حزن علوان

حسين جهيد الحافظ

الحوار المتمدن-العدد: 2206 - 2008 / 2 / 29 - 10:30
المحور: الادب والفن
    

المقدمة
يوم الخميس 26 / 4 / 2007 أفل نجم عن سماء الحزب الشيوعي العراقي في الناصرية اِنه نجم اِبن الناصرية البار علي سعيد ذياب الملقب فخراً بــ ((علوان الدسم ))
فإلى روحه الطاهرة وفي ذكراه السنوية الأولى أهدي (( حزن علوان ))

الحزن بي
حزن بيه الوصف حيران
حزن بدوي وبعد أكثر
حزن أم الاِبنهه .... ولا
وأظلمه لو گلت عنه حزن معدان
حزن حته الحزن ما يگدر اِيجاديه
حزن علوان
الصبر بي
صبر يتلاوه وي الكون وأكثر چان
بس لحظة سمع گالوا مات
طگ حيله وتفسر ذاب
كت يجري دمع بركان
يا نجم الصبح واِتناطرك كل عين
غنوه اِبشفة السهران
أحمد هاذ
أحمد دمعة اِعيونه جرت نهران
اِبوي المات
لو نجم الصبح عالگاع
طايح والسمه حزنان
يا طيبة ضمير وغيرة الوجدان
علوش بيه لهفه اِعليك
يبچيك اِبگلب ولهان
طيور الحب خطيه اِبعشهه تترجاك
وحمامات السلام ولمة الغزلان
ترجع لو رحت علوان
تره جسر النصر بعده
أمل يترجه خطواتك.... أمل حلمان
يمتعب الوكت ما يوم
.......... هزّاك وگلت تعبان


بس الموت .. بويه الموت
صدگ قاسي وخذاك الموت
وصدگ صلفه ووكيحة عين
لأن گدرت تشيلك خشبة التابوت
خويه الناصريه اِعليك تنشدني
حزينه اِبنيل بعدك صبغت الحيطان
شأگله شارع العشرين والحبوبي والأسكان
المقر بيتك يعاين عالوجوه السمر يتنشد
شجاه اِشعطل أجدامه بطه علوان
رفاقك شوگ للنكته وسواليفك
أياد وأحمد وسحبان
الشمس حته الشمس مشتاگه لعيونك
لأنك والشمس تومان
يالشايل شيوعيتك سفينه واِنته بيهه اِشراع
عالي ويعجب السفان
الگمر والليل
واِحروف الجريده وخطوتك صحبان
تعال الموت الك ميلوگ
خله الموت للغمّان
للباع الضمير واِساوم اِعليه زور
موش الموت الك علوان
يا من تمنيت العمر كون اِيطول
بس سنتين
لأن بعدك تظن اِنته اِبرگبتك دين
مطلوب الحزب ديّان
چا ليش اِببساطه فارگتنه وليش
اِهي هاي الاِمروه وغيرة الخوّان
اِشأگلك غير الله اِوياك
واِمودع بألف رحمه وألف غفران
وأگلك خويه سلمنه
على مالك واِبو خالد
على مشرف على حامد
كريم وحيدرونعمان
على كل الرفاق السافروا گبلك
كواكب للمجد عنوان

كواكب عاللأرض شعت وعدهم دين
زلم صلحه النعم منهم شيوعيين
الاِسم بس الاِسم هذا كفو ونعمين
حگه الموت بيكم لون يتباهه
ويشدكم للمنيه اِوسام
وحگه اِبزود حگه اِيواكح الأيّام
ويباهي الدنيه بيكم شوگ
..... واِيلاوي الزمان
لأن اِنتم قضيه ومبدأ واِنسان
فكركم بالثريه اِنجوم تزهي
اِتضوي درب الناس بيضه
وعالعدو نيران
اِنتوا أبراج كل الكون
تبدي اِمن الجدي للقوس
للجوزاء .... للميزان
وأرد اِردود بخدودي الدمع نهران
وأحس حزني
...... حزن بدوي
............. حزن معدان
وأگلك ليش تمشي....
....... اِبهل البساطه ليش ... ؟
واِتسافر غفل علوان
لا چلمة وداع ولا سطر عنوان
تمنيت الچفن ويّاك
ضمني اِبلفته علوان
يالاِسمك قضيه ومبدأ واِنسان
لا كلك قضيه ومبدأ واِنسان
حسين جهيد الحافظ
الناصرية

#حسين_جهيد_الحافظ (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات