كيميا السرطان (8) شهر رمضان وكيميا السرطان

أيمن غالى

الحوار المتمدن-العدد: 8293 - 2025 / 3 / 26 - 22:18
المحور: الطب , والعلوم
    

إتكلمنا فى الحلقات السابقة عن مفهوم كيميا السرطان Cancer Chemistry, وعرفنا يعنى إيه سرطان Cancer وإزاى بيحصل ويعنى إيه مادة مُسرطنة Carcinogenic ..
وعرفنا إنه مش معنى تناول مادة مسرطنة؛ إنها حا تسبب مرض السرطان فى الحال, وإنه ضرورى إن الشخص يتناول المادة المُسرطنة بتركيزات عالية (غير مسموح بيها) ولفترات طويلة مع الإستعداد الجينى للشخص مع عوامل أخرى ..

إيه بقى علاقة شهر رمضان بالمسرطنات وكيميا السرطان ؟
عادات المصريين الغذائية فى شهر رمضان؛ بتاخد شكل عجيب ومختلف عن باقى السنة فى إستهلاك مشروبات بعينها وبكثافة غير عادية عند الإفطار وبعده .. ومبدأ المشروبات مش غلط لكن فيه كارثة صحية ما حدش واخد باله منها ..
حا نلاحظ إن مشروبات رمضان المعروفة ومشهورة فى الشارع المصرى مرطرطة فى الشوارع وبأسعار بخسة وبأقل من تمن السكر المضاف إليها؛ علشان كده معظم المصريين بيشتروا مشروباتهم من الشارع وما بيعملوهاش فى البيوت ..
البعض بيعتقد إن أسعار المشروبات بتنخفض وبيبقى سعرها أقل من تكلفتها كنوع من تقوى البياعين ومساهماتهم بذكاتهم فى التكلفة لتخفيض الأسعار وجمع حسنات طوال الشهر ..

نشوف مع بعض الكارثة وسبب إنخفاض أسعار المشروبات دى ..
المشروبات دى (تمر هندى, سوبيا, خروب, وغيرها) لا فيها ريحة التمر هندى ولا مكونات السوبيا (لبن وجوز هند) ولا الخروب ولا فيها فتفوتة سكر ..
دى كلها ألوان صناعية (مُسرطنة), ونكهة صناعية (بعضها غير صحى), وبديل السكر؛ السكارين Saccharine (المُسرطن) الغير مسموح بيه غذائياً, وهو أرخص سكر صناعي في العالم ودرجة تحليته 400% للسكر العادي (سكر القصب Sucrose) ..
ومع سعر السوق الزهيد ده (تكلفة اللتر بتبقى أقل من ربع جنيه مصرى)؛ يعنى البايع بيبقى كسبان منك حوالي 90% من تمن المشروب المضروب إللي يا عالم بيعمله في براميل شكلها إيه وبيقلبها بعصاية مقشة؛ فى غياب الرقابة الصحية ..
إعتبروا المشروبات دي ماية مجاري (صرف صحي) .. ينفع نشرب ماية مجاري ؟!!

يعنى بتناول المشروبات الكارثية دى؛ بيتم تناول مواد مُسرطنة بكثافة عالية قد تكون السبب فى الإصابة بالسرطانات وبالأخص سرطان الكبد Liver Cancer بسبب المسرطنات من ألوان ومكسبات الطعم ؛ إلى جانب المضاعفات الناتجة عن تناول السكارين وإللى بتشير نتائج الدراسات إلى أن استهلاك السكارين على المدى الطويل يزيد من خطر الإصابة بالسمنة Obesity ومرض السكري Diabetes، بالإضافة إلى ضعف وظائف الكبد والكلى Liver and Renal impairment. كما تشير النتائج إلى زيادة خطر الإصابة بسرطان المخ Brain carcinogenesis ..

للمزيد لأهل التخصص
Medicina (Kaunas). 2019 Oct 955(10):681. doi: 10.3390/medicina55100681

الموضوع من سلسلة موضوعات عن تمصير وتبسيط العلوم تحت الهاشتاجات:
#حصة_كيميا
#تمصير_العلوم
#تبسيط_العلوم

#أيمن_غالى (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات