه اكثير وحبيت اساعده لله .
- صاير تتردد اكثير على دار صالح يا قايد المخفر.
- في ناس بحكوا عن علقتك الحميمه في صالح وأولاده على شان هيك أنت بتتستر عليهم .
- يا جماعه شو دخل دار صالح بالقصه , إذا صالح وأولاده ما ليهم علاقه بالموضوع ! ليش حتى نفتح مواضيع ثانيه , احنا موضوعنا واضح ومحدد وهو سرقة البقره .
- والله احنا بلد احسن من غيره بكثير الله يديمك يا مختار فوق روسنا .
- معلوم ..هذا هو الكلام اللي بمشي عندنا , الله يطول لينا في عمرك يا مختار.
- والله رأيك أفضل رأي ولولاك احنا ضايعين ولكن بفضل قيادتك الحكيمه احنا بلد عايشين في خير وأمن وسلام وكلشي عندنا ما شاء الله متوفر.
- طبعاً يا أبو خليل وأنا اعتبروني أول واحد بشارك في التحقيق .
- وفي كمان متطوعين .
- لا متطوعين ما بدناش.
- مش بس نعرف بالأول مين السارق .
- صح احسن ما ننفضح بالجرايد.
- خلينا انشمشم الأخبار بالحاره , وينه لهذا اللي اسمه ابو الليل , اسألوه وين كان امبارح , هذا أول مشتبه فيه .
- صحيح وين كنت يا أبو الليل امبارح صارلنا بيجي يومين مش شايفينك بالحاره .
- إنا كنت مع ابن أبو كامل.
-يعني مع صاحب البقره نفسه, سامع يا بيك ؟ سامع يا قايد المخفر.
- صح..وتأكدت بنفسي من هذا الموضوع قبل ما تسألوه .
- ووين كان ابن ابو كامل .
- اسألوه .
- انتوا شو بدكوا في هذا المسكين ابو الليل , إنا بصفتي أبو كامل بعرف وين كان هو وابني , إنا بعثتهم على مشوار خارج القريه على شان يجيبولنا اشوية لوازم للبيت .
- آه بس بحكوا بعض الناس إنهم شايفينه هو وابنك جارين معهم (عجل ) كبير مسروق من الحارة الثانيه وأهله بدوروا عليه .
- يا مختار احكيلك كلمه احنا شو دخلنا بالعجل اللي انسرق من الحاره الثانيه ؟ احنا موضوعنا واضح ومحدد وهو سرقة البقره, وما بدناش موضوع ثاني .
- يا جماعه بصفتي مختار البلد أقترح أن نتجاوز موضوع ابو الليل والعجل والشهود اللي شافوه , على شان ما يضيعش موضوعنا الحقيقي , وخلينا انركز على موضوع واحد وهو (اختفاء البقرة )الحلوب من الحارة .
- ماشي , من وين جاب سالم ابن ابراهيم المفلح سيارته الجديده؟
- شو دخل موضوع السياره بالبقره ؟
- آه شو دخله ؟
- احنا بدنا نعرف من وين , السياره جابها بعد ما اختفت البقره .
- شو يعني هو اللي سرقها واشترى في ثمنها سياره !, لا مش معقول .
- ما أظن إنه يعملها .
- بحكوا الناس إنه المختار اشتراها ليه على شان يشتغل عليها هو وابن المختار .
- بارك الله في المختار والله يطول عمره .
- والله احنا أسأنا فيه الظن واعتقدنا انه هو اللي سرق البقرة وجاب في حقها سياره .
- يا جماعة الخير فعلاً أنا اشتريتله السياره وكان لازم أعمل معاه هيك على شان زوجته كانت بدها تطفش من البيت وتترك أولادها, وكان البيت بده يخرب وأنا الله أرسلني في اللحظات الأخيره لانقاض الموقف ولانقاض ما يمكن انقاضه.
- والناس كلها بتسولف عن سهراتك عنده في البيت , وفي ناس بحكوا انها زوجته حلوه , وانه أنت بتروح تسهر عنده في البيت على شانها , بس أنا ما سكتت ليهم ووقفتهم كلهم عند حدهم وقلتلهم : كل واحد يعرف مقامه ومكانته وكل واحد يعرف حجمه مليح .
- الله يلعن البقره واللي سرق البقره , احنا موضوعنا واضح ومحدد وهو كشف سر وملابسات واختفاء البقرة , شو دخل ابو الليل وبعدين المختار وأعماله الخيريه , المختار طول عمره يشتغل لله فقط لاغير .
- يعني كل ما بنيجي نضع ايدينا على الجاني بتظهر لينا قصه جديده وسرقه جديده.
- احنا يجب علينا عدم التوسع في التحقيقات على شانها هذي الخطوة بتسحبنا إلى متاعب جديده , وشو رأيكم.
- فعلاً يا مختار كلامك صحيح احنا لازم يكون موضوعنا واضح ومحدد.
- ماشي الحال.
- مين آخر واحد شاف البقره ؟
- أنا شفتها على البيادر.
- جيد ..كويس عال العال , من هون لازم ننطلق .
- أي يوم؟
- والله يمكن يوم الأربعاء اللي فات.
- لا يا أبو أحمد , إنا شفتها يوم الخميس.
- ليش مش أنت يوم الخميس كنت مريض وعلى حساب انك ما اطلعتش من البيت ؟
- كنت موجوع إشويه وبعدين اتحسنت صحتي.
- طالما صحتكم اتحسنت , لعاد ليش ما أجيت على عزيمة المختار ؟
- والله كلامه صحيح ليش ما أجيت على عزيمتي , عزمت أهل الحارة على العشا وأنت الوحيد اللي ما أجاش, فليش ما أجيتش؟
- كانت عندي شغله ضروريه.
- شغله ضروريه ولا كنت متزوج بالسر من ورى زوجتك وما كنت بالدار؟.
- دخيلكوا طالما كشفتوا سري لا تفضحوني , الله يلعن البقره واللي بحقق في سرقة البقره , يعني لو ما حققناش في سر اختفاء البقره , كان ما انكشفناش.
- فعلاً يا مختار احنا لازم نغلق على الموضوع .
- طيب شو بدنا نحكي للناس؟
- ما عليكوا هذا قايد المخفر (الدرك- الشرطه) راح يحكي للناس اللي بسألوه إنه التحقيقات جاريه والبحث مستمر للكشف عن هوية الجناة.
- وكمان في المستقبل إذا حدى من هذول الحراميه البسيطين انكمش وهو يسرق في أي سرقه , بنحاول انّلبّسُهْ الموضوع كله وكل السرقات اللي صارت في قريتنا من عشر سنين وجاي .
- معناته زي كل مره.
- وزي كل سرقه كبيره بتصير بالبلد, يعني لا هذي أول سرقه ولا آخر سرقه بتورط فيها ناس اكبار.
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
