احنا اللي ثبتنا إن الذرة ليها صوت

حسن إسماعيل

الحوار المتمدن-العدد: 2153 - 2008 / 1 / 7 - 09:40
المحور: الادب والفن
    

احنا اللي ثبتنا إن الذرة ليها صوت
وإن بول الإبل طعمه زي التوت
وإن الحكومة بتطبطب علينا بالنابوت

قالها أول ما أزمر تنزلي
قالت له انت اشتريت عربية
قالها لأ : اشتريت زمارة !

***
شفتوا فرامل مترو الأنفاق طلعت بايظة
والعبارات بتاعتنا طبعاً بايظة
وطيورنا كلها عندها أنفلونزا يعني بايظة
وسلخانات اللي في خدمة الشعب بدل ما بتخدمهم بتعذبهم .. علشان بايظة
والحل بسيط جداً
الحل .. في الصيانة
صيانة ايه يا عم .. ممكن أسأل حضرتك سؤال
سؤال .. اتفضل يا عم الأمور
اقدم حاجة في مصر واعظم حاجة فيها ايه ؟
الأهرامات
طب .. الهرم شغال ولا مش شغال ؟
شغال زي الفـُل
حد بيعمل له صيانة ؟
لأ طبعاً
يا أبني ربنا بيرزق الدودة في الحجر
والمصري في الريف وفي الحضر
افهموها بى
***

إنتوا عارفين إن المكوك بتاع الفضاء ده القديم ولعوا فيه خلاص
لأن تاريخ صلاحيته انتهى ؟
يا راجل .. بجد
صدقني .. هناك كل حاجة تاريخ انتاجها بينتهي بيتخلصوا منها على طول
علشان الجديد ينزل والروبابيكيا تتفرم وتتعمل حاجة تانية خالص
سبحانه يا جدع
يا مثبت العقل في الراس
والغسيل في البـُطاس
احنا يا جدع ما فيش حاجة عندنا مدة صلاحيتها بتنتهي ..
سمك يعفن .. يبقى فسيخ علشان ناكله
حاجة تجنن ماعندناش حاجة بتنتهي
علشان احنا الاصل .. والثوابت .. والعزة .. والكرامة
لأ في حاجات بتنتهي وحاجات بتنزل
ايه طيب ؟!
الغازية .. الغازية لازم تنزل

***

سمعت على موضوع الليزر ؟1
آه سمعت .. ايه يعني ؟
طب سمعت على موضوع الاستنساخ والخلايا الجزعية ؟
والنعجة البت دوللي ؟
آه سمعت .. عادي
طب سمعت عن الفيمتوثانية ؟
ايه يعني عايز تقول ايه ؟ انهم WOW ؟
طب سمعت انت على بول الإبل ؟
آه سمعت
جربته ؟
لأ .. تبقى مش من مستوايا
أنا بقى جربته .. مش واخد بالك إن فيه حاجة متغيرة
واخد بس مش عارف إيه هي
طيب مش هقولك وهسيبك تعرفها لوحدك

***

عارف أحلى حاجة فينا ..
إن الطالع مننا كأنه نازل
وإن الرايح مننا كأنه جاي
حاجة عجيبة قوي
واللي بيحفر هو اللي بيردم
واللي بيحلف .. هو هو اللي بيكذب
بس يا راجل احنا شعب طيب
قوي قوي ..
وصبور قوي قوي
وراضي قوي قوي
ونظيف قوي قوي
وشيك قوي قوي ومتحضر قوي قوي
وبيفرفر بقالوا 7000 سنة ولسه فيه الروح يا قوي

***

انت في حزب ايه ؟
أنا الحمد لله في الحزب الوطني
وإنت ؟
أنا .. أنا في حزب معارضة
بجد ؟!
آه والله ..
طب جدع
فكرني احضر معاك مرة ندوة
وانت والنبي متنساش موضوع ابن خالتي ، تكلم لي حد من لجنة السياسات علشان القرض
من عيني يا راجل
انت معارض .. يعني تأمر

***

سمعت إنك أمين عام منظمة لحقوق الإنسان
آه من زمان
وطب وبتدافعوا عن إيه ؟
عن الإنسان
عن الإنسان .. أنهو ؟ ده ؟
الإنسان ده اللي مغرق شوارع مصر المحروسة
قصدك اللي عمال يزعق ويزمر ويشتم
ويرمي زبالة ويكسر إشارات المرور
ويرتشي ويزور ويعذب ويتعذب
الصابر الطيب الجدع .. ده
آه هنعمل ايه معندناش انسان غيره ندافع عنه
طيب ربنا معاكم

***

فاكر زمان كنا بنقول الانحلال في الغرب
لكن احنا أحلى من الشرف ما فيش
فاكر زمان .. لما كنا بنقول هناك إن البنت والولد بعد سن 16 سنة بيسيبوا بيوت أهليهم ويمشوا
واحنا كنا هنا نفتخر بصلة الرحم وبر الوالدين
والجنة تحت أقدام الأمهات
فاكر طبعاً .. قل الزمان ارجع يا زمان
البت اختك فين ؟!
طب وإنت امك فين ؟!

***

مش قادر اصدق ازاي الحكومة رغم كل الإضرابات دي والمظاهرات وكتابات المعارضة
وتقارير منظمات حقوق الإنسان وقطع حبة ملايين من المعونة الامريكية
كل ده مش هممها .. ولا فارق معاها
وكأنها .. بتقولنا كلنا .. طـُظ
عادي يا عم ما احنا اتعودنا على طـُظ دي
وبالذات بعد ما مرشد الإخوان المسلمين " مهدي عاكف " قال طـُظ في مصر
فعلا ( طظ بيعيش فينا مش بنعيش فيه )
***

ايه رأيك في أقباط المهجر
خونة ولا عملاء .. ولا زملكويا؟
طيب .. وإنت ايه رأيك انت في مسلمين الداخل ؟
طيبين ولا مغلوب على امرهم ولا اهلاويا .....
طيب اسكت دلوقت .. نكمل كلامنا بعد الآدان

***

اقول السلام عليكم
ولا اقول صباح الخير
اقول الله أكبر ولله الحمد
ولا اقول الحمد لله مستورة وكده رضا
اقول .. أو لا اقول
عايز رأيي ؟
آه يا ريت
انت بالذات تخرس خالص

#حسن_إسماعيل (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات