الغربة

سعدي جبار مكلف

الحوار المتمدن-العدد: 4402 - 2014 / 3 / 23 - 06:02
المحور: الادب والفن
    

الغربة

سعدي جبار كلف
استراليا سيدني
10/3/2013

تمر الأيام وتذوي تحت ركام الزمن طفولتنا الجميلة ولكن
القهقري يعود بنا الى الوراء ....الى الماضي الى الطفولة
والطيبة والمحنة ... آه ياطاحونة الزمن لقد أنتهى العمر ونحن في الغربه
رديت ألچ ديرة هلي
رديت با بصرة هلي
حضنيني أبلهفة محب
وبصوت عالي هلهلي
يگلي الوكت موش أهية الك
أصرخ وأگولن كلها لي
رديت وهموم المدن
بجيوبي مليانة ملي
دموع وقهر
نوح وسهر
والغربة بيها مبتلي
صارت غصب گوة علي
يلة يا بصرة شملي
الدموع نشفت والشفاه أتصيح
ياهو اليشتري
وينة الرباط
النهر ناشف والوجوه أمغبرة
نتناه لو ما يمتلي
مد وجزر
صار الجزر والمد تركنا
وخندگك علگم شري
دينار ما جنة أنس
ما ظن أجاه العيد يتناه من أمس
فرحة وعرس
العشار غنوة شوگ ألك
يا باسم وخالد طفولتنا ملك
كلهم هلك كلهم هلي
بس صيح عونك ها بلي
نذكر أيام الطفولة والمحبة والمحنة
والحسينية العزيزة
وشارع المترب همومة تنجلي
يحجي للأجيال قصة
قصته ما تنطري
ومدرستنا أشحلو أسمها
مدرسة گرمة علي
أذكر إسليمان يصرخ
گولو دار گولو دور
مايگول أسم المحلة والمدينة
ونبقى أحنا بأنتظار
أمشي مشية مستقيم ولا تدور
ولا تشم ريحة بخور
أكتب ..أكتب ولا تحط أسم الوطن
بين السطور
وأحنا أبسدني يباسم نذكر أيام الصغر
شلون خلص هاالعمر
شلون دارت الأسطوانة
وتاه من عدنا الگمر
بيش خلص ها العمر
لسة وأيام الطمامة وجسر الأحمر
والتميمية
ولسه بستاتك فؤاد أتصيح بصرة
وتصدح أبغنوة فجر
صدگ خلص هل العمر
خلص أبلوعة سجن
خلص أبسجن الرمادي والعمارة
قاعة خمسة قاعة ستة
مدري خلصنا أشكثر
والجناسي صارت أوراق المحقق
وشرطة البصرة التدقق
وجعفر أغائي وفاضل
صارو ألنا أصدقاء
وشرطة التسفير محراب الصلاة
تحضن أسباع وأباه
هذا ضلعي أنكسر ذكرى
ورد تجبر
يمتة يتحقق مناه
ضاع ليل الأنتظار
وصاحت الغبشة تره صار النهار
مدري ظلمة مدري نور
ننتظر دشت حمد
بلگي ياتينا القطار
تالي طلعت سكة ماكو
والمحطة قفلت بيبانها
وأحنا نحلم نحلم أنخط الشعار
ومدري أحنا شنهو صار
هم نظل نتني القطار
ويا قطار أيگول عونك
ويشيل مكسور الجناح
ضاع من عنده الصباح
تاه لا حرثة أبطريقة
وچفة أيلاوي الرياح
وراح ....راح
راح للظلمة يدور
خلص عمره
والعظم أبدا" ما لاح
ملاحظة
ـــــــ
الرباط، العشار، الحسينيه ، شارع المترب، الطمامه،جسر الأحمر،التميميه،.... محلات في البصرة
الخندگ..... نهر في البصرة
أنس دينار.....شارع البصرة الرئيسي
باسم عبد الرزاق، خالد عبد الرزاق......أصدقاء الطفولة
إسليمان.... معلمنا في المدرسة الأبتدائية
فؤاد .... مطرب الشعب فؤاد سالم
جعفر أغائي، فاضل ...رجال الأمن في البصرة
العظم.... لعبة أعظيم الأح

#سعدي_جبار_مكلف (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات