اوعى يا ابو زيد تكون ما غزيت

حسن إسماعيل

الحوار المتمدن-العدد: 3288 - 2011 / 2 / 25 - 18:43
المحور: المجتمع المدني
    

تقديم ضروري

ارتداد وطن !
عهد قديم وعهد جديد لوطن
الوطن اللي تعرفه احسن من الوطن اللي متعرفهوش
رجعت ريما لعادتها القديمة ولا ايه ؟


كما تعلمون جميعاً ويعلم العالم أجمع
أن مصر يوم 25 يناير لسنة 2011 ولمدة 18 يوم كانت مصر الحلم ..
مصر الجمال .. مصر المساواة .. مصر التضحية
مصر المواطنة لكل المصريين ..
بمسلمينهم .. بمسيحيينهم .. بلا دينيينهم
بذكورهم .. وإناثهم .. وعواجيزهم .. وأطفالهم .. وطبقاتهم ..
وناس تانية معرفهمش
الكل كان ايد واحدة .. ايد واحدة .. ايد واحدة
وكان هذا النموذج والموديل والمثل القريب لليوتوبيا متجسد في ميدان التحرير
والحمد لله ونشكر المولى عز وجل أنه اتصور
ونزل على اليوتيوب والفيس بوك والقنوات العالمية على الهواء مباشرة

وفعلا افتخر كل العالم بالمصريين بثورتهم السلمية والحضارية والإبداعية
والمليئة بخفة الظل والإفيهات المصرية التي سهلت علينا الثورة
وخليتنا فعلا مش عايزين نسيب ميدان التحرير
لأنه فعلاً كان أجمل مكان في مصر
وأأمن مكان .. وأشجع مكان .. وأنظف مكان
بلا فتنة طائفية .. وبلا بلطجية .. وبلا تحرشات جنسية ..
ومصر فيه رجعت ياسين .. ورجعت بهية

وكانت حبة الكريز لثورتنا .. الطليعة الثورية اللي قالت للعالم أجمع ولأول مرة
أن ممكن تحدد ميعاد للثورة وتنشره على الملأ في الفيس بوك وتعملها وتنجح

سبق يتعلم منه كل العالم بمخبرينه . بجهاز مخبراته .. بأمن الدولة بتاعهم .. بلجنة سياساتهم
سبق لكل ديكتاتور ولكل أنظمة فاشية
أن في القرن الواحد والعشرين الثورة تتعمل بميعاد
وموبايلات بقي .. وتتشاير

برنة تنزل كام مليون مصري الشارع
وتقول ( الشعب يريد إسقاط النظام )
فيسقط النظام .. وتتساقط كل الأنظمة اللي جنبه .. وجنب اللي جنبه
ولأن الإجابة لسؤال ثورتنا كانت تونس
فالإجابة تونس

وتحية خاصة لشعب تونس العظيم ولشهدائهم .. ولتونس الجميله وثورة الياسمين رحم ثورتنا
ثورة 25 يناير ثورة اللوتس
تحية خاصة وسمعني اغنية ( أنا لسه تايه )

أنا لسه تايه .. ولا نفسي لقيت
مولود هنا .. ولا لسه ما جيت
عطشان ومالحة مايتي ما روتني
ضلتني نفسي .. ولا أنا حبتني

ده طوق نجاتي .. ولا ده غرقي
ده دم سايل .. ولا ده عرقي
طير وشايف عشه ده بينهار
ده جدار ده ولا بيت وحلم نهار


أنا عارف انكم نفسكم تعرفوا مين حبة الكريز بعد مخدتني الحروف وخدتكم مش بعيد قوي
حبة الكريز هما الشباب البريء الطاهر .. طليعة الثورة
شباب الفيس بوك .. الشباب اللي زي الورد .. اللي زي الفل .. اللي زي العسل .. اللي زي السكر
وفعلا ارفع راسك فوق انت مصري
ومصري افتخر
ولاحزبية .. ولاطائفية .. ثورتنا ثورة شعبية
والشعب والجيش وبإذن الله مصر معاهم إيد واحدة .. ايد واحدة .. ايد واحدة

فعلا نموذج يدرس للعالم من يوم 25 يناير ليوم 11 فبراير
مصر الحرة الجميلة
مصر اللي فعلا لكل المصريين
بتاعت الدين لله والوطن للجميع

فاكرين لما كان الإخوان بيصلوا والمسيحيين بيحرسوهم في الميدان
فاكرين لما كانت البنات اللي مش محجبات مع البنات المحجبات والشباب كله بيحميهم
فاكرين لما المصريين كانوا بيحموا شوارعهم وبيوتهم وكنائسهم ومساجدهم حتى المعابد اليهودية يا جدع كانوا بيحموا مصر بعد هرب الشرطة وترك مصر لشعبها
بدل الشرطة ما تكون في قهر الشعب .. الشعب في خدمة الشعب
فتصبح مصر آمنه محمية متحابة
لا تفرق بين أحد من مواطنيها
مصر كانت من غير الشرطة بلد مواطنة بحق وحقيق
وآمنة بحق وحقيق
وطبعاً كلنا عارفين وذاكرين فتح السجون .. وضرب النار في الشوارع .. وسرقة المتاحف ..
وبعض المحلات والبنوك كان بفعل مين
وعرفنا مين حرامي .. ومين حارس أمين
وعرفنا احنا مين وهما مين
مين سوس بينخر في عضمها
ومين ابنها اللي بيحبها
ولو ضاعت يفديها ويردها
فاكرين وإلا نسيتوا
أوعوا تنسوا
ده الثورة لسه بدمها

خلص الماراثون الثوري وسقط الرئيس
ومصر في حالة انتظار لسقوط النظام
كل يوم يدولنا حتة .. ويحبسوا واحد ..
ويقدموا قربان منهم على مذبح الثورة
ويهدوا حجرة من سور النظام البائد
ثلاثون عام وأكثر من حكم الرجل الواحد .. والحزب الواحد .. والوريث الواحد
وأكثر من سبعة مليون موظف
وكام مليون عسكري ومخبر وأمن دولة
وكام مليون مستفيد
المرتب مش أجر عادل كان صحيح
لكن صحيح برده كانت بترزق والدرج مفتوح
وايدك عمرها ما كانت في جيبك
كانت في جيب اللي جنبك
هرم طفيلي يابا عايش من سنين ومرستء نفسه وولاده وأحفاده
عايز في 18 يوم تهده على الساكتين .. المترستئين
لأ مش للدرجة دي يا فيس بوك
والمعجزات مش شغالة باليومية
حتى لو كنتوا شباب بريء وطاهر
الموضوع محتاج نضال مستمر
علشان ريما ما ترجعش لعادتها القديمة
ضرب النار خلص .. بس البنات مخلصتش والتحرش ميرجعش
ضرب النار خلص .. بس المسيحيين مخلصوش ..
يعني قتل قسيس وهدم سور دير .. حرق الكنايس ميرجعوش
ضرب النار خلص .. بس الميدان موجود ومنصة الثوار ماتهدتش
فاحتكار المنصة يا إخوان ميصحش

عارف ان موديل مصر في ميدان التحرير في أيام الثورة صعب يستمر
ويكون هو مصر المدنية اللي بنحلم بيها وثرنا لأجلها
وعارف أننا محتاجين حاجات كتير علشان نوصل لنموذج ميدان التحرير الثوري المصري
بس الحلم يستحق نناضل ونتعب علشانه

وطالما قدرنا نعمل ثورة بمعاد
يبقى اكيد هنقدر نغير مصر النظام البائد لمصر 25 يناير .. مصر المدنية
اللي من غير فتنة طائفية .. ومن غير بلطجبة .. ومن غير تحرشات جنسية
مصر ياسين ومصر بهية

#حسن_إسماعيل (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات