لا ياستي ما حذرتي

درويش محمى

الحوار المتمدن-العدد: 3317 - 2011 / 3 / 26 - 23:50
المحور: المجتمع المدني
    

لا ياستي، شو هل حكي يا بثينة شعبان، كل عام ونحن بخير، لا يا ستي ما حذرتي، كل عام ونحن مو بخير، ولا انتي بخير، ونحن الاكراد جماعة غير حضاريين، ونوروزنا مو جميل ولا حضاري، ونحن مخربين واكتر من هيك، نحن انفصاليين، شو رأيك.
مو علينا ياستي، انتي عم تلعبي بالوقت الضائع، ونحن ما بنحبك ولا بنحبو، وقلبنا مع درعا واهل درعا، وانتي قلبك من حديد وعلى حجر، ولا تفهمينا غلط ياستي، اذا لهلا ما طلعنا على الشارع، نحن طلعنا على الشارع من زمان، شو نسيتي يا بثينة، قبل الشارع التونسي وقبل الشارع المصري واليمني والليبي، وراح نطلع من جديد، وراح تشوفي، ومو هيك وبس، راح نغير، راح نشيل كل شي فاسد وطائفي، كل شي متسلط وسلطوي، كل شي مافيوي واجرامي، كل شي بعثي وعنصري، كل شي امني واستخباراتي.
مو علينا ياستي يا بثينة، ما بدنا مصاري من ايران ولا تزيدي معاشاتنا، وطز في المصاري، واذا جعنا ولا يهمك راح ناكل من مقالاتك المفعومة بالشعارات القومية والمقاومة والممانعة والشهيد محمد الدرة، فدرعا فيها اليوم مئة شاب شهيد وشهيد، بتعرفي اساميهم، بالله عليك يا بثينة بتحسي بوجع اهاليهم، اكيد لا.
مو علينا ياستي، شوية حكي ما بيمر علينا اليوم، شبعنا حكي وكلام فارغ، مابدنا امنك ولا استقرارك، شو مفكرتينا همج نحن السوريين، بدنا 20 نوع ونوع من اجهزة الامن والمخابرات لننضبط، لا ياستي، انتي فرقينا وراح تشوفي شلون راح تكون سورية، حلوة ومافي منا، وراح نرجع الجولان على فكرة، واذا الله راد راح نرجع اسكندرونة كمان.
انتي تأخرتي كتير ياستي، ياريتك لو نصحتيه من زمان، مو انتي على اساس مستشارة، وين كنتي كل هل الفترة، ليش مانصحتيه بمحاربة الفساد والمفسدين، وباطلاق الحريات وافراغ السجون، ليش ما نصحتيه، بأحترام الناس وتفكيك اجهزة المخابرات، ليش ما نصحتيه بالشفافية واحترام حرية التعبير عن الرأي ورفع قانون الطوارئ وتغيير الدستور، مو على اساس انتي مستشارة، ليش ما نصحتيه بأحترام شباب الفيس بوك واليوتوب، مو على اساس بتحبو انتي ولي عندك التقنية الحديثة، بربك شو رأيك بالتقنية؟
فرقو طيزنا انتي وجماعتك، ما بدنا ياكن، وخدي معك المفتي تبعك سماحة "المفسي حسون"، وكمان خدي الشيخ تبعك رمضان البوطي، على فكرة هو من جماعتي، كردي متلي، بس صاير عم يخربط الله يسامحو، ختير كتير وصاير عم يخرف، على فكرة انتي ختيرتي كمان، وانتي ترى قصيرة كتير، ومو حلوة بالمرة وعم بتخنخني، فليش الحكي الكتير والمؤتمرات الصحفية والطلعة على التلفزيون.
عمداً وعن سبق اصرار وترصد، ولأني وللمرة الاولى افتخر بهويتي السورية، واحتراماً للشباب السوري الثائر، واحتراماً للفيس بوك، وغيظاً ببثينة شعبان وفصاحتها، كتبت مقالي هذا بالعامية السورية.
كتبت بلغة "الفيس بوك"، الذي بفضله ومن خلاله اكتشفت حقيقة الشباب السوري، المارد الذي فاجئ الجميع، والذكي جداً، والوطني جداً، والشجاع جداً، هذا الشباب الجميل والقوي والثابت والذي لا يخشى الا ربه، شباب يواجه بصدره العاري الرصاص الحي والوحشي، شباب طيب وبسيط ويكتب بالعامية، ويتقدم على المعارضة السورية بكل احزابها وجبهاتها وتنظيماتها، ويتقدم كذلك على النظام السوري، بكل مؤسساته واجهزته الامنية والمخابراتية، وبين يديه يمسك هذا الشباب بمصيرنا ومصير ومستقبل سورية، والله ولي التوفيق.

#درويش_محمى (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات