إحنا موش طبقه ثالثه

محمد مراجع العزومى

الحوار المتمدن-العدد: 3399 - 2011 / 6 / 17 - 20:44
المحور: المجتمع المدني
    

كالعاده ، و أنا بأتصفح المواقع الإلكترونيـــه ، لفت نظرى فيديو مكتوب عليه ـ البدو فى مصر طبقه ثالثه ـ و بما إنى بدوى قولت أدخل و أشوف أنا طبقه ثالثه ليه ، بغض النظر عن محتوى الفيديو ، و اللى كان بيتكلم عن بدو سيناء ، اللى لا يمثلوا حتى 15% من البدو اللى عايشين فى مصر ، لقيت التعليقات اللى على الفيديو ، و اللى بعض منها موجود فى الصوره اللى على النوت ، بتثبت فعلاً إننا طبقه ثالثه ، لا حق لنا فى العيش أو الحياة ، و إن البدو دول فعلاً محتاجين هولوكوست يبيدهم ، زى ما عملت حكومة ألمانيــا النازيه مع اليهود ، لكن ده كله ليـــه ؟!!! لقيت فى التعليقات اللى بيقول يا عم دول تُجار مُخدرات و سلاح ، و كأن المخدرات و السلاح لا يُتاجر فيها إلا البدوى ، مع إن الصعايده فيهم تُجار مُخدرات و سلاح ، و الفلاحين فيهم تُجار مُخدرات و سلاح ، و الإسكندرانيه و أهل القاهرة فيهم تُجار مُخدرات و سلاح ، و الغريب إن محدش سأل نفسه ليه البعض منهم تاجر فى المخدرات و السلاح !!!! أقولكم أنا ، أول ما إتخرجت من الثانويه العامه ، كان نفسى أطلع ظابط شُرطه ، و بالفعل قدمت أوراقى فى أكاديمية مُبارك للأمن ، و دخلت الإختبارات ، إجتزتها كلها ، و جيت عند كشف الهيئه ، شاب مُحترم واقف قدام الرُتب ، قرأ أحدهم إسمى و قالى إنته إسمك محمد مُراجع سعد سعيد ، قولتله أيوه ، قالى إنته مصرى ، قولتله أيوه ، قالى والدك مصرى ، قولتله أيوه ، قالى إنته ساكن فى المكان الفُلانى ، قولتله أيوه ، قالى ليك قرايب بدو ، قولتله يا فندم أنا بدوى أباً عن جد ، قالى طب روح و إنتظر النتيجه لما تتعلق فى الكشوف ، إستغربت فى الأول هو ليه بيسأل الأسئله دى ، مع إن كل حاجه مكتوبه فى الملف اللى قدامه ، روحت و جيت يوم إعلان النتيجه ، مالقيتش إسمى فى الكشوف ، و لما سألت قالولى يبقى ما إتقبلتش ، روحت و قولت لوالدى على النتيجه ، فشك فى إنى أكون عامل مصيبه أو إنى كنت بأضحك عليه ، و إنى ما قدمتش أوراقى لكلية الشُرطه من أصله ، و قعد يسأل و يدور لحد لما عتر فى واحد ظابط صاحبه ، و كان بيدردش معاه ، و فتح معاه الموضوع ، قام الظابط قاله بكل بجاحه ، يا راجل عاوزهم يقبلوا واحد بدوى ، أنسى الموضوع ده ، و مرت السنين ، و مرت معاها نماذج عليـــا ، ضاع مُستقبلهم لكونهم فقط بدو ،، حتى العمل فى الوظائف داخل الشركات مُستحيل تلاقى واحد بدوى شغال هناك إلا لو كانت معاه واسطه ، طب طالما موش عارفين نشتغل يبقى هناكل منين ؟؟!! مع العلم إن اللى شغالين فى المُخدرات و السلاح دول هما اللى فقدوا الأمل فى إنهم يشتغلوا حتى سباكين ، مع إنى أعرف نماذج بدويه من حملة المؤهلات ، شغالين عتاله و جناينيه .قالوا عننا جواسيس ، أعرف واحد أسمه عُمر عبد الله ، بدوى أباً عن جد ، والده عبدالله حموده مسعود أحد شُهداء حرب أكتوبر 73 ، ثم إنى عاوز حد يجيبلى إسم شخص بدوى كان جاسوس فى يوم من الأيام و للأسف عُمر ده كان نفسه يشتغل فى شركة بترول ، لكنهم رفضوه لأنه بدوى ، فهل شخص إبن شهيد ، يُستحق أن يُعامل مثل هذه المعامله فقط لكونه بدوى ؟!!! عايشين طول عمرنا فى الصحراء ، و يمكن أكثر ناس لا تُمثل عبء على الدوله هما البدو ، لأنهم عندهم إكتفاء ذاتى فى كل حاجه ، الأغنام و بنرعاها بناكل منها ، و نسترزق من وراها ، الجيل اللى طالع عاوز يتجوز ، ما بيروحش يقدم طلب فى المحافظه أو الحى ، عشـــان خاطر شقه يتجوز فيها ، يا أما بيتجوز مع أهله فى البيت ، يا أما بيبنى له بيت عباره عن أوضتين و صاله و حمام و مطبخ ، جنب بيت أبوه ، عشان يهدهاله الحى تانى يوم ، لأنه بانى من غير ترخيص ، مع إن الأرض بتاعته و بتاعت أبوه و جده ، و محدش مننا إشتكى ، ده كله ليه ؟!!! قالوا إن ولائنا لليبيا ، لأن اللهجة البدويه أقرب للهجة الليبيه ، عاوز أوضح للكل حاجه بسيطه جداً ، إن أهل ليبيا اللى على الحدود المتاخمه لمصر بيتقال عنهم إن ولائهم لمصر ، فكفاكم إفتراء ، إحنا طول عمرنا مصريين ، إتولدنا هنا و هنموت هنا ، و بنشتغل و بنتعب عشان مصر موش عشان ليبيا ،، فليه كل ده ؟؟!!!عايشين طول عمرنا وسط الألغام اللى ممتده على الخط من برج العرب و الحمام مروراُ بالعلمين و وصولاً لمطروح ، بيموت لنا كل يوم واحد ، و بيتشوه ألف واحد ، محدش سأل نفسه فى لحظه ، أهالى الناس اللى ماتت من الألغام فى رقبة مين ، ولا عشـــان إحنا بدو لا حق لنا فى أن نعيش ،، كونى بدوى ، فده شئ لا يُقلل من شأنى ، أنا شخص أتعلمت لحد لما إتخرجت من كلية الإعلام ، و فى كل مرحله هويتى البدويه لم تكن تفارقنى ، و لن تفارقنى حتى أتكأ فى اللحد ، فأنا أفخر بكونى بدوى

#محمد_مراجع_العزومى (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات