عن الإنتحار

أحمد سعده
(أيمï آïم)

الحوار المتمدن-العدد: 4721 - 2015 / 2 / 15 - 11:29
المحور: الفلسفة ,علم النفس , وعلم الاجتماع
    

أنا عارف كويس إنك يائسة من حياتك، وإنك فقدتي الأمل..
لكن إنتي هترتكبي أقبح حاجة ممكن يقوم بها إنسان.. إنتحارك كفر بقيمة الحياة والوجود، وكفر بالروح اللي ربنا أودعها أمانة معاكي.. إنتحارك نكران للجميل..
إنتحارك إستهتار بالفرصة اللي معاكي علشان تتعلمي، إنتحارك استهتار بقيمة دورك في الحياة..
جسمك الجميل ملهوش ذنب، ليه عايزة تدمريه؟
كل البؤس اللي إنتي فيه سببه "عقلك".. عقلك سبب كل الحزن واليأس والإحباط.. عقلك سبب مللك وأنينك.. عقلك هو جحيمك الحقيقي.. عقلك هو أقبح مافيكي.
جسدك جميل، فبلاش تدمريه.. وروحك نقية وطاهرة، فبلاش تأذيها.. لكن مابين الجسد والروح هناك عدو متربص.. ذاك هو العقل اللعين.!!
تفكيرك في الانتحار مش لأنك ضد الحياة، بالعكس. انتحارك سببه رغبتك في الحياة.. بس انتي زهقتي منها علشان مش قادرة تحققلك أحلامك وأمنياتك.. ومفيش حياة بتحقق أحلام ورغبات أي حد..

أي إنسان هتلاقيه مفتقد في حياته حاجة.. ممكن يبقى معاه فلوس لكن يفتقد الصحة.. وممكن يكون جميل لكن يفتقد الذكاء.. وهكذا يحيا الإنسان بلا كمال وبلا اكتفاء..

رغبتك عظيمة في الحياة عكس ما انتي فاكرة، كل ما في الأمر إنك عايشة لحظة إحباط لان الحياة محققتش توقعاتك، ومن الاحباط يأتي الغضب.. ومن الغضب يضعف الإنسان ويكفر بالحياة..

بلاش تنتقمي من جسمك، لأنه هدية غالية أوي من الله.. لكن "العقل" مش هدية ولا حاجة.. العقل مجرد آداة تشويش، مجرد قرص صلب مليان فيروسات إجتماعية..

إنما الروح هدية، والجسم هدية... وذاك العقل هو مصنع كل أنواع الأمراض والعنف والمنافسة والغيرة والحسد والتربص والوشاية.. لكن تركنيه تخليه على جنب..

بكتبلك الرسالة دي وعلى مسئوليتي بقولك إنك تقدري تركني عقلك وتراجعي كل حاجة وتعملي إعادة نظر في أسلوب حياتك، وفهمك واعتقادك.. تعيدي النظر في إزاي اتحولتي لآلة بتتحرك بأوامر.. عارف إنه هياخد منك وقت طويل.. لكن طبعا مش الإنتحار..

لو قررتي تنتحري، يبقى قررتي تموتي في رعب وخوف وقلق، لأن الإنتحار هو الاختيار الأقبح في الحياة، والعمل الشاذ في الوجود..

عمرك سمعتي عن حيوان بينتحر.. وحده الإنسان اللي بيوصل للحد ده من الجنون.. الطبيعة ضد الإنتحار.. وانتحارك عمل قبيح في حق نفسك، علشان كده متتوقعيش إن الوجود يديكي حياة أفضل بعد انتحارك، بالعكس. هتاخدي على أد مستوى قباحتك..

تفكيرك في الانتحار لأنك عشتي الحياة بطريقة غلط، عشتيها بغباء وحماقة، ومعرفتيش معنى الإحتفال.. معرفتيش معنى الرقص مع الأشجار والأنهار والأمطار والرياح.. لأنك عشتي بأفكار وموروثات اتفرضت عليكي من ناس للأسف قريبين منك..

كل ما أطلبه منك، إعادة النظر في كل حاجة عشتيها في حياتك لحد دلوقت، وقتها هتلاقي ذكاء جديد بيتولد جواكي..

فكري بدماغك مش بعقلك.. لأن الدماغ مختلف تماما عن العقل.. عقلك منحك إياه المجتمع، أما دماغك فجزء من جسدك..

الدماغ مش مسيحي ولا مسلم ولا يهودي.. لكن العقل مسيحي ومسلم ويهودي.. الدماغ كمبيوتر حيوي جميل بيكون أكتر تفاعل وذكاء حينما يسقط العقل.. لأن الدماغ بسقوط العقل يتحرر من حمولة ثقيلة ملهاش لزمة..

ورغم إن دماغك دلوقت مليان نفايات، إلا إنه لسة شغال.. كل ما في الأمر إنه فقد قدرته على العمل بشكل تام، وبمجرد إسقاط العقل، بيسترد الدماغ عافيته ويرجع لعمله التام..

المجتمع هو من يخلق الغباء والبؤس والشقاء.. والإنسان يولد في منتهى البراءة والذكاء لكنه سريعا يقع في المطبات.. مطب رجال الحكومات ورجال السياسة ورجال الدين، وكلهم رجال عصابات وإجرام.. شغلتهم تعطيل الذكاء عن العمل..

عايزة تنتحري؟ إنتي مجنونة ولا معتوهة؟

الكون بيغني، والأشجار والأزهار والأنهار والطيور بتغني.. الكون مش مكان للإنتحار، لكنه مكان للغناء والرقص والاحتفال، مكان للحب والمحبة والعطاء..

لو اتعلمتي لغة الإحتفال، سينتحر عقلك معنويا وسيفقد أمله في السيطرة عليكي.. وهيفتحلك الوجود أبوابه وهيرحب بيكي.. وهتكتشفي سر الحياة، وستثقي في نفسك..

ومن الثقة في نفسك إلى الثقة في الوجود.. ومن الثقة في الوجود إلى الثقة في الله.. وهذا هو الإيمان.. وذاك أول الطريق إلى الله..

#أحمد_سعده (هاشتاغ)       أيمï_آïم#          

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات