نصيحة أخوية لرئيس احببناه

مصطفى راشد

الحوار المتمدن-العدد: 5672 - 2017 / 10 / 17 - 13:26
المحور: مواضيع وابحاث سياسية
    

كـلـمـة مـن مـواطـن مـصـرى:
للـسـيـد/ عـبـد الـفـتـــاح الـسـيـسـي رئـيـس الـجـمـهـوريـة: المخلص الذى أحببناه وانتخبناه
1- سيبك من شماعة الإخوان دلوقتي الناس كرهتهم وعرفت حقيقتهم ..و امنع اضطهاد وابعاد المعارضين الوطنيين السلميين علشان متزعلش مؤيديك ..خلي الناس تتنفس حتى لو اختلفوا في رؤيتهم لسياساتك... واحمى البلد من خطورة السلفيين ويجب مواجهة الفكر الإرهابى قبل المواجهة العسكرية وإلا ستستمر العمليات الإرهابية لأننا نقتل بعض الناموس ولا نردم المستنقع الذى يفرخ الناموس

2- أمنع استيراد أكل القطط والكلاب. والشوكلاتات وبنس الشعر والشيبسى والجبنه والمكرونات الملونه وسجاجيد الصلاه والبراويز والشمع وكل الحاجات اللى مش هنموت من غيرها وشوف هتوفر دولارات أد ايه.
3- امسك الكتب الخارجيه وأعمل كتب الوزاره زيها وامنع طباعة الكتب الخارجية.. هترحم الأهالى وهتوفر مليارات.
4- عندنا استعداد جميعا نستغنى عن البراندات ونلبس خيش ونمسك شنط خضار وجزم من باتا .. ولما تعطش السوق هتلاقى المصانع المصريه للبس والجلود هتشتغل وشغل نضيف كمان .. مفيهاش حاجه منبقاش كلاسى وستايلش أربع خمس سنين عشان خاطر بلدنا..بس نكون كلنا في الهوا سوا ..يعني مانلاقيش المحظيين متمتعين وبقية الشعب يربط الحزام..لان المساواة في التقشف عدل.
5- امنع الحياة السياسية بقانون أو بالدراع عن كل حرامى وحزب وطنى من ايام مبارك وكل متطرف دينى فى الاعلام والصحف والقضاء ومعلش تعالى على نفسك وكن ديكتاتوريا فى النقطه دى بالذات.ماجتش على دي يعني ياريس ونحرص فيها على الحريات..!
6- اقاله جميع اللواءات اللى ماسكين كل خرم ابره فى الدولة كفاية عليهم الامتيازات اللي عندهم..وكفاية عليهم شغل كده يستريحوا شويه بقى ويلعبوا مع أحفادهم وعين كفاءات وما أكثرهم حتى لو معارضين ..المهم انهم وطنيين.
7- معاش مبكر لكل رؤساء الاحياء والمناصب الكبيره وعين شباب معروف عنهم الشرف اكيد هتلاقى حبه شرفاء لسه موجودين فى البلد يعنى.
8- اى فلوس تبرعات تجمعها لأى صندوق تعمل بيها مشروع حي قدام عنينا أول بأول نشوفه
9- اوقف نزيف الملايين اللى بياخدوها مستشارين المصالح الحكومية.. و اللى عاوز يشور علينا ببلاش يتفضل واللى مش عاوز يتنيل يقعد فى بيتهم كده كده شورتهم بتبقى سودا..!
10- اقفل كل قنوات العهر والرقص وإعلانات الجنس والشعوذة الوسخة لو عاوز تقبض على أصحابها بتهمه النصب او نشر الفسوق هتعرف توصلهم كويس.
11- أجمع أصحاب شركات الإنتاج السينمائي والفنى مع السيناريستات والمؤلفين والموسيقين المحترمين وحطوا خطة للنهوض بالفن والذوق العام والثقافة.. ودي قوة مصر الناعمة وصناعة تدر عوائد استثمارية لامثيل لها..وتعتبر أهم نقطة يمكن أهم من قناة السويس بالتفريعة بتاعتها
12- عين وزير ثقافة مثقف. قوى فى مواجهة الفكر الإرهابى منتصر لحرية الرٲى السلمية
13- الجيش ما يدخلش البلد يمسح ميه ولا يسلك بلاعات ولا يكرع العيال الصغيرة بعد ما تأكل..! الجيش فى ثكناته والحاجات دى ليها ناسها بس انت اختارهم صح.
14- الوزير الفاشل يخرج منها بمرتب آخر منصب قبل الوزارة.
15- اطلب من كل رجل أعمال إنشاء مصنعين فى محافظتين مختلفين مقابل الارض والاعفاء ضريبى واعلانات مجانية. ونوقف بناء المساجد والكنائس والحج والعمرة ونوجه اموالهم لبناء المستشفيات والمدارس والمصانع وانقاذ اطفال الشوارع لٲن الزكاة تقدم على كل العبادات
16- اللى يسرق يتحاسب واللى يتسبب فى كوارث إهمال يتحاسب واللى يحرض على الآخرين يتحاسب ونرفع قانون ازدراء الاديان اللى بيستخدمه بعض القضاه الدواعش ضد من لا يعجبهم رأيه
17- هات 2؛ 3 شباب متخصصين ودارسين فى كل قطاع من قطاعات الدولة وياحبذا يكونوا معارضين .. هتسمع منهم اقتراحات وحلول سحريه للنهوض بالقطاع.. عشان موضوع الدهن فى العتاقى ده فى الفراخ والبط بس مش فى الكفاءات البشرية.
كلها حاجات تافهه وبسيطة...بس بتفرق.
18 - أعمل تقشف حقيقى فى الحكومة مش معقول اسطول سيارات فى الرياسة واسطول بالوزارات والمحافظين و 366 قصر واستراحة للرياسة فى بلد فيه ناس بتاكل من الزبالة اعتقد تحويل 95% من هذه القصور والاستراخات لمتاحف او مدارس او مستشفيات او مصانع التصرف المفروض هذه الايام
صدقنى لو مش بحبك مش هقولك النصيحة دى

#مصطفى_راشد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات