دعاية انتخابيه . تحتاج الى لطميه .... نقلها محمد علي مزهر شعبان

محمد علي مزهر شعبان

الحوار المتمدن-العدد: 4381 - 2014 / 3 / 2 - 23:24
المحور: العمل المشترك بين القوى اليسارية والعلمانية والديمقرطية
    

محاورة بين شاب ورجل دين مال تالي وكت بأللهجة ألعراقية .
قبل ان ينهي سيد خلف محاضرته التي خص بها عشيرة من عشائرنا ، رمى بعمامته السوداء على الارض وبانت صلعته الحمراء المتعرقة وهو يصرخ

ولكم شبيكم ماعدكم غيرة على مذهبكم، شتكلون لعلي ابن ابي طالب ؟، تكولولة انتخبنا فلان ، شتحجون وية ام البنين ؟ ، تكلولها احنا خذلنا الحسين بكربلا، احنا تركنا العباس تتكطع جفوفه ، احنا كطعنا المي عن عبد الله الرضيع .
ولكم حطوا براسكم شوية عقل ، لتبقون سفهاء ، لتبقون معدان ،لتبقون همج ، قائمة الـ ( ؟؟؟؟ ) الله ورسولة مباركيها ، (باعلى صوته ) هاي قائمة شهيد كربلاء ، قائمة الطف ، هاي قائمة زينب وام البنين والسجاد ، قائمة ابو الجوادين ،(بصراخ) والله راح تظلون بيوم الحساب تفرون بذانكم ، اول سؤال راح يكولك شنتخبت ؟ ، شراح اتجاوب ؟ اتكلهم انتخبت فلان وعلان هذا الفلاني وهذا الشيوعي ؟ طيح الله حظكم اذا صدك ، سود الله وجوهكم اذا صدك .اليوم انتحر كدامكم هنا ،اليوم اموت هنا ، اكتل روحي اذا ما تحلفون براس العباس تنتخبون قائمة الـ ( ؟؟؟؟ ) ، يالله احلف حجي رشك انت اول واحد ، احلف بالعباس وخل يحلفون وراك واحد واحد.
تقدم حجي رشك خطوتين وهو تحت تأثير الصدمة والرعب والخوف من صراخ سيد خلف ونبرته الحادة ,ارتجفت يداه ونشف ريقه وهمَّ بالقول : عمي احلف بالعباس....

لاتحلف جاءه الصوت من ( فالح بن عاتي) ..لاتحلف ، العباس شنو دخله بالانتخابات ؟ (التفت الى سيد خلف الذي انشغل باعادة عمامته الى صلعته .اني احلف ( اضاف فالح) احلف بالعباس ابو فاضل ، احلف بالعباس ابو راس الحار سيد خلف وجماعته اكبر جذابين ، وين جانوا عنا هسه جايين ؟ وين جانوا من مرت علينا سنين شفنا بيها الظيم ؟، وين جانوا من اطفالنا ماتت بالجفاف؟ وين جانوا من نسوانا كامت تجدي بالشوارع ؟، وين جانوا من بعنا حتى شبابيج بيوتنا وطبخنا حتى الزبالة ؟، وين جانوا من جانت لكمة الخبز حسرة علينا ؟ شو محد اجه وكال انتوا اهلنا وتجمعنا وحدة المذهب ،عاشوا كل حياتهم متنعمين ووجوهم حمرة ونسوانهم يفترن من دولة لدولة ، واحنا خيرتنا كامت تبيع زوري ، وخيرنا كام يشتغل بالبالات ، ليش ماكالوا اهلنا ماتو من الجوع ؟،اطفالنا ماتت بين ايدنا ،وماعدنا فلوس نعالجهم ، شو محد سأل علينا ؟ ، ومحد خاف من يوم الحساب ؟، ومحد منهم استحى من الحسين والعباس؟.اطفالهم اغلى من اطفالنا ؟ لو نسوانهم احسن من نسوانا ؟ لو شبابهم الفاهين احسن من ولدنا ؟
لاتحلف حجي رشك ، اني احلف ابدالك ، ذولة جهنم ارحم منهم جم قصر بنوا بلندن ؟ جم سيارة جانت تمشي وراهم ؟ واحنا بالتاتات نخاف نصعد خاف ماعدنا كروة ، احنا اهدومنا تكطعت علينا ، شفنا الضيم والقهر ، شفنا الجوع شفنا ألذل، متنا والامراض لعبت بينا جولة ، وهمه كل واحد منهم وجهه هاعرضه ومتفح وعلباته تكول تاير ،
لاتحلف حجي رشك ، الانتخابات موالنه الانتخابات الهم ، حتى يكعدون بالقصور، وينهبون ويفرهدون براحتهم، موانتخبناهم ذيج المرة ، شقدمولنا ؟ شو زاد الضيم والقهر وطاسة مي نظيف ماكو ببيوتنا..
اطلع برا حجي رشك وشوف سيارة سيد خلف ، وشوف لاندكروزات الحماية ،شوف اتباع ال البيت اسال سيد خلف كله وين بيتك مولانا ؟ منيلك بيتين بالجادرية مولانا؟ منيلك عشرين سيارة مولانا؟ منيلك بيت بلندن مولانا ؟ وين بناتك مولانا ؟ ليش بايران مولانا ؟ ليش مايجن يعيشن ضيم بناتنا ؟ شنو بناتك نازلة بيهن اية مولانا؟
اسمعوا اخوتي ، الله ما يشتغل بمفوضية الانتخابات حتى يحاسب على التصويت ، والحسين نصير المظلومين مو نصير الحرامية ،والعباس يكره اهل القصور والسيارات المسروقة من دم الناس ،وام البنين تحرس اولادنا ، لان اولادهم يحرسها ( ؟؟؟؟ )، لا ..لا سيد خلف احنا ما نحلف ، روح شوف غيرنا ، بعد محد يضحك علينا ، اليوم عرفتونا وصرنا احبابكم ؟ صار سنين ، دينار واحد ما وصلنا منكم ، لو واصلنا دينار واحد ، جان صدك كلنا عدكم شرف ، ضحكتوا علينا هواي ، كافي ،، لهنا وكافي ،بعد احنا مو لعبة بيدكم ..
ولدنا قندرة ماعدهم او ( ؟؟؟؟ ) اشترى الــ ( ؟؟؟؟ ) كلها . ولدنا ماشايفين الصويرة اولدكم من سويسرا لامريكا ، يقبل الحسين والعباس بهاي؟ ، الحسين والعباس ولد رسول الله من حاصرتهم السيوف ماشردوا لايران او لندن ، ومن ضاقت بيهم الدنيا ما عاشوا خارج ناسهم ، الحسين والعباس مامدوا ايدهم على بيت المال ، وانتوا ولدكم اخذوا البيت والمال .. اسمع سيد خلف هاي قوانة المقابر الجماعية بعد هم ماتمشي علينه ، المقابر الجماعية مقابر ولدنا مو ولدكم ،و من ولدنا اندفنوا جوا الكاع ولدكم جانوا يصيفون بفرنسا ..
اطلع برا سيد خلف ، (بصوت اعلى)اطلع برا ، بعد ما ينضحك علينا ، احنا نعرف دربنا ، والمرجعية هم نفظت ايدها منكم ، والائمة ائمتنا نصراء الفقراء والمساكين ، نسوانا الي ترملت مو نسوانكم ، واطفالنا الماتت على الجسر مو اطفالكم ، او شبابنا الراحة مو شبابكم اطلع برا وصلت حدها وياكم ،اطلع ,, اطلع .. اطلع ..
عدل سيد خلف من وضع عمامته وهو يرتجف وقد اصطبغ وجهه المدور بحمرة جعلته كثير الشبه بنصف رقية .
سقط فالح بن عاتي على الارض بعد ان ارتفع ضغط دمه وهرع اليه ابناء العشيرة يحملونه متجاهلين خروج السيد ذليلا منكسرا يردد مع نفسه
انتم وقود جهنم..انتم قرود ... انتم حمير
ومجرد رد مني هل ترضى ياسيد خلف ان يكون ناخبيك من القردود والحمير .. هذه الحكاية نقلها من صديق .. هو مسلم ويساري .. هو اخ تقدم في حزبه ، نبيلا كريما هادئا ، اغتالته يد الارهاب ، له من الاقارب عانقوا المشانق بين من انتمى لعقيدة حزب ناضل من اجل وطن واخرين حملوا اصلابهم على اكتافهم .. يساريون ودعوه . ولا يزايد احد على نضال تلكما الحزبين في العراق .. ابا ذر والحسين ع . هذا الصديق يحمل تينيك الصفتين حينما يزرع الانسان في مزرعة الدنيا نبلا واباءا وايثارا ، ثمارها الخلود .
بين المهندس العظيم لهذا الكون وبين سيد المخلوقات الكريم الانسان . انها ليست بدعة ولا اكتشاف ولا خلطة غريبه ، انها واقعية ان تحيا نبيلا تتانس مع الاخر حين يكون وطنيا مناضلا في حومة وطن . يقرا تاريخ البلد ايات من نور لتضحياتهم . انها الحياة التي بدئها ضد الظلم ابو ذر ... عجبت لمن لا يشهر سيفه .. في حضرة معلمه الذي اسس نظرية من اين لك هذا ؟ رحم الله " احمد عباس صالح " صاحب كتاب اليمين واليسار في الاسلام ...

#محمد_علي_مزهر_شعبان (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات