ماذا تعرف عن الشيوعية1

جهاد علاونه

الحوار المتمدن-العدد: 2710 - 2009 / 7 / 17 - 09:35
المحور: كتابات ساخرة
    

مالذي تعرفه الناسُ عن الشيوعية ؟, يبدو أن كل الناس تعرف أو تحفظ نفس المعلومات , فالذي يعرفه عامل النظافة في الوطن العربي عن الشيوعية لا يختلف عن الذي يعرفه الطبيب ُ والمهندس والأستاذ الجامعي.

توفي أحد أقربائي , وكنا نجلس أنا وطبيب ومهندس وعامل وشيخ, في بيت العزاء فسألني الطبيب:
الطبيب: شو أخبارك أبو علي.
أنا: مليح جيد..كويس عال العال .

المهندس:أبو علي جنتل مان أخلاقه كويسه ..وشخصيه حبابه ونموذج للإنسان العصامي والمكافح.

الطبيب: شو مكافح ..هو الشيوعي مكافح ؟ في إيش مكافح.

أنا: أنا مش شيوعي يا جماعه.

المهندس: الشيوعي بتزوج أمه وبمارس الجنس مع أخته وبنته وعمته وخالته.
أنا: في مسلم مارس الجنس مع أمه وأكرهها على ذلك , وفي أب مسلم مارس الجنس مع بنته برضاها , وفي غصبن عنها , وفي من كافة الديانات الأخلاق العامة ليس لها علاقة بالدين , إنت حكيت قبل قليل إني جنتل مان ..وأنا مثل ما بتعرفوا لا بصوم ولا بصلي , طيب كيف أنا بتوصفوا أخلاقي إنها عاليه جدا ؟


العامل : أعوذُ بالله منهم ..ول..شو هذول فعلاً كفار.

المهندس: آه لعاد مش كفار , هسع قلي يا أبو علي :شو تعريف الشيوعيه ..؟أو شو تعريفك إلها إنت؟
أنا: أنا مش شيوعي ..روحوا إسألوا الحزب الشيوعي .

الأستاذ الجامعي: أنا ما بحبش أتكلم في السياسه بس إللي بحكيه المهندس صحيح, أنا رحت على روسيا وشفتهم هنالك , إهناك بناتهم بلبسن ..ولا إشي ..
أنا : يعني بدك إياهن يلبسن إشي؟

الأستاذ: آه بدي.
أنا : طيب ماشي شو هو الإشي؟

الأستاذ: الإشي إللي بكون محطوط على الإشي.
أنا : يا زلمه جننتني شو الإشي.

المهندس : خلص يا أبو علي هسع إنت مش عارف شو هو الإشي؟

أنا: وحياة ...ما أنا فاهم الإشي , وكل إشي إبتحكوه عن الإشي مش فاهمه.


العامل : عظيم.

الشيخ : لا حول ولا قوة إلا بالله العلي العظيم , الإشي هو المحطوط على هذاك.

أنا: وين ما إتروحوا في نسوان بلبسن ولا إشي.
الأستاذ: بس بكون الإشي في إشي , مش بكون الإشي بلا إشي .

أنا : أي والله من غير إشي جننتوني.
الشيخ: خلص سكروا على الإشي (الموضوع)

المهندس : الشيوعيه سقطت ببلادها وهذا معناته إنه الإسلام هو الأصح على شانه قائم من يوم يومه والله محافظ عليه وتبنى حفظ القرآن (إنا نحن أنزلنا الذكر وإنا له لحافظون).

الشيخ : صدق الله العظيم.

أنا : أنا مش شيوعي , بس في تعريفات كثيره للشيوعيه , خلاف إنه الشيوعي (بنط على أخته ).
الأستاذ الجامعي : أم أم أمممممممممم شايفين ما شاء الله أبو علي عارف كل شيء والله إنك يا أبو علي إكويس بس لو إنك تترك الأفكار الشيوعيه.؟
أنا : أنا مو شيوعي , وكيف عرفتم أنني شيوعي .؟

الطبيب: كيف إنت بتخبص على إلنت إكثير بتقول إنه يحق للمرأة الزواج بأكثر من رجل ,وكمان المرأة خالقه.

الشيخ: لا لا أنا بعرف أبو علي ثقيل ورزين ومهذب وعلى خلق, والله يا جماعه بستحي أكثر من بنات لبيوت .

المهندس : هو إحنا قايلين خلاف ذلك بس بدنا إحنا مصلحته , بدنا إله الجنه , والله على شان كلنا بنحبه إبنحكيله هذا الحكي.
الشيخ : إليوم أبو علي بنشوفك في صلاة المغرب؟
أنا : آه طبعاً , إن الصلاة تنهى عن الفحشاء والمنكر .

المجموعه: يا سلام ..والله هذا إلدين بحاجتك يا أبو علي ..بدنا جهودك معانا .
أنا: طيب مع أي إسلام بدكوا إياني , إسلام الشيعه ؟ أم إسلام السنه؟أم إسلام الدولة الرأسمالية ؟ أم إسلام الإخوان ؟. أم إسلام السلفية؟ أم إسلام رجال الدعوة؟ أم إسلام حزب التحرير؟أم إسلام الإستعمار؟

المجموعه: شفتوا عاد هذا هو التخبيص, الإسلام ما في أنواع الإسلام هو الإسلام.
أنا: إنشاء الله إني معكم.
الطبيب : إنشاء الله ..والله يا إخوان إنه اليهود عليهم لعنة الله أسسسوا الشيوعية من أجل القضاء على الإسلام.

فمال المهندس على الأستاذ الجامعي وحكاله: ترى الدكتور ما شاء الله عليه قارىء كل المذاهب والله إنه علامة زمانه , كان أبوه هيك وجده هيك علامات .
الأستاذ الجامعي : هلا... جاي إتقلي(تحكيلي) ؟ أناعارف كل هذا الحكي.

العامل: الشيوعيه كلها كسل وتحث الناس على عدم العمل وعلى إضاعة الوقت وعلى عدم الإنتاج ..مش هيك يا أبو علي؟
أنا: أنا مش شيوعي روحوا وإسألوا إلحزب الشيوعي.

المهندس: أي هو في حزب شيوعي ما همه أصلاً الأفغانستانيين كسروهم أي والله الروس بعون ألله ما قدرولهم , والله شفنا مره شريط فيديو كيف المجاهد يأتي من المعركة مفتوح راسه وبخيطوله إياه وفوراً برجع للمعركه يجاهد وبرمي حبة تراب مقرؤ عليها آية الكرسي وفوراً يا إخوان الدبابة بتنفجر.
أنا: فوراً ؟! !!!!!! !!!!...!!!
العامل : فوراً.
الطبيب بقدرة الله.
المهندس والشيخ: إيمانهم قوي زي إيمان الصحابة...اللهم قوي إيمانهم.

أنا: طيب جيبوهم يرموا إسرائيل او الأمريكان في العراق ؟ بتنكة تراب, ويقرأوا عليها سورة من القرآن ؟
المجموعة : لا يمكن حتى يتم الله أمره بين الناس, شفت عاد يا أبو علي إنك مش قارىء القرآن مليح , لو إنك قاري (قارىء) القرآن ما كان حكيت هيك , كله مذكور في القرآن, يجب أن يتجمع اليهود من كل مكان ومن ثم سوف يبعث الله المسيح.
أنا: اللهم لا تدعني أدرك ذاك اليوم...وكمان إذا أجا المسيح أنا خايف يقضي عليكوا ويبارك اليهود, ويبارك الدول التي تحترم الثقافة وحقوق الإنسان والمرأة .
المجموعه: شو يا أبو علي بلشنا ؟
أنا: ما هو إنتوا زدتوها بصراحه , يعني لا أنا شيوعي ولا أبويه شيوعي ولا جدي ماركسي , وهاجمين على الشيوعيه وكأنكم (إتروتسكي المرتد).
الطبيب: كله بأمر الله ,الشيوعيه سقطت ببلادها وكلهم سقطوا وما بقي غير الإسلام, هو الصالح لكل زمان ومكان ..صح أبو علي؟
المهندس : ليش بتشهدوا أبو علي ؟
أنا : يا جماعه أنا علماني مش شيوعي ؟
المجموعه : هلا هلا شو بتقول ؟
أنا : لا ولا شي أنا بس بمزح..هسع بتصير حكايتنا مثل حكاية الإشي..
المجموعة : لا والله غير تحكي شو بتقول, شو علماني هاي؟

أنا : يا جماعه أنا غلطان زلة لسان .

المهندس: مؤسس العلمانية كان صديق ماركس , وكانوا بحقدوا على الإسلام , وهذول كلهم يهود , فأجوا إتفقوا مع بعضهم البعض على شان يقضوا على الإسلام .
المجموعه : أكيذ..الله يجزاك الخير يا مهندس.
المهندس: جمعاً.
أنا : حرما إنشاء الله .

#جهاد_علاونه (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات