من دفتر اليوميات / مالذي فعلته الحرب بنا ياحنان ؟ هذا مافعلته بنا الحرب ياجميل

مقداد عبدالرضا

الحوار المتمدن-العدد: 4291 - 2013 / 11 / 30 - 05:30
المحور: المجتمع المدني
    

عام 1982 دخلت مزاد علني واشترينا الشقة اللي ساكن بيها الان , كانت العمارات تضج بالحياة , ساعة كبيرة تعزف موسيقى تنبه الناس على الوقت , انا ما أحب الساعات لكن هاي الساعة كانت تشعرني بالتفاؤل , مسؤول العمارات السيد حمزة كان واحد من اخلص الناس واكثرهم اناقة , يطلع مبكر يدور على الاماكن اللي بيها نقص حتى يكمله , فديوم اجت وشايه على هذا الرجل واختفى ,, كانت الحرب مستعرة لكنها كانت بعيدة , احد الايام كان صديقي علي زين العابدين مدعو عندي على الغدة , علي زين العابدين معد برنامج السينما والناس فترة السبعينات واللي كانت تقدمه ببراعة الصديقة العزيزة اعتقال الطائي , قبل الغده نزل صاروخ قريب من العمارة , هشم الشقة , تناثر الزجاج , تتطايرت الستائر , علا الصراخ من كل جانب , المشهد اللي لايمكن ان انساه هو تطاير الشبابيك في الهواء ونزولها من الطوابق العليا الى الارض , صديقي علي صار وجهه قطعة دم , لان مرت شظية مزقت جزء من وجهة , علي اختفى , صار الاكل زقوم , من اعاجيب الحرب هو انقطاع المي والكهرباء , وهذه القضية وحدها لازم نفردلها صفحات كثيرة , صديقي جميل تزوج اثناء الحرب عن حب كبير , ظل مصر على الزواج من حنان حتى بعد الرفض اللي كان يتلقاه من اهلها , , اخو حنان عايش بالخارج , اجه زيارة لاهله وسمع بحب جميل وحنان , اصر هو على زواجهم , وفعلا تم الزواج , بليلة العرس جميل كلشي مسوه , كعدها لحنان وهيه بكامل ملابس العرس وظل للصبح يباوع عليها , هيه كانت قطعة دم من الخجل , بس هو لعين موت الخجل عندها من اول ليلة , الصبح دكوا الباب عليهم وجابولهم الفطور , اول شي سوا جميل مسح كل القيمر بوجه حنان ,, وصار يغنيلها , خدج الكيمر انا اتريك منه , شالها للحمام , مد ايده للشاور , ماكو مي , ظلت حنان تباوع على جميل فترة استمرت الى الظهر وكل العمارة ظلت تصيح اجه المي , اجه المي ,, صار قرع عنيف على الباب , هرع جميل فتح الباب , كانت عمته الحلوة تحمل مواعين الغده ,وين صرتو عيني جمولي ؟ , اوف من الحب , حنان مكانت عندها رغبة بالاكل , لكن مكانت تعرف السبب , ربما من الفرح ,, قلت ربما ,, الحرب لعينة تهزم اللذات وتسرق المسرات ,, جميل بعد فترة صارت تبدو عليه علامات ضجر والانفعال , يتكدر لاى سبب كان , الى ان اجه عليه فد يوم وكلي ,, طلقتها ,, هد حيلي هذا الخبر , شنو السبب يمعود ؟ كلي المي , كتله شبي المي ؟ كلي مكطوع دائما , احبها , احاول المسها , التحام رائع , فجاة العمارة تصرخ اجه المي , رأسا دموعها تنزل , نبتعد نكوم نسرع حتى نملي مي , يجتاحنا المي , ينزل على اكتافنا , تكوم ترجف من البرد بهذا الصيف الجحيم , بالليل نلزم خفارة انا وهيه على المي ,, نظل واحد يباوع على الاخر , كنت اخلي اغنية هيه تحبها كلش , شكل تاني حبك انت , قبل كم يوم كنا في اجمل حالاتنا , العمارة صاحت اجه المي , انفصلت عني , راحت طلعت الشريط مال الاغنية قطعته وصارت تكمز وتصيح مع اهل العمارة اجه المي , لزمت المقص بدت تقص شعرها وتصرخ اجه المي ,, تهسترت , اجيت اريد الزمها صرخت بوجهي , اذا تقربت مني اخلي المقص بقلبك ,, روح ,, روح للمي ,, من هدأت , اجت مثل القطة , كعدت بجانبي كالت , جميل انت تحبني ؟ , كلتلها اموت عليج , كالت امشي طلقني اذا تحبني , كتلها ليش ؟ كالت معادت للحياة معنى , المي طغى عليها , حاولت للصبح ان اثنيها عن قراراها , كانت مصرة , نزلت عند رغبتها , الصبح نزلنا من الشقة , كانت العمارة كلها تصيح اجه المي , حنان كامت ترفع ايدها بالتحية ودموعها متتوقف ,, مرت فترة اختفى فيها جميل من العمارة بعد ان طلق حنان ,, باحد الايام لمحت حنان من بعيد باحد الشوارع , كانت متشحة بالسواد , سلمنا على بعض , لاحظت شي غريب بعنقها , كانت تحمل سلسلة فضة وبيها رقم , تفاجأت , سألتها عن السلسلة , كالت هاي روح جميل , وين راح سالتها ,؟ كالت بعيد كلش , فتحت حقيبتها وطلعت ورقة , كالت هاي الرسالة اجت من جميل مع هاي السلسلة ,, فتحت الورقة , كان مكتوب بيها ,, حنان حبيبتي احيانا الماء لايجعل من كل شيء حي ,, اجهشت انا بالبكاء , بل بالصراخ , امتدت ايد حنان لبطنها , تذكرت اللحظة اللي انتهى بيها فلم سبارتكوس ... باوعت عليها بعمق ,, ظلت ايدها على بطنها وابتعدت ,, راحت تبتعد الى ان اختفت ....

#مقداد_عبدالرضا (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات