المنولوج الاول

حسين الرواني

الحوار المتمدن-العدد: 5831 - 2018 / 3 / 30 - 16:42
المحور: سيرة ذاتية
    

- حرامات اتموت وما تدري بكل هاي القصائد انكتبت عنهة، وما تدري حبهة هاج ابگلبك بعد اثنعش سنة
- اي والله حرامات، فد شي مؤلم كلش، شنو قيمة الحياة اذا هلگد عاطفة ومشاعر تبقى مضمومة عن الشخص للموت
- لعد لازم اندور عليهة وانشوف طريقة انوصل بيه القصائد الهة
- انتة خبل ؟ شندور عليهة ؟
- اندور عليهة، نسأل عنهة
- اي، رأسن راح نلگاهة، ولك جاي احچي عن وحدة اخر مرة شفتهة على قيد الحياة بالالفين وسبعة، وهسة مدري ماتت مدري عدلت، تعرف اشكم انفجار صار خلال هاي الدعش سنة اببغداد
- بس انتة بعدك ما متت، وهية هم من المحتمل ما ماتت
- اي محتمل، هسة عبرنة الاحتمال الاول
- والاحتمال الثاني ؟
- ان تكون اتمرضت مثلا واتوفت
- انتة شنو قضيتك وين الموت، كل احتمالاتك عنهة موت؟
- مو قضية ولا شي، بس جاي اگلك، بعدين هاي احتمالات واردة، هواي ناس تتمرض وتموت
- زين ممكن تتجاوز كل احتمالات الموت ؟
- اوكي، الاحتمال خمسة وعشرين، احتمال اتكون
- خمسة وعشرين ؟ يعني انتة امخلي اببالك اربعة وعشرين احتمال الموتهة
- اي، اهواي ناس ماتت، الموت ابشع شي ممكن تتصوره، الموت ينهي وجود الانسان ابشكل كامل، ايطلعه من كل حساباتنة، بعد لا انفكر بيه ولا ايفكر بينة
- انتة مشتغل دفان ؟ الدفان اتصير بيه هيج سولة
- نرجع للاحتمالات
- گول
- احتمال اتكون شالت للمحافظات، او سافرت برة
- احتمال
- واحتمال اتكون مثلا اتعرضت لحادث واتخبلت وصار عدهة مرض عقلي
- احتمال
- وايجوز هية هسة ابمستشفى مال مخابيل
- ممكن
- فاذا نعبر كل هاي الاحتمالات، ونفترض انهو هية هسة عايشة وصاحية وما انتقلت للمحافظات ولا سافرت برة، نگدر انناقش موضوع اشلون نلگاهة ونتواصل وياهة
- اكو احتمال فاتك
- شنو ؟
- احتمال اتحولت الى فختية
- جاي اتحشش علية ؟
- حسين ترة ماكو واحد يفكر ابهيچ طريقة، انتة عالم مال رياضيات ؟ شنو هذا الهوس بالاحتمالات
- هية الحياة اهنا هيچ، انتة جاي من لاس فيغاس ؟
- زين، هسة اشلون نگدر نندلهة وانوصل الهة القصائد
- ماكو غير نسأل عليهة
- اي ؟ انظل نفتر مثل المخابيل بين المدارس ونسأل على مدرسة اسمهة افلانة جانت عايشة قبل اثنعش سنة
- رجعنا للعايشة والميتة
- اتفضل
- نسأل عليهة مثل ما كل الناس تسأل على كل الناس
- لا، هاي مو كل الناس، هاي مرة، وخلي ابالك احساب الصورتهة گدام المدرسين والمدرسات والطلاب، ترة هية هم تتخوف على سمعتهة
- اني ما راح امارس وياهة الرذيلة، اصلا اذا اندليت هية هسة وين ما راح اروحلهة، راح ادز كتاباتي بيد واحد.
- زين، انتة اشتعرف عنهة من معلومات اتفيدنة
- بس اسمهة الاول ولقبهة، واختصاصهة التدريسي
- هاي المعلومات مو كافية، تعرف اشكم مدرسة ممكن تنطبق عليهة هاي المعلومات ؟
- لعد شسوي
- حتة اذا دورت عليهة بالفيس هم ما راح تلگاهة، هاي اذا عدهة فيس، ايجوز امسمية نفسهة هدوء البحر، هذا الاسم العلمي للمراة العراقية
- اكو اشكم وحدة بالفيس بنفس اسمهة بس ماكو صورة شخصية ولا منشور ولا اي تفصيل اگدر من خلاله اعرف انهو هية
- عوفك من الانترنيت والفيس، ادوارتك هيچ ما منهة نتيجة
- اي صحيح
- بعدين لنفترض اندليناهة، منو هذا الي راح اتدزه ؟
- ما أعرف
- لازم اتشوفلك واحد ثقة ما ايسولف بالموضوع وايشوه سمعتهة، الي اتدزه لازم تضمن انهو ما يحچي بالشغلة، ترة العراقي حلگه مفتوح للهوة، كلشي ايسولف
- اي صحيح
- شغلتك كلش معقدة
- لا معقدة ولا صعبة، الناس هية امعقدة الامور، قيود اجتماعية فارغة على المرة، واذا تحچي وية وحدة بالطريق الف تهمة جاهزة، تدري ؟ لو اشوية مجتمعنا منفتح چان السؤال اسهل بهواي، عادي كلش اي واحد يسأل على اي وحدة وايسولف وياهة، بس هذا الوهواس الشرفي
- استاد فالح عبد الجبار، عوفنا من تحليل الوضع انثربولوجيّاً، واحچيلي بطريقة ثانية
- اكو طريقة ثانية
- شنية
- رشوة، ندفع رشوة الواحد بالتربية ايطلع النة هية وين هسة جاي اتداوم، كل المدرسين والمدرسات موجودة بياناتهم بقوائم، والقوائم موجودة ابمركز المعلوماتية بالتربية
- اي هذا خوش حل
- اي خوش حل، بس لنفترض وصلت الهة، او دزيت واحد ينطيهة القصائد، واني افضل هذا الشي، شنوا الراح يتغير ؟
- ما يتغير شي، بس انتة گلت حرامات هية اتموت وما تدري بيك هلگد حبيتهة وكتبت عنهة
- وشنو المشكلة اذا ماتت وما درت بكل هذا ؟
- ماكو مشكلة
- اذن انهي الموضوع، وخليهة ع الصدفة
- من طيـــ ي تعرفك بالصدفة، هوة اني باوعت على روحي ابفيديو سيلفي امصورة النفسي بالالفين واثنعش وانصدمت من حجم التغير، اتريد تعرفك وحدة شافتك قبل اثنعش سنة؟ بعدين منو ايگلك انتة لو لاگيتهة بالصدفة راح تعرفهة؟ ايجوز هية هم اتغيرت بالشكل؟ انتة تعرف المرة تكبر ابسرعة ؟
- دوختني، يعني هسة شسوي
- اني اتفق وياك ع الصدفة، بس لازم تعصر ذاكرتك عصر وتتذكر ملامحهة كلش زين
- مو هية هاي المشكلة، ملامح وجههة مو كلش واضحة ابذاكرتي
- والحل ؟

#حسين_الرواني (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات