ثرثره عراقيه على دجله...ح/1

علي الصفار

الحوار المتمدن-العدد: 1956 - 2007 / 6 / 24 - 11:49
المحور: مواضيع وابحاث سياسية
    

{أصيب عباس العراقي بأربع رصاصات بينما كان يمشي يوما ما في احد شوارع بغداد بسبب مواجهات حدثت بين ألأرهابيين والميليشيات والقوات الحكوميه والأميركيه،ظل عباس في المستشفى لأسابيع ولم يستطع ألأطباء إخراج الرصاصات والتي كانت بأربعة انواع، المهم منذ تلك الحادثه اصبح عباس العراقي شخصا آخر يقضي وقته على نهر دجله يتحدث معه ويصر على ان اعظم مافي دجله انه شاهد على كل ماحدث ويحدث في العراق وانه أي دجله يسجل كل الأحداث في سجل خاص به بكل حياديه وسيأتي يوم يحكيها بصوت مدوي ...احيانا يتكلم عباس مع دجله بصوت عالي ونحن معه معتقدا اننا لانسمع مايقول وحتى لو سمعنا فلن نفهم لأنه يتحدث معه بلغه خاصه تعلمها عندما رقد في مستشفى مدينة الطب الكائنه على نهر دجله..واليكم بعض احاديثه التي سجلتها بدون علمه و قد تكون هلوسات وعلينا مسامحته بسبب حالته والرصاصات ألأربعه ولأننا قد نصبح مثله يوما ما كما يؤكد ..}.

خامنئي شيعي لو ايراني

(العراقيين دايخين وآني منهم..الشيعه صفويه تابعين لأيران مثل مايكول الضاري والدليمي..وايران تساعد القاعده..والقاعده تذبح الشيعه....والشيعه جماعة ايران..شلون ماتركبها ماتركب..ايران يقودها الخامنئي اللي يريد ياخذ بثار الحسين من احفاد يزيد...بس الحرس الثوري يدعم انصار يزيد ....العفو قصدي انصار السنه..اذا طبقت المعادلات الرياضيه اللي درسناها راح يطلع خامنئي من جماعة يزيد .. لو القاعده خوارج ..معقوله...زين هاي عوفها خامنئي يريد يسوي دوله اسلاميه موحده يقودها اتباع آل البيت ..هم ميخالف شكو بيها..بس من راح صديم لليوم الشيعه صاروا شذر مذر، جنا نسمع بالسيستاني والصدر، هسه صاروا اثنعش جهه يعقوبي وصرخي وخالصي وووو..يعني بعدد الأئمه...وكلها تقبض من ايران لعد ليش يتعاركون بيناتهم ونكسو عكلنا ....بعدين اذا هو- قصدي خامنئي- للشيعه ماكدر يوحدهم شلون راح يوحد المسلمين وهمه تلاثه وسبعين فرقه واحد ينهش باللاخ، هو للمتوحدين فرقهم ، ماأدري شلون راح يقنعنا إحنا اللي مانصلي ..اشو بالعكس حتى المؤمن راح يصير ملحد من وره سوالفهم..شلون ماأحسبها ماترهم، الا اذا جان حامنئي لا مسلم ولاشيعي، رجال ايراني يدور مصلحة بلده وهذا حقه ..بس العتب على ربعنا ليش مايصيرون عراقيين، اشو مقسمين لو امريكي لو ايراني لو سوري لو سعودي لو تركي..معقوله كلهم تبعيه .ها دجله اشو تضحك جنك تعرف وين الصدك..).

* يلكفها وهيه طايره
(( محد حسد العراقيين غير يوسف العاني الله يطول عمره..بكل مسرحيه جان يكول العراقيين سريعي البديهيه ..ومن يشوف محد دايفتهم يكللهم شبيكم سريع البديهيه يعني يلكفها وهيه طايره.. ومن ملحته انكلبت ألأيه ،لأن مامعقوله جماعتنا السياسين ميدرون ان ألأمريكان من مصلحتهم يبقه الوضع مخربط وايدهم بجيب الكل من ارهابيين ( قصدي المقاومه الشريفه) الى الدليمي والضاري الى الحكومه،معقوله مسامعين شلون ألأميركان يحمون( المقاومه الشريفه) بالرمادي وبعقوبه وحي الجامعه والعامريه والدوره واللطيفيه وبنفس الوكت يريدون من الحكومه تحل المشكله..والأتعس من يزعل الشيعه ويه السنه إثنينهم يروحون يم ألأميركان حتى يصالحوهم وهمه اللي سوو المشكله..سامعين رئيس وزراء وقائد عام للقوات المسلحه يكول ماأكدر احرك لواء بالجيش إلا يوافقون ألأمريكان..ويريدنا نحترمه ونخاف منه وجماله يسكت من يكلوله ألأمريكان انت موكدها وماضابط شغلتك .زين اذا يخاف منهم عالأقل خلي يكللنا النا شنو الفلم..والمشكله بالبقيه كلهم مدري شبيهم من توصل يم ألأمريكان يطفون محد دايحجي الحقيقه ...يجوز ميدرون..لعد شلون يوسف العاني جان خابصنه بالعراقيين يلكفوها وهيه طايره..إلا اذا الربع كلهم موعراقيين ...هم احتمال لأن احنا العراقيين كلنا لو تبعيه ايرانيه لو عصمليه...)).

#علي_الصفار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات