الغاء مجانيه التعليم تحت شعار التطوير

ايمان كمال

الحوار المتمدن-العدد: 1761 - 2006 / 12 / 11 - 07:29
المحور: حقوق الاطفال والشبيبة
    

اول شئ خطر على بالى بعد معرفتى بخبر ترشيد مجانيه التعليم العالى لحين الغاؤءه هو ان التعليم فى مصر مر بمراحل من الركود لحدما اصبح مجانى وفى متناول الجميع يعنى نفتكر اللى عمله على مبارك ورفاعه الطهطاوى وغيرهم عشان يوفروا لينا التعليم بعد عصور شديده من الجهل والتخلف اللى الدوله بتحاول دلوقت تفرضه علينا يعنى هى الدوله مش كفايه اللى خربته فى البلد ومش فاضل غير الغاء المجانيه طب واولاد الناس الغلابه اللى التعليم هو منفذهم الوحيد لمستقبل كويس يعنى انا وغيرى كتير طلعنا بفضل مجانيه التعليم وكان التعليم هو الشئ الوحيد اللى نقدر نحقق بيه طموحنا طب الاجيال اللى جايه هتعمل ايه هيكون مثلهم للدفع للجهل فوزاره التربيه والتعليم العالى طرحت مؤخرا رؤيه لتطوير القوانين والتشريعات التى تحكم مؤسسات التعليم العالى طبعا مش اهتمام بالمشاكل اللى بتواجه التعليم زى الانتاج المعرفى والبحث العلمى وغيره ولكن لتحويل العلم كسلعه يباع ويشترى
وبسؤال الدكتور على عبد الرحمن رئيس جامعه القاهره اللى شايف انه الطالب عشان يحصل على خدمه تعليميه جيده ومطوره لازم يكون فيه تكلفه يدفعها يعنى لو اتحملت الدوله جزء والطالب جزء وطلعنا خدمه كويسه يعتبر ده تطور للتعليم المطروح فى الجامعات الحكوميه ولا هو المطلوب تدهور التعليم طبعا هو يقصد هنا ان المجانيه هى سبب التدهور ويكمل هل المجتمع يرغب فى ان اولاده يحصلوا على تعليم افضل ام لا يعنى هل تكلفه طالب الصيدليه 5000 طبعا لا التكلفه الحقيقيه 15 الف لكن الجامعات الخاصه بتاخد ما بين 50 ل25 الفلكن الجامعات الحكوميه مازالت تدفع للطالب فالطالب عشان يحصل على خدمه مكافئه للجامعات الخاصه لابد ان يدفع مع الحكومه
طب يا دكتور انت نسيت انك طلعت بفضل مجانيه التعليم
والدكتور عبد الحى عبيد رئيس جامعه حلوان يقول انا وغيرى طلعنا عن طريق المجانيه واستحاله الموافقه على الغاء المجانيه طيب لحد هنا كويس جدا لكن بيقول كمان انه لو فيه سوبر ماركت هافضل ارمى فى الحاجات من كترتها يعنى زى التعليم يعنى هو لما كان فى كليه العلوم كان بيرمى كل يوم 150 او500 جنيه فى الحوض لان الطلبه مش بيقدروا قيمه الاشياء اللى بيرموها ويرى ان هناك استغلال خاطئ لمجانيه التعليم يعنى الطالب اللى طول الوقت فى الكافتيريا بيشترى بسكوت لزميلته عشان المجانيه عمال يسقط وياخد السنه بسنتين ومش همه اى شئ والدوله تدفع عشان كده لازم يكون فيه ضوابط بمعنى نسمح للطالب بالرسوب مره واحده وبعدها يدفع فلوس وده هيخلى الطلبه تهتم وتنجح وفى معظم جامعات العالم اللى سافر اليها لم ير الا الطالب وهو ماسك ورق او بيحضر محاضرات او فى المكتبه وده مش بيحصل فى مصر فجامعه حلوان فيها اكبر مكتبه وبيتردد عليها 500 طالب بس من 100الف طالب ويقول انه جاء الريف واكمل تعليمه خوفا من انه يشتغل فى الغيط فالتعليم كان فرصتهم وقتها لمستقبل افضل
وكان لازم احضر الندوه اللى اقامتها اعضاء نادى هيئه تدريس جامعه القاهره مع حركه 9 سبتمبر يوم الاثنين16/10 عشان نشوف حقيقه الامر فالدكتوره ليلى سويف تقول انه ليس علاقه مين يدفع اكتر ومين لا وتعليق تراكم السقوط على المجانيه لا يجوز ولو استمر الامر كذلك هتكون العمليه اسوا والدليل ان المدارس الخاصه مش افضل بكتير من المدارس الحكوميه لكن المساءله ده هى ان الدوله عاوزه توفر قرشين مش اكتر والمجانيه عملالهم مشكله رغم ان ميزانيه التعليم فى مصر اقل من كل دول العالم حتى الدول الاقل مننا والدكتوره ايمان عز الدين تقول ان التلاعب بهذه المساله بدا مع ادخال نظام الانتساب الموجه يعنى الطالب الخايب اللى مش جايب مجموع يدفع شويه فلوس ويكون زيه زى الطالب اللى اجتهد وذاكر وجاب مجموع كويس
والدكتور محمد ابو الغار رئيس جماعه 9 مارس ان التخوف بسبب ما يحيط من غموض بالقرار ومفيش اى دوله فى العالم ولا فى امريكا او اوروبا بيكسبوا من العمليه التعليميه والدكتورسالم سلام من جامعه حلوان يقول احنا عايشين فى نظام فاسد واستبداد مش عاوز صحافه حره ولا قضاء حر ولا تعليم حر وكمان هو يرى ضرورى تكاتف جميع الانظمه للوقوف ضد هذا القانون لان جميع قضايانا مشتركه وكمان لابد من مشاركه اولياء الامور والطلاب وجميع المؤسسات عشان كلنا فى الاخر لينا هدف واحد
واخيرا الدكتور محمود ثابت يرى ان الوزاره تعمل بشكل يشبه النظام السرى مستخفه باساتذه الجامعات يعنى لما حد من الاساتذه يريد معرفه شئ يقولوا له ادخل الموقع على النت بتاع الوزاره فالدوله خربت كل شئ تحت شعار التطوير فعندما قررت تطوير القطاع العام باعت القطاع العام واخر شئ عمر افندى فشعار التطوير اللى بيقوله الوزير هو شعار مخادع الهدف منه الالتفاف على الدستور لالغاء مجانيه التعليم وتحويل الجامعه لمشروع تجارى وفى نهايه الندوه وفى ضوء ماتم فيها يتفق الاساتذه على الرفض التام لهذا القرا وانه يجب مناقشه القرار مع اعضاء هيئات التدريس قبل طرحه على مجلس الشعب فى منتصف الشهر المقبل
على راى عادل الامام فى مدرسه المشاغبين لما قال الله يرحمك يا طهطاوى

#ايمان_كمال (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات