نزار أحمد
الحوار المتمدن-العدد: 2809 - 2009 / 10 / 24 - 21:01
المحور:
كتابات ساخرة
-- الوو...الوو...الوو...مرحبا...مرحبا..
-- ألوو....الوووو..الوووو...
-- ألوو...ألو...هل تسمعني
-- ألوو....الخط ايگطع...وصوتك واطي
-- سوف اعيد الاتصال
بعد اربع ساعات
-- ألوو...ألو...مرحبا
-- وعليكم السلام ورحمة الله وبركاته
-- كيف الاحوال استاذ بطيخ
-- تنها نخست وزیر به نام شما
-- أتتكلم معي؟..لم افهم شيئا
-- وقتی که من بروم خانه را بخرم مبلمان
-- اغاتي شنو د تكلم فارسي لو تركماني لو كردي؟
-- من تماس بگیرید نماینده املاک و مستغلات
-- عيني..اغاتي...فهمني..شنو السالفة؟
-- العفو اخي كنت اتكلم مع فخامة السيد الوزير
-- هل السيد الوزير مو عراقي؟
-- احترم نفسك ولك...سعادة الوزير عراقي بن عراقي غصبن عني وعنك, بس شويه بالعربي ضعيف
-- ولكن لماذا لا تتكلم معه عربي؟, اقلها تتحسن عربيته
--هو هيچي يحب يحچي ويانه فارسي لان عدنه بالمكتب حشاك فد جحچ ماعنده شغل وعمل بس يتجسس لحساب المجلس
--آسف وحسبهه عليه
-- بعدين اتعَلًّم ادب وعوف هايه اللهجة الجلفية وحچي وياي فصيح...شنو شايف الگدامك معدان
--عفوا..اعتذاري
-- المهم...منو جنابك
-- آني شباط شعبان ذي الحجة الذيعقداوي
-- اتصورتك تعرفني..طلعت مواطن وعندك هيچي وكاحه ..والحسين والعباس وفاطمة الزهراء لو هسه گدامي جان گصيت لسانك
-- آني من طرف السيد مچروگ هاشم الداميفستاني, امام جامع زينب في مشگان
-- مية هله, والف مرحبه, ومليون اشلونك استاذ شباط..غير اتگول من الاول انت من طرف سماحة السيد عظم اجره
-- كنت اتصور مااحتاج واسطة حتى اتكلم معك
-- شنو تايهه الشغله.. قابل ماعدنه شغل وعمل بس انضيع وقتنه ويه اليسوه والمايسوه
-- لم يكن هذا قصدي ولكني كنت متوقع ان يكون للمواطن قيمة واعتبار لديكم
-- حبيبي عيني, عوف هيچي سوالف فارغة..شنو قابل الشعب انتخبنه حتى نركض وره راحته وطلباته الي ما تخلص
-- هذا كان تصوري, اذن لماذا انتخبكم الشعب
-- الشعب انتخبنه حتى ندير بالنه على نفسنا واصدقائنا والمعارف مثل جنابك واليأمر بيه سماحة السيد مچروگ, مو الله گال الاقربون اولى بالمعروف. بعدين هسه انت شعليك بالشعب, همه لو محتاجين اشو عدهم لسان ويگدرون يطالبون بيه..شنو قابل وكلوك محامي عنهم
-- ما كان قصدي ولكن اذا كانت هذه معاملتكم للشعب, من يضمن لكم بأن الشعب سوف ينتخبكم مرة ثانية
-- هاي السالفة خليهه علينه, صرنا خبراء بيها
-- لم افهم
-- يوميه نِطلعله بدالغة جديدة, مره قائمه مغلقه, مره توصيه من المرجعيه, مره نسوي الانتخابات بعاشوراء, مره انودي هذا لذيچ قائمه, وانجيب هذا الهاي قائمه, مره نسمي نفسنا ائتلاف عراقي موحد, وبالمره الثانيه نسميه دولة الفافون, مره نرگص على الطائفيه, ومره ندگ چوبيه وي الوطنيه, بعدين انت اشدخلك بهيچي سوالف عتيگه وشغلات ستراتيجيه ومن سمحلك اصلا
-- اعصابك استاذنا والله ماكان قصدي , ثم مناقشة هذه الامور تحتاج جلسة خاصة وليس عن طريق الهاتف.
-- حچيك ذهب استاذ شباط, امر, خدمه
-- اي والله محتاجك بطلب
-- تأمر استاذ, غالي والطلب رخيص
-- ابحث عن وظيفة منذ ستة اشهر وياحبذا لو عندكم وظيفة لي في السفارة العراقية في واشنطن
-- ليش ما خبرتنه قبل اسبوع؟
-- ومالفرق بين الاسبوع الماضي واليوم؟
-- اكو فرق چبير لأن سعادة دولة رئيس الوزاء هسه قبل شويه عين 57 سفير جديد, ومثل ما انت زين العارفين احنه محددين بحصه ثابته, وهذوله السنه البعثيه والاكراد ما يقبلون يتنازلون عن ثلمه من حصتهم
-- ومن قال لك بأني ابحث عن وظيفة سفير حيث مؤهلاتي لا تسمح لي بذلك
-- مؤهلات شنو, شنو قابل العيناهم احسن منك, اشو واحد چان گصاب, وواحد چان چايچي, وواحد عيناه سفير حتى نخلص من طلايبه, ما خله شغله إلا حشر نفسه بيهه, واخرهه سالفة الطوبة, وداعتك علگهه علگه محترمه وطير الطوبه واهلهه وماراح يبقه عدنه غير الدعبل والچعاب وطم خريزه, وسوالنه ميتين مشكله ومشكله ويه فيفي عبدو, وما اعرف اشطبب الرگاصه فيفي عبدو بالنص, مو گاعده بمصر, اشوداهه الى سويسرا والطوبه , كل ما انخلي خشمنه بيهه تجينه رساله تهديد منهه, وبعدين والله گرع راسنه هذا الگاعد يمكم المسمي نفسه دختور نزوري احمد, كل يوم وكاتبلنه مقاله شطولهه شعرضهه, كلهه حچي خريط بخريط, ساعه فيفي عبدو گالت هيچي وساعه قانون رقم 16 گال هيچي, وآني مثل الاطرش بالزفه, هسه انته شلك علاقه بالموضوع, شنو قابل حسونه سعيده ابن عمك لو من عشيرتك, دخلينه براحتنه نكنس هذا العميل عن وجوهنه ونخلي بمكانه واحد من ربعنه وشارب من مينه, وبعدين اچلبت هالتچليبه بالقوانين, هو احنه شكول قوانين. على فكره قبل كم شهر, خابرته الهذا الدختور, وطلبت منه دوا للصلع وگالي هو موطبيب, هو دختور الكوهروباء, بربك استاذ شباط هي الكوهروباء تحتاج دختوراه, هي كل ما يحترگ الگلوب نغيره, اشو احنه هنانه يوميه نغير الفين آدمي وماعدنه دختوراه, كل مايموتون نذبهم بالشط. وبعدين ما فوتناه للدختور, وداعتك شوهنه سمعته وشرناه على الحبل, سويناه بعثي ومن ازلام عدي وما خلينه اشاعه ما طلعناه عليه
-- استاذنا بطيخ وما علاقتي بالمدعو نزوري و حسين سعيد, انني اسألك عن وظيفة
-- اعرف زين بس شويه حبيت افضفض عن گلبي, اوكي او كي, حلوه هاي مال اوكي مو, تره اخوك سبع حتى انگريزي يعرف يحچي
-- Sir, I do not have time to waste with you, please as I said, I am only looking for a job. Did you understand?
-- عيني استاذ شباط, عله كيفك ويانه, شنو نازل علينه صلي انكريزي, نرجع للعربي احسن إلنه وإلك, گتلي تريد وظيفه وسفير ما تقبل , ي.. ي... هسه لگيتلك وظيفه ترتاحلهه وتبيض وجهنا بيها
-- جازاك الله خيرا, ماهي؟
-- نائب بالبرلمان العراقي
-- اتمزح معي؟
-- لاوالله دحچي جد
-- ولكني لا املك المؤهلات المطلوبة, علاوة على عدم المامي بالامور السياسية
-- شنو وهي هاي الشغله يحتاجلهه مؤهلات لو خبره, حتى كناس الشارع يگدر يسويه, شنو قابل البل برلمان احسن منك, اقلها انت تحچي انكريزي وتضرب صلي مو مفرد
-- ولكن شهادتي الدراسية لاتتعدى مرحلة الدراسة الابتدائية
-- بسيطة جدا
-- كيف
-- انزورلك شهادة دكتوراه حالك حال باقي نواب البرلمان ووزراء ومستشاري الحكومة
-- وماذا سيكون موقفي ان ساءلني احد سؤالا مهنيا؟
-- بسيطة, ننطيك دكتوراه بعلم الشروع, وكل ما مطلوب منك هو تلبس عمامه سوده لو بيضه لو حمره, براحتك, تره احنه ديمقراطيون بها الامور
-- ولكني لا افهم في العلوم الدينية وسوف احرج اذا سألني احد الاشخاص عن تفسير او نصيحة دينية
-- شطلعت وياك, زين يابه, ننطيك شهاده دكتوراه بحب الحسين
-- ولكني لا اؤمن بالطقوس العاشورائية واعتبرها بدع ارضوية ولست من المؤيدين لطقوس اللطم والبكاء والتطبير,
-- ومنو طلب منك تبچي وتلطم, هاي سوالف نقشمر بيهه الشعب, همه ملهين نفسهم بيهه واحنه مستفادين منهه, بعدين بربك شفت يوم مسؤول حكومي لو نائب برلمان لو سيد لو شيخ لو رئيس حزب يلطم او يبچي على الحسين, الوحيد الفرع صدره ولطم هو نائب الريس وعاقبناه عليهه بفضيحة بنك الزويه, عجبتك دالغة بنك الزويه, چانت اتجنن مو .
-- ولكني لا افهم بقضايا الشعب
-- ومن گالك احنه انريدك تفهم, كل المطلوب منك هو اشوفلك ختله بالبرلمان وتاخذلك غفوة ومن يحتاجون تصويت, انخابرك ونگلك صوت نعم لو لا, شنو صعبه هاي
-- وماذا يكون موقفي اذا سألني الاعلام
-- بسيطة جدا, جدام الاعلام گول صوتت "نعم" لأنها ارادة الشعب ومطلب الشعب وشما يطيح بيدك من چذب چذب, وداخل قبة البرلمان صوت "لا", وداعتك محد راح يعرف, لان الشغله تايهه بالبرلمان مثل فطيم بسوگ الغزل
-- ولكن ماذا يحصل لو حضر الاعلام جلسات المجلس
-- رجليهم وديهم تتكسر, مادام حماية الشيخ خالد العطية موجوده, هو اكو اعلامي يگدر يخطي خطوة داخل مجلس البرلمان
-- ولكن ماذا سوف يكون موقفي اذا التجأ الاعلام لحاستهم السادسة
-- لتدير بال للاعلام لأن الاعلام العراقي حاطينه بجيبنه
-- لم افهم
-- نص الاعلام العراقي مشترينه والما نگدر نشتريه مخوفينه بقضايا المساءلة والاختطاف والقتل, تدري انت اچم اعلامي وصحفي قتلنه لحد الآن, وداعتك صفيناهم تصفي, ما خلينه منهم بس المخلينهم بعبنه
-- وماذا بخصوص المقيمين خارج العراق؟, فهناك الكثير منهم لايخشون الا ضمائرهم
-- دنشتغل عليهم واحد واحد, مثلا, بعضهم دائما يمشون ويه الريح, بزمن البعثيه چانو بعثيين, وكل واحد منهم كتب 200 لو 300 قصيده واغنيه يتغنون بيها لابو حلا والعوجه وصولات الفرسان بالقادسيه الثانيه وام المعارچ, واول ماسقط صدام نزعو ثيابهم وگاموا يكتبون للمرجعية والعجم والسادة والحسين والعباس والمقابر الجماعيه, اما القسم الآخر الي يهاجمونه مشكلتهم بسيطة جدا, المايجون للدرب انشوه سمعتهم ونگول عليهم بعثيه وهتليه وحاقدين, واليجون للدرب دنشتغل عليهم واحد واحد, چان واحد منهم مدوخنه بمقالات مگصبنه بيه تگصب, قبل اسبوعين جبناه هنانه بحجة المشاركة في مؤتمر وطني وداريناه احسن مداراة, ومن وقتها تغير موقفه 180 درجه, روح اقرأ آخر ثلاث مقالات اله, كله مدح بينه.
-- ولكن ماذا بخصوص عائلتي
-- شبيهه عائلك, اذا تريد هم انطببهم بالبرلمان, حته احنه محتاجين نسوان مفرعات
-- ليس هذا قصدي ولكن اطفالي ولادة امريكا وقد تأقلموا على حياة الغرب
-- ومن طلب منك اجيب عائلتك وياك, خليهم مرتاحين هناك
-- ولكني سوف افتقدهم
--شلون تفتقدم, هو ثلاث ارباع البرلمان تاركين عوائلهم برة, اولا تگدر نص الجلسات ما تحضرهه حالك حال البقيه, اثنين, هو برلمانه يوم شغال وعشره ماخذ اجازة
-- ولكني محسوب على اليسارين حتى اني كتبت قصيدة في الشعر الشعبي, سوف اسمعك مقطعا منها
انحرجْ ولحد آخر سما يوصل احراجي
من يسألوني بيا جرف تمشي امواجي
لأني ماخاين بيوم عوزه تراب الوطن
ومالابس بدله زيتوني ولا خادم بالتاجي
وما كاتب اتوسل, قصيده من الشعر
من اجل سياره برازيلي, ألِفْ بيها ادراجي
وما بايع ضميري لأحد, وناسي احبابي
وما من اعجمي طالب طلب لو راجي
ل دجله نذرت روحي وگلبي الابيض
لو انذبح ما اكتب قصيده لغير ليلها الداجي
هناك بارض الوطن احلمت بليله گمريه
خليت بيه الشيعه والسنه تزين ابراجي
وبزاخو گعَّدِت البصره معززه تگول
الكردي والعربي والآشوري كلهم ازواجي
الوطن يا فلان كل سلوتي وام غربتي
ومن يتعب, اشيله فوگ شذرات تاجي
--حبيبي استاذ شباط, شنو انت قابل اول شاعر كل يوم لابس ثياب جديده, عنده هوايه شعراء چانو ناصرين, ومن اجه البعث كل واحد منهم كتب مئات الاغاني لابن صبحه وفرسانه, وهسه همه شعرائنا وكتابنا الوطنيون, كل ما نحتاجهم بس نخابرهم, اليوم الثاني ينزلونه قصيده لو مقال يهز الدنيا هز
-- بالنسبة لي سوف يكون الامر صعبا جدا, حيث لم اتعود على تغير ثيابي او ان اصادق شخصا لغرض المصلحة او اتخلى عن صديق لأنه لم ينفذ لي طلبا يتناقض مع مبادئه
-- الظاهر انت معجون بالفگر, وداعتك لو ما انت من طرف السيد مچروگ, چان من زمام قفلت السماعه بوجهك, المهم شنو رأيك انعينك مستشار لرئيس الوزراء
-- ولكني لا افهم بهذا الامور
-- وهو اكو مستشار عدنه يفتهم بوظيفته
-- عزيزي ممكن وظيفة بسيطة في السفارة العراقية في امريكا ارتزق منها لقمة عيشي
-- اي ممكن شنو رأيك انعينك مستشار للسفير العراقي
-- في اي اختصاص؟
-- مستشار السفير للشؤون الحجابيه
-- وما عمله؟
-- بسيطة جدا, عندما يزور فخامة دولة رئيس الوزراء واشنطن ويهف واحد من حمايته السفير براشدي لوعجل, كل المطلوب منك ان تعلگ حجاب برگبة السفير حتى يخفف عليه الوجع
-- ولكني لا اعرف صناعة الحجاب
-- بسيطة يمكم قماش اخضر
-- نعم
-- خذلك قطعة قماش اخضر وخلي بيه حفنة حشيش وخيطهه, ومن اتخلص اقرا عليهه آية الكرسي
-- ولكني لست حافظا لآية الكرسي
-- اعتبر نفسك قرأتها لأن الاعمال بالنيات مو بالافعال
--وماذا افعل بباقي الوقت
--بسيطة جدا, انعينك احد وكلاء عبد الزهرة شالوش, هم تفيد وهم تستنفعلك بچم فلس
-- ولكنه نصب على العراقيين البسطاء واستغل ثقتهم بحكومتهم الاسلامية وسذاجة تفكيرهم وسرق اموالهم
-- اولا هو ما سرقهه, هو اخذهه منهم, وثنين, هاي بالنسبة النه اموال حلال وبالنسبه الهم اموال حرام لانها اصلا فلوس امريكيه واذا صرفوهه رب العالمين يذبهم بالنار وحرام الحرام حلال, شنو مادرسوك رياضيات بالابتدائية
-- لدي سؤال بسيط
-- اتفضل عيني
-- هل يعرف دولة رئيس الوزراء بهذه الامور
-- وهو اكو واحد يگدر ايسوي شي بدون علمه
-- ليس لدي سوى كلمة اخيرة
-- اتفضل عيني
-- إلك الله ياعراق
د. نزار احمد
مشغان, الولايات المتحدة الامريكية
[email protected]
#نزار_أحمد (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
