قصيدة ( أبيع الصوت )

حامد كعيد الجبوري

الحوار المتمدن-العدد: 4030 - 2013 / 3 / 13 - 19:45
المحور: الادب والفن
    

يا هو اليشتري آنه أبيع الصوت ..أصيّح بالمزاد أبخلك دلاله
أبيع أبطكه ناكص صوت ما مغشوش.. اليملك للسلع يتحكم بماله
لتكلي حرام وراي مدري أمنين ..المدري ما يجوع ويبحش زباله
أبنص لحاف أبيعه ب(كارت موبايل )..أمبارك للشراه وحللّه وشاله
مو مره أبيعه الكلمن أحتاجه ..أشما يدفع نقبله أشيخطر أباله
ما يفرق نبيع أسلامي علماني ..وأحلف بالجذب قرآن وكباله
ما أنتخب غيره وصوتي أله مضمون .المهم يترس شليلي ويصعد هلاله
ولا أقبل نصيحة ممتلي وشبعان ..النصايح ما تفيد الجايعه أعياله
لحك وأشتري لنعزل الدكان ..تازه أصواتنه ومنبيعك أفضاله
لتكلي حرام الدين والأخلاق ... أشو باعوا وطن محد نطق لاله
***
عشر سنين مرت والزمن ما دار ... مو طاح الصنم وأنداس تمثاله
عشر سنين مرت بيدنه الغربيل ... ولا حصوة التكف بعيون غرباله
ولا قائد تحزم يعمر المهدوم ... بس يبني الحزب و يترّس أسلاله
ولا قائد أتحزم للضحايه الثار ... والخنجر يشوفه أبجيب جتاله
مسكين الوطن كصوا أجناحه أبليل ... مجتوف أبقفص ودموعه هماله
يباوع بالوجوه يصيح يا شعلان ... يا شيخ المراجل غيرته عكاله
شك ثوب الجفن وأتنخه بالطيبين ... وشيّم للعراق الهور وجباله
وينك يا وسيع الراي يابو الجون ... أنصت للغناوي ونوح مواله
سنينتها البعض عالذبح والتهجير .. وناس الفرهدت للعيط والتاله
وبعض أتشردت دكت أبواب الغير ... وناس أعله الونين أمهدله هداله
وناس أعله الأمل تنطر سماهه تجود .. تصلي على الرسول وضنوته وآله
جِزعتنه التقية والصبر مسموم .. المكوار أنكسر وأنباعت الفاله
أم الشعر بارت فازن الكرعات ...والسيد تنحه وسادت حثاله
نجر حسرة ندم عضينه للأبهام .. وفرزنه الحجي والقيل والقاله
المؤمن من جحر ما يلدغ مرتين ..ميغشنه الحجي ومفضوحه أفعاله
نعوف الحجي اليوجع ننطر الصندوك ... ونقره الممحي ذكره ونعرف رجاله
وترد فرحة أهلنه والعراق يعود .. يفك باب المضيف وينصب دلاله
يصيح براسي صوت ومقتنع بالصوت ... اليحب شعبه وعراقه صوتي يحلاله
....

#حامد_كعيد_الجبوري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات