** أمثال القرن 21 الهشامية**

هشام اعبابو

الحوار المتمدن-العدد: 2787 - 2009 / 10 / 2 - 19:16
المحور: الادب والفن
    

الڨيلا بلابيسين و لغدا و لعشا بحكاك السردين
ولد القاع و الباع و اللي طلبو يقول لو باع
سموها جميلة و بينها و بين الجمال ألف ليلة
حتى كلا اتمر عاد قال مر
المغرب بلاد تمر و لحليب
****************************************************
الحج بالسلاف غير تلف
على كليما قطعني ديما
بكيت معاه ضحك عليَ
داب اطعام يبين فيه لحرام
شربتو لعسل شربني الدل

****************************************************

ما بقات لا عائلة و لا يحزنون , أللي دقيت عليه كخبي راسو كلفكرون
هو خالي و انا ولد اختو , و عمر طعامو ما دقتو
طلاني و مني اشكيت دعاني
حاج قال ليك , و السلام مايردهاش عليك
مرات ابا قهرتني و قهرات ابا
****************************************************

أللي بغاني ابغيتو و اللي كرهني للله دعيتو
أللي ما تكوى,ما يحس بالشكوى
دخلتو لداري, بغا يخرجني منها
ازواج اليوم كل قهرا و حكان على الدبرا
ازواج اليوم كل اعجاج و غيوم
*************************************************
لا زين لا دراع و زيداها بتﮛراع
هي خالتي و أنا ولد ختها و عمر درها ما عرفتها
دير الخير و انساه,غدا عند مولاك تلقاه

ما تبدل لمرا الأولى غير بغولا
أللي سلات اسميتها باليا,غرفها جنية
اللي دار الخير فهاد زمان,يرجع ليه معيار و سبان
***************************************************
ولد الجوع وخا يكون عندو قصر شعشوع
قلت مسكينة سعا شعلات لعافية فلمدينة
النبي وصى على السبع جار وهما مشعلين العافية فجار
كلا طعامي واقطغ اسلامي
دارتو والي كلا مالي
حج الحاج و هو يعواج
***************************************************
لحيتو فيها ميترو و اريال ما يصدقو
أللي ما بغاني ,هنـــــــــــــــاني
ازوينا و قريا و فطياب مساليا
أللي بغاني بغيتو و اللي ما بغاني من حياتي محيتو
قالو لي إلى عندك لمعرفة تخدم فالحين,قلت لهم عندي الله و ارضات لوالدين
حاجة و بالفولار و فعايلها دلعار
**************************************************
درت فيها التقة ركبات في الضيقة
خداتو نصراني و زوين نساها العربية و الدين
ربا اللحية و دار العلامة, قال ليك ولا علامة
الازمة المالية راها عليك و عليا,بلا ما تكول رزقي و تجري عليا
سلفني درهم,غرقني هم
**************************************************
هذا زمان إلى بان الخايب قول عليه مزيان
خداها نصرانية نصراتو وفوالديه نساتو
عندو ما يتحرق و ما يتم و إلى طلبتيه يقول ليك حدك تم
غطيتو حتى و لا دفيان قال لي سير يا بالعريان
هذا زمان كترت فيه الحركة و قلات فيه البركة
طيبات دشيشة قالت ليك ولات شميشة
*****************************************************
الطونوبيل بشيفور ومكلتهم طون و حرور
كون ما شرا ليها العيد كون رداتو ﯕديد
الدخول المدرسي نتف لي راسي
شي فلابواط كضانسي و شي فالحياة مكوانسي
الڴارو حضي من شرو
البترول طاح وبطاطا و مطيشة دارو اجناح
*******************************************************
شريت لخوا من عند الشنوا
الشنوي سلعتوا ما تكوي
اشنيولا و دايرا خبلا
سوارت قلبي ما تخوني ما تكدبي
عطاوه الڨيزا ما فكر لا فعزيز و لا فعزيزا
أللي عيب داب يتعيب
*******************************************************
أللي عوج داب يتعوج
شكيت ليه حالي ﯖال لي وانا مالي
تزوجات مينا فضحات لمدينة
زوجها برجل كبير ڴال ليك غادي يعيشها فالخير
فالمغرب شي كيبيع عرق السوس و شي كونجي فطوريمولينوس
كانت لبطاطا طعام المسكين دابا يالله كشوفها بالعين
*****************************************************
اللوبية و لعدس مع المسكين شدوا لعكس
تبعات المسلسل التركي و خلات التربية تبكي
بقا عطيها لتشاط حتى عطات رحيت شياط
ارباطي إلى شاف ضيف كيولي يطاطي
المراكشي يغدي و يعشي
البيضاوي يفرح بالضيف و لو يكون جيبو خاوي
قريت وليدي حتى خدا الإجازة,ارماني فدار العجزة
****************************************************
محمود ولد الجود اللي احتاجو يلقاه موجود
سفيان الصاحب المزيان اللي ما بحالو إنسان
اختي لبنى كلها محنى
خويا أناس ما بحالو حد يا الناس
مع علي عمر الخير ما يسالي
مع عزوز تكل اللوز و الﮜوز
محمد ما بحالو حد..
مع ابراهيم ما تحس بهم ما تحس بضيم..
مع سعيدة تحلى العيشة ولهموم تبقا بعيدة
مع جامع ما تحزن ما تدمع
مع حليمة تحس بالأخوة و للأمومة
عند فاطمة تلقى لعقل و لفهامة
غيتا دكية و عفريتا ..
مع سعيد يكتر الخير ويزيد..
ففايس بوك كلشي مشروك
******************************************************
بوتفليقة فالمعدة يدير الحرقة و فراس يدير اشقيقة
حتى شاف الموت عاد تفكر لخوت
إلى كنت خويا حن فيا و ما تشفي لعدا فيا..
عامرا دهب و جوهر وما تعرف حتى تهدر
فالمنافيق عندك تيق يخصمك مع لحباب و يتلفك على اطريق
الله ينجيك من شي نسيبا تنوض فيك الشيب و الشيبا...
من نهار دخلت لنترنيت ما سليت ..
لبسات الطابلية قالت ليك ولات فرملية
درت الخير ورميتو و عند ربي لقيتو
ولا كبير ولا باغي يطير نسا من كان صغير شحال درت فيه دلخير
*******************************************************
لنفيسة اعطي ارفيسة
كسكسو بسبع خضاري نوكل داري و نعطي لجاري
لمروزيا شحال عزيزة عليا
فلعسل الحر حتى حاجة ما تضر
اللي كلا لخليع فالبرد ما بحالو حد
سلو مزيان لمريض و لعيان
الويزة شحال عزيزة
زريعة الكتان كلشي فيها مزيان
كول لعدس بالقديد إلا نقصك لحديد
عليك يا الحوت شحال كنموت
بلا دجاج بالحامض و الزيتون كيف نكون
للا البسطيلة حتى حد ما يقول لها لا
سيدي الطاجين شحال بنين
لحريرة و رمضان معاهدين من زمان
القهوة بالمسكة الحرة شراب لمرا الحرة
أتاي بالزعفران الحر شراب الراجل الحر
اللي كلا الزنجلان الصحة عليه تبان
القرفة تحيد السخفة
اسكينجبير يجري عالبرد فالحين
الخل فيه الحل
زعلوك يا زعلوك ما وجدوك حتى هلكوك..

ما عرفت بقيمة لعزيز علي حتى مشا علي
مصاحب مع الهم ما يضحك ما يتبسم و كلامو كسم, إلى دويتي معاه تندم
الفلاح إلى ما طحت اشتا يبكي و إلى طاحت يشكي
اللي شرف ما بقا ينفع معاه تجميل و خا تزوقو نهار و ليل
كون معقول و مزيان ما تحتاجش تكول أنا ولد فلان

الي كون صاب يقتلك عمرك ما تضنو يعتقك

حيان عليك يا دنيا كتغلي ارخيص و ترخصي الغالي

*شفوني ما خدامش حقروني و مني طيحو العين
و أنا كنز ما يفنى و بحر فايض بالجود و ماه حلو بحال العين

*حيان عليك يا دنيا و شحال غدارة
توكلي الواحد اليوم الشهد
و لغد ليه تسقيه المر و لمرارة

* ضحكت دقيقة هجرت يوم
كون عرفت الدنيا غدارة
ما كنت نتيقها ولا فبحورها نعوم

*ما معطيا غير القاصح القلب و المسموم
أما لحنين و المزيان مخصم معاه ازهر و لصقا فيه لهموم ..

أمثــــــــــــــال الإنتخابات *

فالإنتخابات انجح و فالحومة بات ما اصبح ...
ثلاثين حزب فالمغرب و نهار تحتاجهم و لا حزب واحد تصيب
صوتو علينا باش غدا نضحكو عليكم
بعت صوتي بميات درهم اركبني ألف هم
اعرف على من تصوت باش غدا ما تشكي ما تغوت
صوت على مرا جرحك إبرا
حزب الخوخة ولا حزب العنبة خليك من الضوخة و قول أش عندك تما
صوت عليك و ضحكتي عليا دابا غدا ترجع لنتخابات و تبدا تقلب عليا

#هشام_اعبابو (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات