دگ عَلَ ربابة مصايبنه

محيي هادي

الحوار المتمدن-العدد: 2356 - 2008 / 7 / 28 - 04:35
المحور: الادب والفن
    

صلى يومه
و ركع ليله
و صام شهره
و نقش بگـصته الزبيبه.
و چـان يحچـي بالنجاسه
و بالطهور.

چـنت أظن و اعتقد بي خوش ولد
انسان صادق و ابن طيبه
بس طلع لي بن الصخل
كلاوچـي أصلي
مو أمين إو مو شريف
يرتشي و معبّي جيبه
و حالته حالة الشرطه ال بالمرور

ينهب الحافي إب بلدنه
و ينزع اللابس، من رِجله، نعاله
ينتف اللُّگـمه من أهلنه
يبوگ من الفُگـر كوخه
و ينهب الساكن بكل أغلى القصور.

و اللي أشوفه اليوم:
چـهره امبچـمه،
لحيه وصخه،
تحجـي گـامت بالسياسه
عمامه سوده مصخمه.
و فينه حمره التفت بكل خرگـه خضرة
هرولت داير مداير ها النذور

كثرت أبواب الصحون بالعمايم
تركض الركض السريع
بالعجل
وره كل اللي تعنّه للأئمه،
و راح يزور

وره كل من اسمه زاير
تنعق الغربان أرباب الكشايد والطلايب
تلزگ الأولاد لزگـه
أكثر من الجد الأول و الأبو.
الگـدايه عدهم خوش شغلة
شغله حلوه من زمان.
و الجهل بيهم فخور.

كثرت المنفعه عدهم،
و الله زادت
مثل مازادت بيبان الصحون.
بالغَـــرَه
و بدون غره.
امتلت الفينه بأشكال النقود.
تفننوا بالكار عدهم
صار من أذكى الفنون.
و كثروا الحراس عد صحن الأئمه و الگـبور

طارت أيام الشوراب
و طار وياهه شعرهه
شَــعره شَـعره
و اجت أيام اللحايا
و كثروا أصحاب النفخ عند العزايم
كثره ما إلهَه حدود ولا نهايه،
لِش وكت تبقه محن نه؟!
لِش وكت كل يوم مكفوخين كفخه؟
طالت الكفخه علينه و علّ أهلنه.
لِش وكت باقين نبچـي
بلا سرور و بلا حبور ؟

و الجريدي ابن الفجور
گـام هم يلبس عمامه
انگـلب دهن قواطي أصلي
وصار نايب من جهلنه
و طوّل لسانه علينه،
هل جسور بن الجسور.

شفت بهل اليوم اللي دا أعيشه:
بين صحن و صحن ثاني
أكو قاعـه للصوص
تمتلي بلص السياسه و الشرور.

ابن مالك گـعد فوگ راس الوزاره
گـعده حلوه،
و بالخفاره
گـام يِـلِـدغه الجعفراني
من الشروق
و كاكه مام الطالباني،
صاحب النذل الكيمياوي،
صار يدغه من الغروب
و كاكه مسعود عنصراني،
يوم يِـهدله ابن الجبوري،
و يوم يِـبرطل مشهداني،
گـام يبعصه من الشمال.
و ابن عمرو بن السعودي
صار ينغزه من الجنوب
حجي نوري بقه مسطول بالإماره
و دايخ بكل الامور.

صرنه گـاعدين عل حديد
و الحاله حاله،
امخوزگين
مثل أيامنه البعيده اللي انگـضت
المريض يبقى مريض
بدون حباية دوه
و العطاشى هم عطاشى
بدون مي حته تشربه، وترتوي،
و بالسحايا اتمرضت
صارت الحبايه سوده
و الدوه بول البعير.
صرنا نضرب بطناش
بطناشنه لِل وره.
و الله شبعونه خره
لا ماي،
لا كهربه،
و لا هَــوه
صرنه ناكل كل حجر
خلصت الأحجار عدنه و الصخور.
و صارت الحاله عند أهل الفرات
حالة المصري، و المحصور
أيام العبور

يمته تخلص هل مصايب؟
إش وكت نقضي علَ كل المصاعب؟
يمته يوصلنه الدوه؟
حته نخلص من مرضنه.
إش وكت راح يصفه ماينه؟
حته ننهي كل عطشنه.
إش وكت نِـتزقنب، براحه، أكلنه،
من صدگ؟
مثل ما ياكلون كل هذوله البشر،
بالصدگ!
شوكت توصل كهرباء ماتنگطع
حته تضوي بكل عگدنه؟
آني أريد أكسر، ال عندي، كل قلم.
آني أريد أنسه كل اللي أكتبه،
و آني أريد أمسح كل هذي السطور

-أسبانيا
25/07/2008

#محيي_هادي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات