إزاي نزود تاريخ صلاحية الأدوية ؟ (3)

أيمن غالى

الحوار المتمدن-العدد: 8280 - 2025 / 3 / 13 - 18:29
المحور: الطب , والعلوم
    

في الجزء إللي فات من كلامنا عن صلاحية الأدوية؛ قولنا إنه عندنا نوعين من المركبات؛ منها مركبات أيونية Ionic Compounds مالهاش تاريخ صلاحية وتعيش للأبد، ومركبات تساهمية Covalent Compounds، ودي بيبقي لها تاريخ صلاحية, وتاريخ صلاحية كل مادة من المركبات التساهمية بتختلف عن التانية؛ لكن شركات الأدوية مريحة دماغها وبتكتب تاريخ صلاحية موحد للكل حتي للمركبات إللي بتعيش للأبد (زى ما وضحنا إنها لأغراض قانونية أو تجارية) ..
والمركبات التساهمية منها الأدوية الزيتية Oils والهرمونية Hormones والبروتينات Proteins والإنزيمات Enzymes والفيتامينات Vitamins والمكملات الغذائية Food Supplements .. وإللي منها بيكون في صورة جافة Dry Form؛ ممكن يعيش لسنين طويلة؛ لكن المشكلة في إللي موجود في صورة سايلة Liquid Form، وإللي موجود في صورة سايلة من المركبات التساهمية لزيادة مدة صلاحيتها؛ نحطها في أرفف باب التلاجة من تحت (فى درجات حرارة أعلى من درجة التجمد 4-8 درجة مئوية, ونتجنب تجميدها) ..
نلاحظ إن معظم المركبات التساهمية هى مركبات عضوية Organic Materials وإللى هى مادة غذائية بتتغذى عليها الميكروبات المختلفة من بكتريا وفطريات وغيرها ومعنى تلوث المادة الدوائية بميكروبات؛ هو فسادها وعدم صلاحيتها للإستخدام الآدمى كدواء؛ علشان كده بيتم إضافة مواد - أثناء مرحلة التصنيع - وظيفتها قتل الميكروبات وعدم تكاثرها (كحول, جلسرين, .. ومواد أخرى)
ونلاحظ إن الأدوية دي بتبقي دايماً محطوطة في أزايز بني Dark Bottles وداخل علبة كرتون .. ما نرميش العلبة وضروري نحتفظ بالإزازة داخلها؛ علشان نمنع وصول الضوء لإزازة الدوا؛ لإن المركبات دي بتتكسر من الضوء، ومع فتح أزايز الأدوية دي؛ ناخد جرعتنا ونقفلها علي طول علشان ما يدخلهاش أكسجين كتير (من الهوا)؛ بيتفاعل معاها ويكسرها أو يغيّر من شكلها الفراغى - يعنى ممكن تتحول لمركب آخر - ويقلل من عمرها أو فاعليتها (في وجود الضوء أو الحرارة)؛ يعنى أكسجين الهوا بيصعُب تفاعله مع مكونات الأدوية السايلة إذا كانت محفوظة في مكان بارد ومُظلم, وبالتالى تمتد مدة صلاحيتها زيادة عن تاريخ الصلاحية المطبوع لشهور وسنوات ..
وبصورة عامة؛ نحتفظ بأدويتنا في عِلبها الكرتون؛ أو في عِلب بديلة أو في أكياس سودة

ومع انتهاء تاريخ صلاحية المركبات التساهمية؛ مش معناه إن المادة فسدت؛ لكن ممكن تفقد نسبة صغيرة من فعاليتها، ودي بتختلف من مادة للتانية، ودي بتحتاج شغل معملي لتحديده وما ينفعش معاها مبدأ التعامل مع المركبات الأيونية .. يعني ممكن نستعمل المركبات دي بعد تاريخ صلاحيتها لو محفوظة كويس ولفترة محددة نستشير فيها حد فاهم كيميا ..

الخلاصة لزيادة صلاحية الأدوية السايلة عن تاريخ صلاحيتها المطبوع:
المركبات التساهمية فى الصورة السائلة بتتعرض لتغذى الميكروبات عليها وهضمها, لتغيير شكلها الفراغى أو لتكسيرها بالضوء والحرارة, وبالتالى للحفاظ على تركيبها الكيميائى ولزيادة مدة صلاحيتها:
- نمنع وصول الضوء للادوية السايلة
- نمنع تعرضها لدرجات حرارة عالية
- نمنع تجمدها فى درجات حرارة منخفضة
- نتجنب فتح زجاجات الأدوية فى وسط ملوث
- عدم تناول الدواء مباشرة بالفم من الزجاجة وضرورة إستعمال ملعقة
يتبع..


الموضوع من سلسلة موضوعات عن تمصير وتبسيط العلوم تحت الهاشتاجات:
#حصة_كيميا
#تمصير_العلوم
#تبسيط_العلوم
#ما_ترميش_أدوية_منتهية_الصلاحية

#أيمن_غالى (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات