كاتب اخر وكت

حسين السماوي

الحوار المتمدن-العدد: 3485 - 2011 / 9 / 13 - 02:01
المحور: مواضيع وابحاث سياسية
    

اعرفكم بنفسي انا كاتب ( موعرايض ) ومن الكتابة احصل هواية فلوس ( اكتب لاهلي واصدقائي حتى يودولي فلوس ) والحقيقة هاي ارخص واسهل وسيلة للحصول على المال الحلال الزلال وطبعا تعرفون الكتابة هية عصارة (وفي رواية اخرى عصير ) الفكر وهاي العصارة ما تطلع الا بالتواليت ولهذا سمو ( بيت الادب ) وطبعا تعرفون انا عايش على المساعدات مثلي مثل كل الكتاب والادباء العراقيين الشرفاء ( وغير الشرفاء ) ونسب الدول التي تساعدنا ليلا نهارا ..دول امبريالية ( والله حرام ما اعرف شنو هاي الكلمة ) استعمارية ( استلم الثانية ) صهيونية جاجيكية الخ وبعد ما نخلص من ( الاسهال ) الكتابي وبعد دورة لو دورتين من ابياك الزحلاوي ( تم استبداله بالجن لان العرك حرام ) تبدي السهرات الجنجلوتية ( هاي هم ما اعرفه شنو ) وتبدأ النقاشات العراقية المعروفة عالميا والتي تبدأ بالسياسة مرورا بالادب انتهاءا بكيفية عمل الدولمة و مدح التشريب وتفضيله على سائر الاطعمة وكلكم تعرفون ماكو نقاش بدون بوكسات ( مستحيل ما صارت ولا تصير بدون عركة ) وثاني يوم ما تعرف منو بسط منو وعلى شنو ومنو وصلنا لبيوتنا ...
عندي صديق الله وفقه من سقط صدام كام يكتب يسب هذا الفريق ليكسب من الاخر ثم يعكس الاية وحسب كمية الدفاتر المستلمة من الجماعة ( لا يروح فكركم لبعيد حسبالكم كتب ثقافية لا يابة لا الدفتر هو عشر الاف دولار امريكي اخضر ستوة طالع من المطبعة ) دفتر واحد يكفيني عرك ليوم المماة بس المشكلة اسب منو ويا حزب يدفع اكثر هاي بعدني ما وصلت الها .
لكن بالحقيقة اغرب كاتب واحد كان يكتب بجريدة الثورة ويمدح بالقائد الضروري جدا وفجأ لبس عمامة ( يوم طابقين ويوم ثلاث طوابق ويوم بينتيوم اربعة وامس كان لابس عمامة دوال كور تيمنا بكومبيوترات انتل ) وطبعا كام يحجي على الحجة ويمتة يطلع وراح تكون الدفاتر ( مرت بنا سابقا ) ما الها قيمة وكيف ان القائد ( مو الاولاني ) راح يقود الجماهير المؤمنة ( بالفرهود ) نحو تحرير العالم من ما اعرف شنو
وطبعا اخونا هذا كصته مليانة ايمان وتقوى ( وجيوبه ايضا ) والربع يتهافتون على يديه الكريمتين يلثموها تقبيلا بلكي تطلع منها كم دولار
لكن شلون نقارن بين الحجي دستويفكسي مثلا ( تلفظ ديسكو فسكي بعد نص الليل ) وبينا احنا كتاب اخر وكت مثلي ومثل غيري ياهو اليجي كام يكتب شنو خان جغان ( منو هذا جغان ) وطبعا اللي ما تعرفوه ان الحجي ديستويفسكي طلع مسلم لا والنوب شيعي ( لان مرة واحد شافة يسوي الخرطات التسعة ) بس هو كاتم ايمانه خوفا من لينين لذلك سمي مؤمن ال فسكي
انا يمكن كمت اخربط ؟ اروح ازوحر بطل اوزو وانام احسنلي انا ويني وين الكتابة
حسين السماوي

#حسين_السماوي (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات