صوت الحاج زعيبل ليس للبيع

عودة وهيب

الحوار المتمدن-العدد: 2543 - 2009 / 1 / 31 - 08:23
المحور: كتابات ساخرة
    

أستغرب حاج زعيبل حين شاهد مدير الثانوية( الاستاذ ملا قاسم ) وهو يحمل فوق رأسه ( نضدة ) بطانيّات ، وقال في نفسه :
( هذا قويسم مايشبع من الدنية . هم مدير ثانوية ، وهم صار ملّه ، وهسه يفتر على البيوت ايبيع بطانيّات !!!)
أقترب ( استاذ ملا قاسم ) من زعيبل وسلم عليه ثم قال له :
( اخي اشبيك صافن!! افتحلي باب الديوانية خل ادخل ، رقبتي انكسرت من البطانيات )
فقال زعيبل وهو مشدوه :
- ( استادي .. ملاتي ، انا مااريد اشتري بطانيات )
- ( اخي دفتح الباب وخل ادخل وبعدين نتفاهم )
فتح الحاج زعيبل باب ديوانيته المطل على الشارع فدخل ( استاذ ملا قاسم ) وطرح البطانيات ارضا ثم جلس وهو يلهث فقال له الحاج زعيبل :
- ( ملاتي، انا مااريد بطانيات ، اذا عندك ملابس داخلية او ملابس حريمي طلعهن خل اراويهن لأم جعفر)
- ( حجي ..خل اجر نفسي . هاي البطانيات مو للبيع ، هاي هدية من الدكتور الجعفري )
- ( الدكتور الجعفري موديلي هدية !! شنهي بوية عرفة، ولفة )
- ( نعم بطانية الك وبطانية لزوجتك وفوكاهن ورقتين خُضر )
- ( وبعد شنهي ؟)
- ( والخير ليكدام ، من تفوز قائمة الاصلاح الوطني راح الخير يغركك )
- لابالله بهاي وكفو . انتم سيف المجرب ، بسلامتكم كلشي تمام ، الدنية مضوية ولارشوة ولافساد ولامحسوبية ولانهب ولالغف )
- ( حجي اعرف قصدك .. احنه نختلف . اللي تحجي عنهم همه جماعة المجلس والفضيلة والصدريين . احنه نختلف ، جربنه وشوف )
- ( هي هم هلشكل، راح نصير حقل تجارب . هسه المهم شنو المطلوب مني)
- ( المطلوب كلش بسيط ، تنطينه صوتك ، تنتخبنه يعني )
- ( الله كريم . ايصير خير )
- ( لاحجي مو هلشكل ، لازم تقسم بالقرآن.. اتكول وحق هذا القرآن انتخب قائمة الأصلاح الوطني )
- ( بس ملاتي هذا مايجوز ، هذا باطل وحرام، هذا شراء ذمم )
- ( حجي، الحرام والحلال شغلتنه ، احنه انحلل ونحرم بكيفنه ، انت احلف وماعليك )
- ( بس هاي شوية، حرك ايدك، زودني بطانية وورقة ، معقوله صوتي هيجي رخيص عدكم )
- ( اخوية هذا هو السعر، كل صوت ببطانية وورقة )
- ( زين ملاتي عندي فكرة :
طبعا انت سامع ببيع( الأخضر) ، من جنّه نشتغل بتجارة التمور ، جنّه نشتري من الفلاحين محصول النخل( بالأخضر) يعني نشتري المحصول مال عشر سنوات ليكدام ، فقصدي ليش ماابيعك صوتي مال عشر سنوات )
- ( لا انا مخول بشراء اصوات هذا الموسم فقط )
- ( وداعتك السنة الجاية الاصوات تغله ، اشتروا اصوات مال عشر اسنين وريحوا بالكم)
- ( لا اخي لا )
- زين شيخنه روح اخذلك فرّه وخليني للاخير
- ليش حجي ؟ خير البرعاجله
- مثل ماكتلك ، روح علبيوت الثانية لايجي واحد يغلبك ويشتري أصواتهم.
وبعد خروج( الاستاذ ملا قاسم) بفترة قليله طُرق باب حاج زعيبل بقوة ولما فتح الباب وجد على الباب الشيخ ( ابو تبارك ) يضع ( نضدة) بطانيات فوق عمامته البيضاء . فقال حاج زعيبل :
-( شيخنه بعنه وخلصنه .. اجو شرّاية قبلك )
- ( دفتحلي الباب وبعدين نتفاهم )
دخل الشيخ ( ابو تبارك ) وطرح البطانيات ارضا وجلس وهو يلهث ثم عدّل عمامته وقال :
- ( بكم بعتم )
- ( نعمة شيخنه ..نعمة ، بعنه الراس ببطانيتين اوياهن ورقتين ، يعني انا وزوجتي انطاني استاد ملا قاسم اربع بطانيات واربع اوراق )
- ( هذا لايعقل !! انا اعرف انهم يدفعون بطانية واحدة ومئة دولار عن الصوت الواحد )
- ( شيخنه انت وين تحجي ،السوق انحرك والاسعار كاعد ترتفع ، تدري (علاوي) شكد يدفع ؟ 500 دولار. والشيوعيين ايدفعون ست مية.بس احنه فضلناكم على العلمانيين لان انتم خوش ناس وجربناكم وشفناكم وشفنه نزاهتكم ، فحركوا ايدكم اشوية. قابل انتم خسرانين!! اشو ايران مامقصرة )
- ( طيب راح ادفعلك ثلث بطانيات و300 دولار مقابل كل صوت )
- ( بس شيخنه انا بعت وحلفت ، شلون راح انرهمهه من الناحية الشرعية ؟ )
- ( حجي: يجوز لك شرعا تغيير رأيك ، بعدين احنا هم ندفع اكثر وهم المرجعية ويانة ، فانت راح تربح دنية وآخره )
فُتح باب الديوانية بصورة مفاجئة ودلف الاستاذ ملاقاسم الذي يبدو انه كان يسترق السمع واخذ يصرخ كالمجنون:
- ( شوفوا جماعة شهيد المحراب ، والله الا نحرك السوك عليكم)
- ( يااخي ليش اتصير عصبي كلمن ياخذه رزقه)
- شلون مااصير عصبي شيخنه ، وهاي ثالث مرة تزوّد عليه . تصرفك مخالف للشرع.
- اخي هذا سوق اللي يدفع اكثر يشتري
- انتم عملاء واموالكم حرام بينما احنه اموالنه حلال ، احنه ندفع من اموال الدكتور الخاصة بينما انتم ايران تدفع الكم .
- منين الدكتور الجعفري جاب هاي الفلوس ؟ عبالكم الناس ماتعرف !! هاي كلهه اموال سحت وحرام.
- لا مو صحيح . الدكتور صارله سنين مسؤول عن توريد البطاقة التموينيه والله رزقه رزق حلال، مو مثلكم عملاء لايران.
- وعاد هي اشلون حصة تموينية ، والله بيوم القيامة راح ايجوّونه بكل هاي المواد الفاسدة اللي قبض وراهه ملايين حرام
قاطعهم زعيبل قائلا:
- ولكم بسكم فضحتونه ، عيب عليكم تنشرون غسيلكم الوسخ بديوانية الحسين ، يله اطلعوا انه صوتي مو للبيع. لو تدفعون اموال ايران كلهه ماابيع صوتي.صوت زعيبل مو للبيع ...صوت زعيبل مو للبيع
ثم ( تهدّل ) وراح يلطم باغنية حرّف كلماتها:

الصوت صوتي، والنغم الحاني
والناس ناسي ، وما ابيع انساني
***
الصوت صوتي، وما ابيعه بكل ثمن
هي محنه ، اتروح وي كل المحن
انه ماساوم على بيع الوطن
الكاع كاعي ، والوطن وجداني
والصوت صوتي، والنغم الحاني
****
الصوت صوتي والجروح اجروحي
وياهو ارحم علجرح من روحي ؟
آنه دمعات الوطن من نوحي
شلون ابيعه !! وشرد اكل لحزاني
الصوت صوتي، والنغم الحاني
****
الصوت صوتي ،والوطن معبوده
وآنه كل زودي تره من زوده
انه انذل لو عبرت احدوده
شلون ابيعه لتركي لو ايراني
****
الصوت صوتي والنغم الحاني
والناس ناسي وما ابيع انساني

#عودة_وهيب (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات