دوا الروح -- زجل

محمد نور الدين بن خديجة

الحوار المتمدن-العدد: 2830 - 2009 / 11 / 15 - 20:43
المحور: الادب والفن
    

حل الدا بذاتي
وذات الريح جابت ودات
وما خلات لبا بي غير الصمت حزين
نايح يا دقان
ويا جواب حنين
شكون يفتح لشواق القلب
شكون يعنق مشموم الورد المنسي..
فايح يا نعناع مسكين
شكون خلاكاس لفراق
جنب السكين


حل الدا بذاتي
وانا بين دا ودوا
تتعلق روحي ف هبال الطير
ما بقى الحلم صغير الحلم شاب وعاب
وعكازو مرمي ع لحصير
صات على جمر اوهامي
ذاك الكير
دق على زبرة كلامي ذاك الحداد
طار طشاش سلامي
على نهود لبنات
والجمرات
ذوك الجمرات
من عيني دمعات ع لرماد
والشمعات ذوك الشمعات
قطرة..قطرة
من حسكات
وف ظلام الضيم جابوا اولاد
ضواوا بلاد
بمحبة وعناد
ساكوا الريح
بشحال من خيل وسيوف
ونصرهم بشحال من رايات وصفوف
وشحال من مناجل وكفوف
وشحال من سبولات ورغيف
وشحال من سواكي وجبال
وشحال من شعاب ورمال
والحلم الواقف ارجال
والدا ف الذات عمال
وذات الريح جابت ودات
والضربة
على طبل الليل عيات
نايح يا ناي على غنباز
وانت يا عش الا لغاز
فيك شحال من طير
رسم تغريدو على رسايل لحباب
داز غمام لغياب
وضاع بين جناح ليام لجواب
الورد منسي
و النعناع متروك للغبينة
وشكون خلا كاس لفراق
جنب السكين


حل الدا بذاتي
وانا بين دا ودوا
وكلب ينبح ف طريق الليل
سمعت اللي جاي بصباط ثقيل
سمعت باز ع لجراف باقي سهران
سمعت نار تتكلم
ف ريش العشاق
واش هي حرب لعمر المسعورة
او ما تمزق من راية لرفاق
واش هي نوح لحمام الهايم
بين عش محروق وسراب
واش هي دواية دم
او مداد كذاب...
ما دريت باللي صار ع لوراق
ما دريت ف سهو الليل
بخنجر لفراق
وانت يا كاس مغدر حراق
تنادي بالوجد
وتهيج لشواق
ذوك لحباب
كانوا على دربوز العشق يتكاوا
ذاك حباقهم
وذاك شرجمهم""
ذاك مسك ليلهم
على نجم لقصارة فايق سراق
سراق يا سكين لمحبة
وعلى غفلة م لعناق
ذباح يا نعناع الفثنة
وعلى صواتي دموع
وانت العشق الممنوع
وانت دية الدم المدفوع
هذا عرسك
على قنادل الزيت وشموع
بان وجهك
وطاح لثامك
بين سجدة وركوع
وريحي ع لبواب تتسناك
ودوايا ف كيسان هواك
طال ليلك
بين عجاج ترابك
وبروق سماك
ودوايا فكيسان هواك
طال ليلك
بين عجاج ترابك
وبروق سماك
طال وصبت دموع
ومهما طال
لصباحك رجوع
رجعي
رجعي نتسناك
شكون خلا ظفيرة منك ف لبال
شكون خلا وشمة منك على يدي
وشكون خلا
كاس لفراق جنب السكين

زجل -- محمد نور الدين بن خديجة-- المغرب

"" الغنباز نوع من الاز هار المنزلية الجميلة والتي يعتني بها المغاربة

#محمد_نور_الدين_بن_خديجة (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات