تابعت باهتمام شديد مواقع الدردشة على شبكة الانترنت وخاصة التى يدخل عليها عددة كبير من شباب مصر لطرح الاراء والافكار حول امور عديدة فى الحياة الشبابية الان.
فى ماذا يتحدث الشباب ؟ وهل الاسماء الحركية التى يدخل بها الشباب على المواقع لها دلالة معينة؟
وما هى الفائدة التى تعود على الشباب من وراء تلك المناقشات؟ وما هو موقف المشرفين على تلك الموقع عندما تتحول حجرات الدردشة الى حوارات لاذعة ونقد مباشر لسياسات النظام القائم؟
قضايا مصركلها تثار يوميا على مواقع الدردشة حتى اننا سمعنا مؤخرا ان المخابرات الاسرائيلية تتابع باهتمام تلك المواقع التى يدخل عليها الشباب المصرى لمعرفة ماذا يحدث فى مصر, اذن الموضوع خطير ويحتاج الى تحليل عميق وعرض موضوعى بدون تدخل , كل ذلك فى هذا التقرير.
من اكثر المواقع التى يدخل شباب مصر عليها هما موقعى (مصراوى ومصر)او(masrawy وegypty) ومن اكثر الموضعات التى تابعتها كانت يو م الجمعة الماضية على موقع مصراوى عندما دخل مجموعة من الشباب على حجرة مصراوى عندما دخل احد الشباب باسم حركى لاحد كبار المسئولين فى مصر وفوجئنا بان الحجرة تحولت الى مناقشات تحمل كم هائل من الانتقادات للاوضاع الراهنة من شباب مصر, كان الشباب يتحدثون باسماء حركية مثل: بطيخة وسمسة وعايز بنت حلوة والصايعة والفاشل والحب الحقيقى ونفسى فى صديقة وميدو مشاكل ومدام فلة القلة ووسعودى جاى مصر بعد شهر وعاشق محمد منير وحبيبة الكل ومفيش ولا بنت مؤدبة والطيار وضابط فى البحرية وامين شرطة والمنافق والمغنواتى والحزينة والمحبط ووغيرها , وبمجرد دخول ذلك المسئول الكبير فى مصر خرج الشباب ودخولوا باسماء حركية اخرى منهم وزراء فى الدفاع والصحة والتربية والتعليم والتعليم العالى والداخلية والخارجية ورئيسى مجلس الشعب والشورى وكان هذا هو نص الحوار:
.. اخبار الشعب..
المسئول الكبير :اية اخبار الشعب؟, فرد علية شاب يحمل اسم حركى لمواطن مصرى : ذى الذفت والشعب تعبان وبيموت من الجوع والواسطة والكوسة مالية البلد وبالذات فى كلية الشرطة , فقال المسئول الكبير : انا مقصدشى كدة انا قصدى الناس بتحبنى ولا لا ؟ فر علية شاب اسمة الحركى منافق وقال : يا باشا كل شئى تمام المواصلات فاضية والشقق كتير ورخيصة والاسعار رخيصة والحياة جميلة وهادئة والناس كلها شبعانة والشباب بيشتغل والوظائف مالية الدنيا ومياة الشرب نظيفة والبلد فيها فلوس كتير ومفيهاش حرامية ولا لصوص ويا باشا كل الناس بتحبك وبتموت فيك كمان ونفسنا نشيلك فى عنينا
دخل شاب اخر يحمل اسم حركى لوزير الدفاع وقال للمسؤال الكبير : احنا لازم نحارب اسرائيل ونطردهم من المنطقة العرببية فقال المسئول الكبير : لا احنا لازم نعرف ان اسرائيل مش لوحدها دى معاها امريكا واحنا مش قدهم , فرد علية المواطن المصرى قائلا : هنبقى ادهم امتى يا باشا؟ !
هنا دخل فى الحوار شاب اخر يحمل اسم حركى لجورج بوش وقال للمسئول الكبير: انا تحت امرك يا باشا , هو الشعب مغلبك لية نجيب قوات امريكية تحميك يا باشا , وهنا ثار وزير الدفاع وقال: لا يا باشا اوعى توافق لو جات قوات امريكية مصر مش هتخرج ذى ما حصل فى فلسطين والعراق وهنبقى دولة محتلة تانى , فدخل شاب يحمل اسم شارون رئيس الوزراء الاسرائيلى وقال : انت غبى يا وزير الدفاع انت فاكر ان انتوا مش محتلين , الاحتلال يا حبيبى مش لازم يكون بالجيوش فية حاجات تانية كتير انت عارفها وانا عارفها والباشا عارفها .
وهنا دخل شاب اخر تحت اسم المقهور وصاح قائلا : ثورة ثورة حتى النصر .. ثورة علشان نحرر مصر , وهنا دخل الشاب الذى يحمل اسم المنافق وقال: نحرروا مصر من اية , مصر حرة مستقلة انتصرنا على الاسرائيليين فى حرب اكتوبر المجيد وكان رئيسنا مبارك هو قائد الحرب والسلام وصاحب الضربة الجوية الاولى والاخيرة , والاخيرة هنا يعنى هو مش عايز حرب بعد كدة علشان يحافظ على استقرار المواطن المصرى اللى بيعيش اذهى عصور الديمقراطية وكل واحد بيقول رائية بكل حرية ومفيش معتقلات وكلنا شاركنا فى المظاهرات الاخيرة اللى كانت علشان العراق حتى الناس سكتت بعد كدة مش عارف لية ؟ , والناس اللى فى قلوبها حقد على النظام قالوا ان الامن احرق سيارة المطافى يوم المظاهرات علشان تبقى حجة للقبض على المتظاهرين واعتقال المواطنين وضربهم واطلاق الرصاص عليهم ذى ما حصل , والنبى فية غباء اكبر من كدة هى الحكومة هتحرق عربية المطافى لية هو احنا يعنى عندنا كام عربية مطافى ؟ !!
بعد ذلك دخل شاب اسمة المكبوت قوى وصاح قائلا : لا الة الا اللة , الى الجهاد , اطردوا بوش وشارون من على الشات , اطردوا الاعداء , طهروا البلد من الفساد , وهنا قال الجميع فى صوت واحد : لابد من طرد الامريكان والاسرائيلين من مصر فورا , وبالفعل خرج بوش وشارون من على الشات وتم تطهير حجرة الدردشة منهما .
وبعد ان نجح الشباب من طرد بوش وشارون دخل شاب تحت اسم حركى هو: خايف لما اتخرج من الجامعة ووجة سؤالا الى كل من الدكتور حسين كامل بهاء الدين وزير التربية والتعليم والدكتور مفيد شهاب وزير التعليم العالى سال الشاب قائلا : المناهج صعبة وعقيمة ومتخلفة وبعدين لما بنتخرج بنلاقى مناهج تانية خالص للحياة وبنشتغل فى حاجة تانية يعنى يبقى الراجل المناسب مش فى المكان المناسب , وبعدين اللى لة ظهر مبينضربشى على بطنة يا بشوات , وهنا دخل الشاب المنافق وقال : كل الكلام دة كذب طبعا والدليل ان اصلا مفيش شغل يبقى الشباب هيشتغل فى مجال غير تخصصة اذاى ويبقى الشاب المناسب مش فى مكانة المناسب دى مفيش مكان اصلا !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
وهنا دخل شاب اخر تحت اسم حركى وهو : شاب عايز يدخل كلية الشرطة وطالب وزير الداخلية ان يتحدث معة فدخل شاب اخر يحمل اسم وزير الداخلية , قال الشاب يا سيادة الوزير انا نفسى ادخل كلية الشرطة وابقى ضابط بس خايف اقدم علشان مش معاية 12 الف جنية للواسطة وبعدين انا ابوية فلاح وغلبان معندناش ارض ولا حاجة والحكومة طردتنا من الارض وخدوها الملاك ينفع ادخل الكلية يا ريس , فقال الوزير : يا ابنى كل الكلام دة فارغ مفيش حاجة اسمها واسطة , بقى هو لو فية واسطة مش كان زمان دلوقتى بقى عندنا ضباط مش كويسيين تعالى شوف كل الضباط اللى عندنا مؤدبين وبيحبوا الناس ومبيضربوهمشى واخلاقهم عالية خالص وكل الشعب بيشكر فى ضباط الشرطة , تبقى فين الواسطة بقى ؟ فقال الشاب : يا باشا اخوية الكبير خرج من كشف ( القدرات ) عشان ممعهوش واسطة فقال الوزير : تلاقى كان عندة بلهارسيا !!!!!!!!!!!!!!!!!!!!!!!!!!!!!!!!!!!!!!!!!
دخلت فتاة تحت اسم : بنت مصرية وقالت : انا سمعت كدة ان الحكومة عايزة تقعد النسوان فى البيت علشان الشباب يشتغل فرد عليها شاب اطلق على نفسة اسم وزير الثقافة وقال : الكلام دى مش صحيح دى اشاعات الحكومة عندنا تولى المراء اهتمام غير عادى وتضعها فى مقدمة الامورو ليس المؤخرة كما يردد الناس والدليل انها اصبحت قاضية فى عهد الرئيس مبارك فرد علية شاب اطلق على نفسة وزير الاعلام قائلا: اية يا وزير الثقافة انت مالك ومال المراءة دى حاجة مشتخصصك خالص ولا اية ؟؟؟!
. بيكرة الحكومة
ومن المناقشات الاخرى فى نفس الحوار هو دخول شاب يحمل اسم : واحد بيكرة الحكومة وقال موجها كلامة الى المسئول الكبير : يا باشا كل يوم الاسعار بترتفع وكيلوا اللحمة بقىباثنين وعشرين جنية وابوية بيجيب لنا كل شهر نصف كيلو لحمة واحنا اسرة مكونة من سبعة افراد ,ناهيك عن اسعار الكتب الدراسية والخضار والملابس فقال المسئول : هو الكلام دة انا مش قلتة اكثر من مرة لية متبقوش ثلاثة افراد , ابوك فضل يخلف لحد مبقينا سبعين مليون جنية لية ابوك يعمل كدة , عموما الحكومة عندها خطة شارك فيها وزير الثقافة تهدف الى تحديد النسل وفية اقتراح اننا نحط حبوب منع الحمل للنسوان فى مياة الشرب بتاع الحكومة , فقال الشاب طيب يا باشا ممكن الرجالة يشربوا من المية دى فقال المسئول لا احنا عندنا خطة ممكن نعرف من خلاها اوقات تواجد كل راجل فى بيتة , وهنا قال الشاب : انا مكنتش اعرف ان ابويا ورا المصايب دى كلها وهو اللى مخلف السبعين مليون !!!!!
ويبدوا للقارئ اننا تتدخل فى صياغة الحوارت ولكن الحقيقة ان هذا ما حدث بالفعل ولكننى دخلت فقط باسم احد المسؤلين , لفت الانتباة هنا ذلك الشاب الذى دخل تحت اسم : مين انا ووجة سؤالة لوزير الصحة قائلا : يا معالى الوزير انا من الشرقية وامى مريض بالقلب وبقالنا خمس سنين نلف وندور على حضرتك علشان عايزين نعالجها على نفقة الدولة فقال الوزير : انا يا ابنى بابى مفتوح فقال الشاب : احنا جينا السنة اللى فاتت لقيناه مقفول فقال الوزير : ايوة اصلك مش عارف الحكاية وهى ان دى حصل مع الوزير اللى قبلى وتعالى وجرب هتلاقية مفتوح .
. ثمن الحرية
وبعد ذلك دخل شاب اسمة ثمن الحرية وقال : الحكومة دى لاذم تتغير ولاذم يجى شباب , فرد علية الشاب المنافق قائلا : كل اللى بتقولة دى بيحصل دلوقتى انت مسمعتش عن الفكر الجديد فى الحزب الوطنى الحاكم اللى بيقودة السيد المحترم جمال مبارك ابن الريس اطال اللة فى عمرة وان شاء اللة الفكر دة مش هيبقى قديم ابدا وجمال بية احسن واحد يقود السفينة يطلع بينا بيها من تحت المية, وبعدين كل الوزراء دلوقتى بيعيشوا مرحلة الشباب بس شباب الروح , عندك مثلا وزير الاعلام عند 75 سنة وبقالة 21 سنة فى الوزارة و كمال الشاذلى بقالة 27 سنة فى السلطة ووزير العدل عندة 81 سنة وغيرة وغيرة وعلى ايدهم البلد حالها كويس اية يعنى لما يبقى فية شوية بطالة وفقر طيب دى الصومال فيها فقر وبطالة وبعدين كفاية الديمقراطية اللى احنا بنستنشقها كل يوم والهوى الملوث دى مش من الديمقراطية دى من الاشجار الصناعية وعادم ووابير الجاز .
. شركة الكوسة
وفى النهاية فى النهاية دخل شاب اطلق على نفسة اسم رئيس الوزراء وقال: اسمعوا يا شباب مصر اخبار سارة علشان تعرفوا ان الحكومة بتحبكوا واليكم مايلى :
تعلن شركة الكوسة للصناعات الغذائية .. ج . م . ع, شارع مجلس الوزراء الدور الاول عمارة رقم واحد على ما يلى :
تعلن الشركة عن حاجتها لوظيفة صبى من الدرجة الاولى ويشترط فية الشروط التالية ::
1- ان يبدا الاسم بحرف الميم واسم عائلتة بحرف الميم
2- الا يزيد طولة عن 170 سم حتى يتناسب مع ارتفاع الخزينة
3- ان يجيد اللغة العبرية ولا يشترط اجادة اللغة العربية
4- الا يكون عضو فى اى حزب معارض
5- الا يكون احد اقاربة لة علاقة باى شخص على علاقة باحزاب المعارضة
6- ان يكون عضو فى الحزب الوطنى
7- ان يجيد اللعب بالبيضة والحجر
8- ان يكون حاصل على مؤهل عال جدا
9- الا يزيد سنة عن 55 سنة
10- ان يكون احد اقاربة شارك فى حفر القناة الاولى
واضاف رئيس الوزراء
: وسيسمح للفائز وهو يعرف نفسة على المزايا التالية :
1- اقامة كاملة لمدة اربعة ايام فى وزارة التربية والتعليم شاملة ثلاث وجبات يوميا
2- سيسمح للفائز بمرافقة السيد رئيس مجلس الادارة والجلوس مع زوجتة عشر دقائق يوميا
3- سيصرف للفائز فردة حذاء شمال معند مرور عام سيصرف لة الفردة اليمين
ومن يجد فى نفسة المواصفات المطلوبة فليتقدم على العنوان المذكور واخر موعد للتقدم لم يحدد بعد
. محاولات طرد
والمثير هنا ان المشرف على هذة الحجرة قام بطرد عدد من الوزراء من على الشات بعد ان فوجئ الشباب بدخول شاب اطلق على نفسة صدام حسين واخر باسم اسامة بن لادن ودخل شخص يبدو انة المشرف طالب الشباب بعدم الكلام فى السياسة موكدا ان الشات مراقب من الامن ومن الممكن معرفة اماكن واسماء الشباب ونصحهم بالعودة الى الكلام عن الحب والبنات والكرة , وهنا قال احد الشباب للمشرف هسالك سؤال لو جاوبت صح مش هنتكلم فى السياسة والسوال هو: لية شارون مبيحبش ليلة الدخلة ؟؟ فقال المشرف : علشان فيها فتح وحماس وجهاد ومقاومة , وهنا استجاب الشباب للمشرف وغيروا اسمائهم الحركية التى تحمل اسم المسئولين ودخلوا باسماء اخرى ولكنهم لم يغيروا الكلام واستمروا فى الحديث عن السياسة
تقرير: عبدالوهاب خضر
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
