الصفر/الى الاستاذ ريمون نجيب شّكوري

عبد الرضا حمد جاسم

الحوار المتمدن-العدد: 3707 - 2012 / 4 / 24 - 21:31
المحور: التربية والتعليم والبحث العلمي
    

الى الاستاذ ريمون نجيب شكّوري
مْتْعَصُبْ او يْرْجِفْ
او وجهه أصفر مْنْخُطُفْ
كَال: تُعْرُفْ
كَتله لا....منك شرح انتظر
كَال اسمع وزين اعرف
شمكبرت انت كَدامي صفر
ضحكت...كَال تضحك و انه سويتك صفر
أفركت كف بكف
وكَلت: أنه عليك اتأسف
أهدا او بطل هالسخف
الحال البيه انت ما يخليلك قَدُرْ
ما اعترض علصفر
تعتقد من هالوصف انقهر
أنه صفر...هذا شرف بيه افتخر
اولاً: لنه وصف من ناقص مثل قدرك صِدَرْ
والحكمة الجبيرة تكَول: أذا اتتك مذمتي....
تكملها انت تكَدر او تعرف
والثانيه: لن الصفر هو الي مد للعالم نظر
وراح اشرحلك اكثر
هذا جميل...ألك طول العمر بيه اعترف
ولازم اقدملك شكر
لن هذا مدح...أدري بلاوعي منك بِدَرْ
أصفن اشويه أو فكر
واحد او كَدامه صفر صار أشكَد
و هل واحد أشكَد كُبَرْ
صار عشره... أفتكر
هذا يعني الصفر الهوه أني تسع تعشار
والواحد المتباهي انت ...عُشُرْ
من هل نتيجة لحجمك.... كَدام الصفر أحسب او قدر
ولقدرك أعرف
واعْرُفْ الصفر لو تقدم علرقم لو تأخر
يأثر أو ما يتأثر
انت تستهزئ بالصفر
هذا اثم بحق الصفر تقترف
لا تغتر وياخذك طيش او تنحرف
يلي تِعَيّرْ بالصفر
الصفر مني ومنك ومن كل رقم اكبر
لو يرضه عليك الصفر عشر مرات تكبر
او يزعل عليك اشويه عشر مرات تصغر
او لو عليك اتعصب يطشرك اتطشر
يعني ألي و ألك ولغيرنه يكّبر ايصّغر
جانوا ايحسبون
واحد اثنين تلاثه......تسعه... والارقام توكَف
وتْتْحَدَدْ او تْتْسَمّرْ
وتظل عله روحها تفتر
هذا الوضع طول دهر
والي حلها للبشر هو الصفر
الصفر فَجِرْ عله الارقام طر
وخلَّف ملامح بارزه وحقق نصر
وزال الغشاوة من البصر
يلي تعير بالصفر...
الصفر اكبر... مما انت تتصور
و من صفات الكُبُرْ
التواضع والقوه والشرف
متواضع.... دومه صفر
بكل زمان وكل مكان اوكل ظرف
يبقى عله حاله صفر
أتْغَيْرَه... أبد ما تكَدر
قوي...قيمه ثابته ولكل قيمه هو يغير
لو ضرب اكبر رقم
يترنح او يختفي أبحر الصفر
او لو تقسمه... عله اكبر رقم
يدخله ببحور الصفر
اكبر رقم لو شلت منه صفر
يتدهور او ينحدر
او لو اجه بعده صفر
ينحرف
وهواية منه ارقام تصبح مو مهمه
وما يصبح الها ذكر لو اثر
شريف
ثابت او ما ينصرف
لا بيه رُبُع لا بيه ثُلُثْ لا بيه نُصُفْ
بالصَرُفْ بالعُرُفْ بالتَرَفْ هو صفر
الصفر تحتاجه الارقام والناس
شلون تحتاج الارض للنهر
وشما يسير النهر يتسامر او يه الجرف
الصفر يلي تعير بالصفر
تلث حروف
الصاد من الصبح والصبر
الفاء من الفرح والفجر
الراء من الربح والرحب
الصفر يلي تعير بالصفر
ما يعني ماكو يعني انت ماتعرف
وما تكَدر تحدد قيمته اشكَد واشكثر
وحته تعرف
اطلب من البكَال فد صفر كيلو جزر
عقله يوكَف و ما يعرف اشلون يتصرف
يدوخ و يتيه الحساب ويتأفف
وحواجبه تظل اترف
او يستحي او يعتذر
ويكَول عمي العفو ما عندي جزر
وهذا التشوفه مو جزر هذا شجر
انطيه عذر...ما يكَدر ايقدر
وللعلم حته اذكرك بالصفر
كل انطلاقه تبتدي
تلاثه اثنين واحد صفر
يعني انطلق وللأمام سر
شوف اشكثر هالصفر
يحمل وصف او تصريف او سر
هسه اصفن اشويه واحسب واتْصَرَفْ
و افتكر او فكر ابمعنه الصفر
وبعد اي رقم لو ترصف صفر يم صفر
جرت الارقام جر
و لا تنسه وانت تفكر....ساعة الصفر

#عبد_الرضا_حمد_جاسم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات