كورس وزاري

أبو الحسن سلام

الحوار المتمدن-العدد: 2623 - 2009 / 4 / 21 - 03:33
المحور: الادب والفن
    

الكمبوشة

كورس وزاري

أ.د/ أبو الحسن سلاّم

الكورس : مصطلح يوناني معناه الجوقه أو مجموعة المغنيين أو الممثلين الذين يؤدون فقرة كلامية أو غنائية أداء جماعياً تعبيراً عن رأي عام في المجتمع ونظيره في عالمنا العربي هو الراوي . ولقد عثرت على النت على نص لكورس وزاري معاصر رأيت عرضه على أهل النظر .. وكلكم نظر بس على فكرة لأن اليونان كانت ديمقراطية فالتعبير عن الرأي العام كان جماعي (كورس) ولأن عالمنا العربي غير ديمقراطي يحكمه زعيم وزعيم جداً فللتعبير عن الرأي العام متحدث رسمي اسمه الراوي ؛ (برضو) كلكم نظر :

عضو مخضرم: دا نحس إيه دا اللي راكبني
عشان منا اسمي البحبوحي

يشيلني أو يستكتبني
صك التنازل عن روحي

مجبر أخوكم وموالي
وبعد كل ده يقلبني ؟!

حديث نعمة: قلت الوزارة آهي في إيدك
مع عصفورين فوق صداغك

أحسن ضمانه لتأبيدك
على كرسي شايله على دماغك

أنا عمري ما كنت موالي
مكنش عشمي يقلبني

مسئول معمر ا لحق على مين لو أعرف
أنا كنت مطّمّن خالص

لما الجديد هل وشرّف
في مطرحي وبقيت لايص

أنا اللي طول عمري موالي
شقلب لي خالي ويقلبني

مستموت: أنا اللي ربيت الأجيال
من أمهات وآباء وعيال

دروس خصوصي بقت أنفال
كما الفروض في جميع لحوال

" لِحَوّا " طول عمري موالي
أخرتها برضه تقلبني

متبّت: أنا اللي خادم طوب الأرض
إبرز تنال أحلى وظيفة

خريج آداب تصبح قاضي
الحزب مداخيله شريفه

أنا الموالي للوالي
موجود جنابو إيه يقلبني

فهلاو: لحقت نفسي خفيف في خفيف
جريت على عمي أوصي

أبوس إيديك يا عم عُطيف
خليه يسبني على الكرسي

أملاها بالقمح صومالي
تبقى الغلابه تحلبني

الكورس: إيه رأيكم نعمل رابطه
للزاهدينا في كراسي

يبقى الرئيس صاحب الغبطة
وآهي تمشي أموي وعباسي

والكل لجنابو يوالي
( يشير إلى المخضرم)

المخضرم: بس محدش يقلبني

الكورس: بالتزكية ولآخر العمر

المخضرم: عظيم . تعالوا بقى نأبن
المرحلة اللي مضت بسلام

كورس: نحصي المكاسب وندندن
مش هي دي خُلق الإسلام

معمر: أنا بقول يعني يا ريس
أداءنا وحنا في المنصب

هل كان سليم كله كويس

حديث نعمه: كان أو مكنش إحنا في مطب

المخضرم: الكل كان عبد المأمور
قال انصبوا المنصوب..

الكورس: ننصب
المخضرم: قال ارفعوا المرفوع ..

الكورس: نرفع
المخضرم: قال اجمعوا المجموع ..

الكورس: نجمع
المخضرم: قال اطرحوا المطروح ..

الكورس: نطرح
المخضرم: قال افضحوا المفضوح ..

الكورس: نفضح
المخضرم: قال اقسموا المقسوم ..

الكورس: نقسم
المخضرم: قال ابطحوا المبطوح ..

الكورس: نبطح
المخضرم: قال ادبحوا المدبوح ..

الكورس: ندبح
المخضرم: قال سمحوا المسموح ..

الكورس: نسمح
المخضرم: قال امسحوا الممسوح ..

الكورس: نمسح
المخضرم: قال جرجروا المجرور ..

الكورس: جرجر
المخضرم: قال اطفحوا الطفوح ..

الكورس: نطفح
المخضرم: قال انفخوا المنفوخ ..

الكورس: ننفخ
حديث النعمه: طب شالنا ليه ؟!

الكورس: آه شالنا ليه ؟!

نفذنا كل أوامره تمام .. يسبنا ليه؟

المخضرم: تقدير لينا
الكورس : خلصنا اللي قدرنا عليه . . مفيش جديد .. يسيبنا ليه ؟

متبّت : يسبنا ليه ؟ تقدير لينا .

معمر : ولو مكناش خلصنا؟ حيحصل إيه؟
الرئيس: نبقوا فشلين .. يسبنا ليه ؟
½ الكورس: يعني إن نجحنا يمشينا !!

½ الكورس: ولو فشلنا يمشينا!!

المخلوع الأول: الكرسي لو دام للمرحوم

مكنتش جات " نيللي مظلوم "

الكورس: ( ضحكات)

المخضرم: دخلنا يظهر في الممنوع .. ننهي
الجلسة
الكورس: يا ريس لسه
المخضرم: خلينا للجلسة الجاية

أحد الأعضاء: مش كلنا نوقع برضو

المخلوع الأول: توقعوا ما توقعوش
جلساتكو قرديحي .. بلوش

( ينفض المجلس )

#أبو_الحسن_سلام (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات