تونس: حول الموقف من الحريات في -طونس- اليوم

بشير الحامدي

الحوار المتمدن-العدد: 7977 - 2024 / 5 / 14 - 18:25
المحور: مواضيع وابحاث سياسية
    

مفروض رهط كيف برهان بسيس وكل بقايا الديكتاتور بن علي على الأقل راهم ساكتين موش تتحل قدامهم الوسائل السمعية والبصرية هو وسنية ونجيب ورهوط أخرى كثيرة "منتشرة" في دكاكين مافيات الاعلام ويولّو جهابذة إعلام وأول المدافعين على حرية التعبير وعلى الحريات عموما. لكن آش باش تعمل هاو المسار وصلنا لهنا…
وعليه نقولو الحريات عموما وحرية التعبير راهي قضية موش مفصولة على قضايا الحق الأخرى بل هي آخر هذه القضايا ووقت تكون القضايا الأخرى مطروحة ومطروحة بشكل صحيح تو تتفهم قضية الحريات بالشكل الصحيح…
الوضع اليوم ما جاش من فراغ جاء من أنو القضايا الأخرى وقع الالتفاف عليها وولا كل من هبّ ودب يتحدث فيها وزيد يفتي تجمعي نهضاوي استبدالي انتهازي.
أنك كمناصر للحريات بصفة عامة تتحط اليوم في موقف كيما هذا ويولي موقف كيما هكا صدارة الأحداث لكل أقول ما ثماش حتى داعي باش تكون مع أو ضد لأنك في الحالات الزوز باش تكون في المكان غير المناسب وهات نشوفو علاش.
في كل الحالات ما تنجمش تكون مع السلطة لأنو إنت أصلا ضد كل السلطات لأنو ما ثماش حتى سلطة ما تشوفش بعين وحدة وزادة عينها هي موش عين غيرها باش تضمن نفوذها واستقرارها حق باطل وما تنجمش تكون مع لتقمعهم لأنهم هوما في الأصل كيفها وما يختلفو عليها في حتى شيء فقط أنهم ما همش متنفذين والعركة بعيدة برشة على حقوق الناس إلي ثارت في 2010- 2011 وتصورت أنها تخلصت من الديكتاتورية نهائيا.
ووقت يتنسى مسار كيما هكا تولي مزايدات ويطهر على السطح التجمعي والخوانجي والمنقلب ويولي عندهم موقف من الحريات: حريات صبعين وتلحق الطين وتولي الحرية هي إلي يطالب بيها برهان وسنية ومراد ونجيب الدزيري… لا سيدي الحرية هذيكا حرية مضروبة لأنها حرية الحاكم وإلا حرية الناس لكيفو ولماهمش اليوم متنفذين.
الحرية الحقيقية مضروبة منهم الزوز الحرية الحقيقية هي حرية الناس في أنهم يكونو بالحق أسياد قرارهم حرية الناس في أنهم يعملو القوانين متاعهم حرية الناس في أنهم يخضعو لقوانين وأجهزة هوما إلي عملوها ووافقو عليها موش تسلطت عليهم...
وعليه لا مفرّ لك كان تحب تكون نظيف وواقف على موقف صحيح وسط هذا اللغط بكلو من الجهتين من طريق آخر طريق "ثالث" ينادي بالإطاحة بكل الديكتاتوريات القديمة ولجات بعد 2010 طريق يكون معبر اليوم على مصالح الناس على حقوق الناس طريق يجمع القضايا موش يجزئها طريق يفرض تغيير جذري وبسياسات راديكالية يخرج على دائرة نضال الاتحاد والمحامين والإخوانية واليسار اللبرالي واللبراليين عموما طريق لا يرجع برهان وسنية ومراد أبطال حريات ولا يخلي السلطة تتمدد كيما تحب باسم الشعب ودولة القانون والثورة. الطريق هذا اليوم يلزمو رجال ونساء بالحق موش سمسارة خوانجية وسمسارة يسار مريض بالزهايمر وبيروقراطية طول عمرها تتمعش ودكاكين قطاعية تتحرك بالفلسة وشبيبة ضايعة فيها.
14 ماي 2024

#بشير_الحامدي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات