ريفو وشيخ الأزهر وشجرة الصفصاف وصيام رمضان

ماجد الحداد

الحوار المتمدن-العدد: 6538 - 2020 / 4 / 15 - 17:29
المحور: ملف: وباء - فيروس كورونا (كوفيد-19) الاسباب والنتائج، الأبعاد والتداعيات المجتمعية في كافة المجالات
    

اجدادك المصريين اكتشفوا أن لحاء شجرة الصفصاف اللي بتنموا على ضفاف النيل لما يتنقع في مية ويشربوه لما يكونوا مصدعين أو بيعانوا من اي الم او درجة حرارتهم مرتفعة بتنزل درجة الحرارة والوجع بيروح وكأنه شيئا لم يكن ، ومش دول بس اغلب الشعوب تقريبا عرفته زي الإغريق والهنود الحمر حلو ...
في القرن ١٨ جاء عالم الماني استخلص المادة اللي موجودة في اللحاء دي اللي هي ( حمض السالسيليك ) وسماها #Aspirin _ #اسبرين _ المادة العلاجية الأشهر على الاطلاق .
من مزايا المادة السحرية دي كمان أنها بتعمل سيولة في الدم وده الشئ المهم جدا لمرضى القلب والوقاية من الجلطات الدموية كمان ، عشان كدة فيه أطباء بينصحوا بيه انك اخد حباية يوميا بتركيز ٨١ ملجم منه .
ظهرت عندنا في القرن الماضي المادة دي بأسماء تجارية شهيرة زي #ريفو و #اسكين ودي لشركات قطاع عام .
مش هنتكلم عن استخدامات الريفو عند أجدادنا وآبائنا وازاي أن ادراج الكوموديني وشنط الجدات والأمهات كانت لا تخلى من شرائط الريفو الورقي الطويلة أو الاسكين ، وأنها ازاي بتعالج البرد والصداع والجلطات وأمراض الكلى والمس والسحر والحسد واي مشكلة بتقابل الفرد ممكن حلها بقرص ريفو وفحل بصل !!!
دلوقتي في امريكا اقترح باحثون في معهد ماساتشوستس للتكنولوجيا بالولايات المتحدة الأمريكية وجامعة كولورادو وكمان في كندا انهم اكتشفوا أن الالتهاب الرئوي اللي بيموت منه مرضى فيروس #كورونا سببه الرئيسي هو لزوجة الدم وتجلطات واضحة في الرئة اللي بتسبب مشكلة أزمة التنفس دي .
فبالتالي منطقي أننا نعطي لمصاب الكورونا مادة ضد التجلط وبكدة يبقى حلينا المشكلة اللي بتخلي اللي بيتصاب بكورونا يموت وبكدة مش هيموت ويتعافى ، والابحاث لسة شغالة رغم أنهم بيقولوا ان ٨٠ ٪ من الحالات اللي تعاطت حمض السالسيليك تعافت.
يعني الريفو يرجع تاني بكل سطوته أنه فعلا علاج سحري ...

تعالى بقى لتصريح شيخ الأزهر الاخير وكأنه لما صدق أن منظمة الصحة العالمية بتقول أن جفاف الحلق لا يساعد على الاصابة بالفيروس ، وبناء عليه أن صيام رمضان القادم واجب وممنوع الأفطار والغرغرة لأنها لا تفيد ولازم كله يصوم .
ماشي ... بس مافكرتش فضيلتك لأنك طبعا مش عالم وبالتالي يمكن لسة ما اتفتحتش باكتشاف علاقة لزوجة الدم بالتجلطات في الرئة وبالتالي الوفاة واللي مرتبطة أساسي بنقص المياه في الدم _ لأن نقص المياه يؤدي حتما للزوجة الدم ودي قاعدة علمية مش محتاجة كلام _ ومافكرتش حضرتك أن الفيروس لما بيقعد ايام في الحلق ، وان مشكلته الحقيقية بس أنه لما ينزل الرئة لكن لو نزل المعدة يتم القضاء عليه تلقائيا يعني برضو شرب السوائل مهم بشكل مزدوج بغض النظر دلوقتي عن المشروبات الساخنة .
تعالى بقى الاعراض بتاعة الكورونا اللي كلها بتتفق في قاسم مشترك واحد وهي ........
#الجفاااااااف
التهاب وجفاف في الحلق ، كحة جافة ، لزوجة في الدم يعني برضو علاقة وثيقة بالجفاف .
يعني من آخر الامتناع عن الماء هيضرك بالكورونا ، ومن غير كورونا وحياتك اصلا فيه حالات وفيات كتيرة بتحصل في رمضان من كبار السن عشان السكتات الدماغية والجلطات وعدم وصول الدم للمخ ونقص السكر وأسباب مهولة طبية كتير بيسببها الامتناع عن الطعام والشراب والأهم عن الماء لفترات طويلة بس مش ده موضوعنا عشان الناس ما تفهمش كلامي غلط .
تيجي انت تفرح عشان فاكر انك بتدافع عن الإسلام تقول للناس مالكمش حجة ما تصوموش ؟؟؟؟؟؟؟
طب ليه حضرتك كمؤمن أو كمسلم عالم بأمور الدين ما فكرتش ليه الناس بالآية القرآنية الجميلة ( وعلى الذين يطيقونه فدية طعام مسكين فمن تطوع خيرا فهو خير له وأن تصوموا خير لكم إن كنتم تعلمون ) سورة البقرة آية ١٨٤
ودي قصة مختلفة تمامااااااا غير قصة المرض والسفر خد بالك !!!
وخد بالك قال يطيقونه يعني يستطيعون الصيام بس من حقك ما تصومش ... ماقالش لا يطقيونه .
ومش هنتكلم عن رأي الفقهاء لأنه راي بضرب ومحاولة منهم تمييز الدولة الجديدة الإسلامية بطقوسها عن الدول المجاورة باديانها بيقولوا اتنسخت وده كلام فاضي ... ليه ؟؟؟
وروى البخاري عن ابن عمر وابن مسعود ، مثله .
وقوله : ( وعلى الذين يطيقونه فدية طعام مسكين ) كما قال معاذ : كان في ابتداء الأمر : من شاء صام ومن شاء أفطر وأطعم عن كل يوم مسكينا .
وقال البخاري أيضا : حدثنا إسحاق ، أخبرنا روح ، حدثنا زكريا بن إسحاق ، حدثنا عمرو بن دينار ، عن عطاء سمع ابن عباس يقرأ : " وعلى الذين يطيقونه فدية طعام مسكين " . قال ابن عباس : ليست منسوخة ، هو للشيخ الكبير والمرأة الكبيرة لا يستطيعان أن يصوما ، فيطعمان مكان كل يوم مسكينا .
ومش عارف ابن عباس رغم أنه كتر خيره أعترف أن مفيش آية منسوخة زي ما اعترف قبل كدة أن زواج المتعة مذكور في القرآن ، بس عرف قصد رب العالمين منين انه يقصد المرأة والشيخ وفيه رجالة بشنبات لو صامت يوم ممكن يجيلها هبوط وتقع في الشارع من غير مرض اساسا ، زي برضو ما قعد يقسم ويحلف على آية ( ومن الناس من يشتري لهو الحديث ) أنه الغناء وباقي أية بيقول غير كدة اصلا ...

بكدة استفدنا دروس مهمة :
اولا : أن حمض السالسيليك ممكن يكون هو الحل وعلاج لخطورة اعراض كورنا ، وان الريفو لازال على عرش الأدوية .
ثانيا : اوعى تسمع لرجل دين احسن يوديك في داهية لأنه لا فاهم علم ولا فاهم دين ، وممكن يكون فاهم دين بس بيتلاعب عليك عشان ضمان استمراره في السلطة الدينية بتجيب فلوس وسبوبة حلوة .
ثالثا : اللي يفتيك في حياتك ودينك هو العلم والعلماء والمصلحة العامة اللي اساسا اتنشأ الدين عشانها والا تحدث فتنة كبيرة في الحياة العامة قبل الدين وما تنساش أن الرسول قال ( أنتم أعلم بشؤون دنياكم ) وكمان المسيح قال ( أعط ما لقيصر لقيصر وما لله لله )
رابعا : عاوز تفطر افطر ولا يهمك حد وربنا كبير ولو قادر طلع فدية وأطعم غلبان ، هم مش قاعدين يصدعوك أن فايدة الصيام انك تحس بالفقير ؟ اهو يا عم الحاج اديك هتطعم مسكين ، ولو مش قادر اعرف أن ربنا رحيم قبل ما يكون جبار وعارف انك بتتعذب وممكن بسبب شيخ الأزهر وغيره من الكهنة يموتك عشان علاجك زجاجة مية طول النهار وقرصين ريفو .
#انسان_يفكر

#ماجد_الحداد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل