يوميات نازح في وطنه: بجزيرة صاي وبحي صيصاب .. كنت قبالة منزل: خليل أفندي فرح

مزمل الباقر

الحوار المتمدن-العدد: 8133 - 2024 / 10 / 17 - 02:52
المحور: سيرة ذاتية
    

يوميات نازح في وطنه: بجزيرة صاي وبحي صيصاب .. كنت قبالة منزل: خليل أفندي فرح

في تمام الواحدة بعد الظهر من كل يوم بقهوة أحميدي داخل سوق مدينة: عبري - بفتح حرف العين وتشديد حرف الباء - يجتمع كل من يود التوجه لجزيرة صاي التي تعوم وشقيقتها جزيرة: أرنتا - بفتح حرف الألف وتشديد حرف الراء وفتح حرف العين – تعوما فوق أمواه نهر النيل العظيم.
تقل المركبات الخاصة والتكاتك – جمع توكتوك – تقل أهل : صاب وزوارها من قهوة أحميدي إلى المشرع – بضم حرف الميم وفتح حرف الشين مع تشديدها وفتح حرف الراء – والمشروع هو محطة العبارة ( البنطون ) Ferry وكذلك محطة الزوراق الصغيرة ( الرفاصات ).
فوق أمواج النهر الخالد تحمل العبارة – وكذلك الزوارق الصغيرة – تحمل الركاب من مدينة عبري إلى جزيرة صاي وبالعكس.

وقفت بمحازاة رهط من الركاب الذين ينتظرون مثلي تلكم الزوارق للعبور من الضفة الشرقية للنهر الخالد، حيث مدينة: عبري إلى الضفة الغربية للنيل حيث جزيرة: صاي . عندما سألني أحدهم عن وجهتي في صاي: جاي .. لمنو ؟!

وهو سؤال يسأله – في الغالب – كبار السن من مواطنيّ الأحياء القديمة في القرى والمدن السودانية بدافع الفضول تارة وبدافع الريبة تارة أخرى. قبل أن يتم إرشاد الغريب أو الغرباء لمكان وجهته إن طلب ذلك أو لم يطلبه ، لا فرق في إطلاق المعلومة بال Location طالما عرف إلى اي بيت من بيوت أهل الحي، سوف يتوجه ذلك الغريب أو أولئك الغرباء.

أحدهم ( س ) : جاي لمنو في صاي!
انا : ماشي لبيت خليل فرح !
س : معناها انت ماشي صيصاب ، بيته معروف هنا.
انا ( مازحاً ): لا أحسن يكون ما معروف . دا : خليل فرح ... مفروض السودان كله يكون عارف بيته وين في جزيرة صاي!


عند عودتي من جزيرة صاي لمدينة عبري وشمس يوم السبت 14 أكتوبر 2023 تحي الجزيرة بأشعة باردة، نظراً للنسمات الشتوية التي تمر من فوق أمواه النهر الخالد قبل أن تنتهي جولة من جولاتها العشوائية بأرض جزيرة صاي.
الزروق الصغير ( الرفاص ) يقترب كثيراً من الضفة الشرقية للنهر الخالد. وفي ختام مؤانستي لصاحب: الرفاص وسائقه. ويدعى محمد فرح شوربجي والذي تصادف أن ركبت معه وآخرون من الركاب عند قدومي لجزيرة صاي مثلما كنت معه في رواحي.
محمد فرح: انت عندك أهل هنا .. فيك شبهنا !

أنا: يارييييييت والله، ما عندي أهل في صاي. ياهو جيت مخصوص عشان أشوف بيت خليل فرح.. عارف أنا متعود علي حكاية الشبه دي، هسي في حلفا ، في كم حلفاوي، قال لي : فيك شبهنا ، وسافرت كسلا برضو في كم كسلاوي قال لي بتشبهنا. أقول ليك حاجة سافرت بره السودان، الحبش برطنوا معاي بسبب الشبه دا وفي واحد صومالي لاقاني في بلد تانية، كان بسألني انت قريب فلان، ولما سألتو فلان دا وين قال لي في مقديشو لأنو مفتكرني بالشبه من نفس الأسرة. .. وكل الناس ديل وغيرهم زيك يا محمد فرح ما بكونوا مقتنعين إني ما منهم... غايتو في النهاية دي حاجة كويسة بالمناسبة . .أهلنا بقولوا : ( الما لقى شبهه .. الله قبحو ) !!!
تبرع أحد الركاب ( باسماً ) بمداخلة : ( كدا كويس .. حكاية الشبه دي ممكن تدخل مع اي جنس! ) – يقصد مع أي قبيلة سودانية
أنا ( مبادلاً الابتسام بابتسام ): ( أيوه .. أيوه بي مزاااااج كمان !!).
محمد فرح : (أها شفت بيت خليل فرح إن شاء الله، زرت البيت النوبي ، الكنيسة القديمة والبيت الفرنسي؟!)
أنا ( ضاحكاً ): (انت كدا بتغيظ فيني ما أكتر .. تقول لي الكلام دا ، بعدما وصلنا القيف التاني) – أي .. الضفة الأخرى للنهر العظيم
تبرع أحد الركاب وقال لي: هسي ما فات شئ .. أرجع طوالي !!
أنا ( بحسرة ): يارييييييييييييييت .. بس مفروض أكون في الطرمبتين (2) قبل الساعة أربعة عصر عشان أرجع حلفا مع البصات السفرية الجاية من بورتسودان أو من عطبرة . فما عندي طريقة أرجع صاي تاني والساعة ماشة علي ثلاثة ونص بالعصر.
الراكب المتبرع بالحديث: ما مشكلة تعال تاني صاي وزور الحتات دي!!
انا (العبرة بحلقي بطعم الحنظل): ياريت والله. لكن ما اظن أرجع تاني بعدما أوصل مصر

لهنينة من الزمن خيم علينا الصمت .. قبل أن يهمهم معظم ركاب الزروق بعبارات مواسية لي من شاكله: إن شاء الله البلد بترووق .. الله يصلح الحال .. الحرب حتقيف وترجع .. إلخ إلخ.

حاشية:
(1) فيك شبهنا : يقصد أنني مثله انتمى لقبيلة المحس وهي القبائل النوبية التي تقطن المناطق التي تتاخم أعمال ( قرى ) مدينة وادي حلفا ( حلفا القديمة ) وتعتبر مدينة عبري وقرية عكاشة إضافة لجزيرة صاي وقرية: واواه .. أشهر المناطق التي هي تنتشر فيها قبائل المحس والسكوت منذ قدم التاريخ . هذا غير تواجدهم في مناطق ومدن أخرى داخل وطننا : السودان مثل تواجدهم بجزيرة: توتي . التي تسبح في امواه النهر الخالد، وتتوسط العاصمة الخرطوم بمدنها الثلاث ( الخرطوم، أمدرمان والخرطوم بحري)

(2) الطرمبتين : هما طلمبة: Oil Energy و طلمبة: سنابل القومية للبترول اللتين تقبعا على فم شارع الأسفلت الذي يفضي لمدينة عبري عندما يتقاطع مع شارع المرور السريع أو ال High way الذي يمر بقرية واواة ( آخر منطقة للتواجد التاريخي للنوبيين الذي يتحدثون النوبية التي يتكلمها الحلفاويين ( نسبة لمدينة وادي حلفا ) وحتى قرية واوة ( آخر قرى المحس والسكوت الذي يتشاطرون ذات اللغة النوبية التي يتحدثها الحلفاويين وتختلف من اللغة النوبية التي يتحدثها الدنقلاوييون ( نسبة لمدينة: دنقلا) وقبائل الكنوز والفادجا وتختلف هاتين اللغة النوبيتين من جهة مع اللغة النوبية التي يتحدثها الأسوانيون ( نسبة لمدينة أسوان ) وهذا الإختلاف بين اللغات النوبية الثلاث .. لا يمنع من وجود مفردات مشتركة هنا وهناك .. فتأمل ! 😊


جزيرة صاي في 14 أكتوبر 2024

#مزمل_الباقر (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات