رسالة الى وزير العدل

ريحان تموز

الحوار المتمدن-العدد: 4363 - 2014 / 2 / 12 - 05:28
المحور: مواضيع وابحاث سياسية
    

أستاذي اريد أسولف وياك ، بحچي أهلنه ، لأن الفصحى ما راح تريحني بالحچي ! أگلك أستاذ ، أنت شتريد !
يوم طلعتنه بسالفة القانون الجعفري ، واليوم جاي تهدد وتتوعد اي واحد يتطاول على المرجعية ، عمي انته تسودنت علينه ! عمي بهاي سوالفكم ، راح ترجعون البعثية ، لان وروح أبوك ، البعث والبعثية يريدون شعب لايهش ولا ينش ، وأنتم بسوالفكم هاي تريدونه نسكت وننچب ، شتگلولنه ، نگول صار مولاي ، رحم الله والديك سيدنه ! بس عمي هاي السالفة بعد ما تصير ، الوادم فتحت وگامت تشوف بعيونه، مو مثل گبل عميان وكلشي ما ندري ، لان القايد الضرورة چان غالگه علينه كلش ، ما ندري طشت ، رشت ، لا بويه هسه أكو جرايد وتلفزيونات وراديوات وفيس بوك وتويتر وبلاوي هواي ( رحم الله والديهم الكفار سووهن ) ، خو مو ايران الكاتل روحك عليه وخايف على مشاعر الخامنئي ، عمي انت شني إيراني لو عراقي ، بس فهمنه ! زين هذا الخامنئي أخرس ما يعرف يحچي ، ما عنده لسان ويدافع عن روحه ، شو ما شاء الله ، عنده ايران سبعين ، مدري ثمانين مليون مگموع، كلهم ساكتين ، زين مو أكو سفارة إيرانية في بغداد ، شو ما فتحوا حلوگهم ، چاه انته شبيك خبصت روحك وظليت تهدد ! زين عمي معقولة انتم جاي تشتغلون إبلاش للبعثيةحتى يرجعون ، ويلگون الشعب جاهز ، شعب خايف ، طائفي ، فقير ، مذلول بلگمته ! معقولة عمي ياسيد ، يا مجاهد !
زين ، اذا انت خايف على مشاعر مرجعيتك ، أحنه هم عدنه مرجعية ، هم راح تحاميه وتدافع عنه ، لو بس مرجعيتكم ، خوش ، ومرجعيتنه كش وبره ، عمي أحنه نقلد گوگل ، مرجعية والنعم منه ، وحگ جدك اذا واحد يندگ بيه ، الا يسطره سطر ، بڤ-;-ايروس ويخبله .
عمي ، بروح أهلك ، تهده بالرحمان ، وتنهله الله بالوادم ، هذوله الصحفيين ، تره خرقتوه كلش ، رأساً حطيتولكم تلث عبوات بباب الجريدة ، چاه شلون تگولون التفجيرات والمفخخات من هذولاك الوادم ، شو هم طلعتوا شطار بهاي السالفة ! والله خبلتونه ! الله وكيلك ومحمد كفيلك ، سودنتونه ، تكتلون بينه ، تبوگون بحلالنه ، وما مسويلكم شي ، خلونه ندردم ، نحچي ، خرب حظنه ، حتى هاي تريدون تاخذونه . بس والله يا عمي الوادم ملت ، وصبره خلص ، انتبهوا لرواحكم ، تره شوية وتجيكم زحف للمنطقة الخضراء ، وساعته ما يفيدكم لا خامنئي ، ولا خميني ، ولا اي مرجعية ، حتى لو گوگل يصير وياكم ، والعباس ابو فاضل ، وآني عمك ، أگلك ، كافي تره خرقتوه ، ونعله على جد جدي اذا انتخبكم بعد ، لو كل النجف وكربلا وياكم ! كافي ، أحترمو نفسكم، ولكم الإيرانيين ساكتين ونتم تهددون بينه والله ما صايرة ، سرسرية .

#ريحان_تموز (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات